JEREMI 33 - Boy Lonana

Ҥoŋzi ma hoŋom kolo mindana

¹ Yawe ɓak boy mamma maŋ Jeremi hu buu ma daŋŋa olo, hu li ma nam ki duki hu taraŋga a juɓum umma tuwa.

² Na ɗaŋŋi Yawe ma li tlena, Yawe ma minisi asi col eŋgana, sem ana Yawe.

³ Yanu, an hin humuŋu, an hin takaŋ tlesuu ŋgolona, tlesuu sa ka ndak wasiɗina, aŋ ka wasiɗi layna.

⁴ Gasi, Yawe, Lona vi suu Israelna, ɓak kay zigini suu hu ɦoŋzi nammana, ni kay zigini suu hu ɦoŋzi ma vi muli suu Yudana, suu ki kaŋga tooy halaŋ halaŋŋa. Kay sun voɗta ŋgolora lay, kay ŋgewna lay.

⁵ Asi gijaŋ duu suu Kaldena, ni dlara oy ziginina u maɗ suunara ɦawaa, suu an hin casi ki u yaandana. An ŋgay tan ki ii ɦoŋzi namma wa, kay dla cora nam laɗta halaŋ.

⁶ Na may an golom tuguɗii mamba, hin cilim mbilim ki lay. An hin cilisi mbilisi kiyo. An hin takasi begera ki irisi bel bel u heɓpa, asi hin kak u heɓpa may.

⁷ An hin hoŋ gi Yuda u Israel balamasiya. An hin hoŋosi balamasi ko asi li ay jewra na.

⁸ An hin mbususi ki teteɗ kay maɗ ma asi cam vi tasi ki daŋgayna fokonna lay, an hin ɦasi gira kay yara asi laɗ u anda lay.

⁹ Asi hin li ni a gogor guun ma ɗuf wilina, ni semma tiira, ni dlara eg sana jivi mayra tak ki maŋ njaf suuna kay ndaŋgara halaŋ ana an ɦal tlesuu jivina maŋ Yuda u Israel ɦay lay. Asi hin mbuɗ ki ndaana ko tlesuu jivi suu an ɦasisinana lay, begera an ɦasira ŋgol cocora lay.

¹⁰ Na ɗaŋŋi Yawe ɓak anaba, hu li ma agi ɓak kam ana ni didiŋga jona suuna ka huɗi lay, mburina ka huɗi layra, hu ɦoŋzi ma Yudana, hu voɗta hahawra Yerusalem ta suuna ka tuɗ huruɗ oloɗi lay, suu kaki huna u mburina lay, asi hin hum olo,

¹¹ della yi kolo u furira, luu ma jivina lay, gi soolla u furira ko ndal suu ɗum tasi wilina na lay, ko ndal suu mbay u ɓivunna u furira hu Ziŋ Yawera di ana, «Ŋgaagi Yawe ma Saɓakŋa Kom Belna kay ana nam jiviya, ɗegee mamba ni a fafaɗta.» Gasi an hin hoŋ mbas ndaɗta kolo balamaɗu. Ndaɗ hin hoŋŋi hu balamaɗ ma jewna. Yawe di na.

¹² Na ɗaŋŋi Yawe, ma Saɓakŋa Kom Belna, ɓak anaba, hu li namma didiŋga jona suuna ka huɗi lay, mburina kaɗi layra, hu ɦoŋzi namma halaŋ kaana hin hoŋ balamam gira, ma suu taa yoorina hin tok timigii masisina ay asi koɗ tasi huna.

¹³ Hu ɦoŋzi ma kay ɦinirana, hu ɦoŋzi ma hu mbassa kaŋga ura, hu mbassa Negebpa, hu mbassa ŋguy kay Yerusalemba hu mbassa vi Benjaminda. Hu ɦoŋzi ma vi Yudana, timigiina hin hoŋ ay balamasi, hin ulul fok sa ma hin ndumusina. Yawe di na.

David fi saɓakŋa hu mul mamba

¹⁴ Buuna ka mbaa, Yawe di ana nam hin li dlara nam vi vunum kaɗ a suu Israelna u suu Yudana may.

¹⁵ Hu coki ndaɗta hu li namma gaw may ni, an hin wul gogor gu ma ɗegee ma vi Davidna, ma hin njun kay ma ɗegeena u jivira hu mbassa.

¹⁶ Hu buu namma ni Yuda hin suɗ ki may, Yerusalem hin kak u heɓpa may. Gola ni seɗ ma suuna hin yaɗ u namma, «Yawe ni jivi maygira».

¹⁷ Na ɗaŋŋi Yawe ɓak anaba hu njafna vi Davidna sa hin ka hin bay kak kay mulla fok suu Israelnaɗi.

¹⁸ Duk njaf muli suu li ɓivunna suu vi Levina sa hin ka hin bay col fokon a takan tlesuu ɓivunnaɗi, ŋgala tlesuu ɓivunna ŋgalam kinaɗi lay, li ɓivunna hu buuna tew tew lay.

Galamba dindinda

¹⁹ Yawe ɓak Jeremi ana,

²⁰ Na ɗaŋŋi Yawe ɓak anaba, lini agi ndak a ɓeŋen galam manda ki faali wa lay, njeŋge wa lay ni, a faalira u njeŋgera ka li ko asi li ay jewra naɗi ni.

²¹ Na ɗaŋŋi galam manda u saan ma sunda Davidta hin ɓeŋ ki may. Suu hu njafamma sa hin ka ti mulla balamam oloɗi. Dla ndaɗta hin li u muli suu li ɓivun, suu hu njaf Levina, suu ŋgolo man suu sunda ni na may.

²² Asgaari suu huulonana sa ka wasi ndumusiɗi, ŋgetl ma fun lum ma ŋgolna na sa ka wam ndumumbi lay, an hin zul njaf suu vi saan ma sunda Davidna u suu vi Levina, suu ŋgolo man suu sunda ni na lay.

²³ Yawe ɓak Jeremi ana,

²⁴ Suu asina ka saara, aŋ wi lay ana Yawe noy njaf suu mba' suu nam ŋgaɓasina kiyo. Na ni asi hin noyon suu mansina ki kay ana asi ka suu masisina oloɗi su?

²⁵ Doliɗini Yawe ɓak ana, An sa vi galamba u agi faali lay, njeŋge layna, gi ii tlena kolo huulona lay kaŋga kay ndaŋgara layna.

²⁶ Na ni an hin noy njaf ma vi Yakobma u ma vi saan ma sunda Davidna ki su? Na ni an hin hin bay man mulina hu njafam maŋ njafna vi Abrahamma, Isaak u Yakobma su? Ka naɗi. An hin hoŋosi balamasiya kay ana an wasi hahawasiya.