JEREMI 32 - Boy Lonana

Jeremi hoŋ sene ma vi Bum mbanana gussa

¹ Yawe ɓak boy mamma maŋ Jeremi hu bassara vi mulna Sedesiyas ma Yudana ta doogora. Ni Nabukodonosor basadam ki doogo yam kalvandi hu mulla.

² Hu coki ndaɗta ni suu duu suu vi mul ma Babilonna ŋguy ki kay Yerusalem. Na ɗaŋŋi sa jok vun Lona, Jeremi, asi dukum ki hu zira suu asgaana goloɗ uɗ hu ziŋ mul ma Yudana.

³ Sedesiyas mul ma Yudana dukum kalafi hu zira, joɓom ana, «Aŋ ɓak dla ndaɗta na ni kay mege? Gola ni dlara Yawe daɗta. An hin ɦal ɦoŋzi namma ki ko mul ma Babilonna. Nam hin tlam kiyo.

⁴ Sedesiyas mul ma Yudana hin ka suɗ ki ko saɓak suu Kaldenaɗi. Na may mul ma Babilonna hin vamu, nam hin ɓakŋi sa ka kal dukgi. Nam hin wi dla ndaɗta ni u irimu.

⁵ Sa saɓakŋa hin tuɗ Sedesiyas ki Babilon, nam hin kak hu li namma ta ta hu buu ma an hin golomma tuwa. Yawe di na. Lini agi hal a col eŋga fok suu Kaldena ni agi hin ka ndak a li vaɗi.»

⁶ Gola ni dlara Jeremi daɗta, Yawe ɓakan boy mamma ko wanda na,

⁷ «Goŋ buŋ mbana Sallumma, Hanameel, hin mbay daŋ ana, gusun sene man ma Anatotna kay aŋŋi sa voɗom hin ki maŋ a hoŋom gussana.»

⁸ Ko Yawe dira na ni, Hanameel, ma goŋ bun mbanana, mbay egen hu taraŋ mayra an goloɗta dan ana, «Gusun sene man ma Anatotna, hu mbassa vi Benjaminda, kay voɗta li dla ndaɗta hinni maŋu, voɗta hoŋom ay gussara lay, li dla ndaɗta kiyo.» Na ɗaŋŋi an wi ana dla ndaɗta ni boy ma vi Yawena.

⁹ An gus sene ma vi Hanameel ma goŋ bun mbanana ɗaŋ. Sene namma ni hu Anatot. An hin gusum u gursu siklena doogo yam kiɗisiya.

¹⁰ Ami vami vunumi kay boy namma an hin tin kon kam fok suu an yasi ayna. An hin ŋgaam gusum hu va ma tli nekka.

¹¹ An hin fi voɗta gussa, boy ma vunna ki kam viina. Gaɗta vunna vi kaɗta. Magaa ndaɗta ki maliya.

¹² An hin ɦal magaara gus ndaɗta maŋ Baruk ma goŋ Neriyana goŋ Maaseyana, fok Hanameel goŋ bun mbanana, fok suu tin kosi hu magaa ndaɗta gussana, fok suu Yudana halaŋ suu ay hu taraŋgana.

¹³ Fokosi na gaw ni an ɦal gaɗta maŋ Baruk ana,

¹⁴ «Na ɗaŋŋi Yawe, ma Saɓakŋa Kom Belna, Lona vi suu Israelna ɓak anaba, vi magaa ndaɗta, magaara gussa ta suuna tin kosi huruɗta, magaara ki mali wanda. Cukusi hu doyra ki giira a asi kak tatara.

¹⁵ Na ɗaŋŋi Yawe, ma Saɓakŋa Kom Belna, Lona vi suu Israelna, ɓak anaba, hu mbas ndaɗta suuna hin gus ziginina olo, senena, sene ŋgusugina lay.»

¹⁶ Ŋgoo dagan hu li ma an ɦal magaara gussa maŋ Baruk ma goŋ Neriyana, an cen Yawe dam ana,

¹⁷ «Bu Suuna Yawe, aŋŋi sa li huulona u ndaŋgara lay u saɓak maŋ ma ŋgolnana. Aŋ ɦal saɓak maŋŋa kiyo, va ka kaŋ loɓbi.

¹⁸ Aŋ sa li oora kay njaf suuna bubma, may aŋ hin warak suluk ma vi somoyoŋ gorrana ki kay goryosiya, Lo ma ŋgolna, ma saɓakŋa ma duuna. Yawe, ma Saɓakŋa Kom Belna, ni semu.

¹⁹ Sa gaɗ suuna ma jivi ɦayna sa ma li dlara ŋgolora ɦayna, iriŋ ka tini kay gegelay a golom tuɗ mamba, aŋ hin ka ɓakŋa kay gegelay ni u tuɗ mamba, ni u sun mamba nam laɗta.

²⁰ Ay hu mbassa Egiptera, aŋ tak taŋ ki ni u dlara mbuɗ mbuɗta ta dlaaɗta ndaɗ min a daɗta ka cecemmi dukuygi lay, aŋ tin seŋ ki kay Israel lay hu duliyara lay. Dla ndaɗta aygi ka waɗ karam tu lay.

²¹ Aŋ cuk suu maŋ suu Israelna ay ki hu mbassa Egiptera tak taŋ ki irisi u dlara mbuɗ mbuɗta gasira u saɓak koŋu aŋ ɦal saɓak maŋŋa ki ŋgol cocoo, mbuɗ suuna ndaana.

²² Aŋ ɦasi mbas mayra aŋ suu taŋ ki kaɗ haɗ ki maŋ somoyosira, mbas mayra mbiira u mbul yumma ɓaɗ hura.

²³ Asi tuɗ hu mbas ndaɗta hin kak huruɗu. Na may asi humuŋ deleŋ kaɗi lay, gaɗ maŋga lay. Asi tuɗ ka uɗɗi. Asi min ka a li dlara aŋ dasi ana asi laɗuraɗi halaŋ. Ni kay ndaɗta aŋ mbaasi dla cora ay kasi halaŋŋi na.

²⁴ «Sunda ŋgolora ka mba eg ɦoŋzina tok, dik u suuna kolo u ŋgewna mayra hin ci suuna lay, tuguɗii bora lay. Ҥoŋzi namma mariyaɗ ni hin hin tam maŋ suu duu suu Kaldenaɗi su? Dlara aŋ daɗta mba wa. Aŋ may ni gol ni u iriŋ ɦawaa.

²⁵ Aŋŋi sa danna, Bu Suuna Yawe, ana an gus senena warakam begera kiyo, yi suuna ay duku. Na ɗaŋŋi ɦoŋzina hin ɦal tam ki maŋ suu Kalde suu duuna.»

²⁶ Na ɗaŋŋi Yawe ɓak boy mamma maŋ Jeremi ana,

²⁷ «An, Yawe, ni Lona vi suuna halaŋ, na ni dlara hin li kan loɓma ka su?

²⁸ Na ɗaŋŋi, Yawe ɓak anaba, an hin ɦal ɦoŋzi namma ki maŋ suu Kaldena, maŋ Nabukodonosor, mul ma Babilonna may. Nam hin tlamu.

²⁹ Suu Kalde suu ŋguy yam ɦoŋzi namma kina hin kal hurumu. Asi hin cuk kura kay ɦoŋzi namma. Asi hin ŋgalam ki u zigini suu ŋgalasi ɓivunna kolo kasi maŋ Baalna u sum ma maŋ loogi suu daŋŋa a ɓivunnana.

³⁰ «Gasi, ay hu gorosi day ni suu Israelna u suu Yudana li ni dlara an ka miniɗɗira. Suu Israelna ɓeŋen hurun ki u dlara asi laɗta.

³¹ Ҥoŋzi namma mbuɗun ki yara ay hu umba tin ayra na day ta ta karami. An ndak a zuɗusi ha ki egenu.

³² Ni kay dla cora suu Israelna u suu Yudana laɗta. Asi ɓeŋen hurun kiyo. Asi lay, muli masisina lay, suu masi suu ŋgolona lay, muli suu li ɓivunna lay, suu masi suu jok vun Lona lay, suu vi Yudana, suu Yerusalemma lay.

³³ Asi ɦan zagaɗasiya, ka ɦan hurusiɗi, an haɗasi na tew tew lay ni asi ka humunɗi, ka van haɗ manda kasiɗi lay.

³⁴ Asi cuk zozot masira ni hu zi mayra sen ka yi huruɗta, na ɗaŋŋi asi mbuɗuɗ ki njenjera.

³⁵ Asi min otel ma li ɓivunna maŋ Baalna ki hu huɗugumba Ben-Hinnomba a hin ŋgaɗ goryosi suu njufiina u gorɓiina ki maŋ Molek, ŋgalasi ki duk kura, dla ndaɗta aŋ joɓoɗ kaɗi, saara nara ka kan a li dla cora ko wanda na a viɗ Yuda kiɗi.»

³⁶ Na ɗaŋŋi cecem wanda, Yawe, Lona vi suu Israelna, ɓak kay ɦoŋzi ma di kam ana ɦam ki maŋ mul ma Babilonna a ci suu hurumma ki u ŋgewna, casi ki u mayra u tuguɗii bora layna ana,

³⁷ «An hin tokosi ay eg tasi ay hu mbassa an njayasi ha ki hura halaŋ halaŋ u yaandana u hurun ma ɓeŋi cocona lay. An hoŋosi ay hu li namma an hin kakasi hu u heɓpa a fafaɗta.

³⁸ Asi mbuɗ ki ni suu mansina, an hin li ni a Loosina may.

³⁹ An ɦasi saara dewra u voɗta dewra lay. Hin mbuɗusi a asi van vunun tew tew kay jivi masira kay jivira vi goryosi ka balamasira lay.

⁴⁰ An vi galamba u asi ni a fafaɗta. An hin ka seŋ ɦalla ɦasi tlesuu jivina dukgi, an min ana asi ŋgaanni u hurusi ma kurufu dayna, ka ɦuɗ tasi ki egen day oloɗi.

⁴¹ Furi manda hin li ni kay ɦalla ɦasi tlesuu jivinara. Gasi, an hin kakasi hu mbas ndaɗta. An hin li dla ndaɗta ni u hurun halaŋ u tanda halaŋ lay.»

⁴² Gasi Yawe ɓak anaba, «Ko an mba dla cora ay kay suu asina na, an hin mbaasi dlara jivira ay kasi ni ko ndaɗta na may.

⁴³ Suuna hin gus senena hu mbas mayra agi di kaɗ ana ni li ma hahawrara, li namma suu hurumma u mburina halaŋ suu Kaldena casi kiyo.

⁴⁴ Suuna hin gus senena ŋgaam gusumu. Asi hin ɓii magaara gussa. Asi hin tin kosi huruɗ fok suuna hu mbassa vi Benjaminda, hu ɦoŋzi ma ŋguy kay Yerusalemma, hu ɦoŋzi ma Yudana, hu ɦoŋzi ma kay ɦinirana, hu ɦoŋzi ma hu Negebma, kay ana an hin hoŋosi ki balamasiya.» Yawe di na.