JEREMI 31 - Boy Lonana

Israel hoŋoɗ kakka hu mbas masira

¹ Hu coki ndaɗta Yawe di ana, an hin li ni a Lona vi suu Israelna halaŋ, asi may ni hin mbuɗ ki ni suu mansina.

² Na ɗaŋŋi Yawe ɓak anaba, ay hu fulla suuna suɗ ay ki ko sin ŋgewra hin fi jivi manda. Israel hin hoŋ ki goowayra balamaɗu.

³ Ay ki day ni Yawe tak tam irinu, dan ana an miniŋ ni a fafaɗta, olo ni u ɗegee maŋga an yaŋ ay egenu.

⁴ An min a hoŋok minda ki daŋgatla. Ndak hin min kiyo, goo wayra Israel. Ndak hin hoŋ dadari makŋa kolo daŋgatla. Ndak hin ŋguy suuna hu li ma luuna.

⁵ Ndak hin pi ŋgusugina kolo kay ɦinira Samarira daŋgatla. Suu pi ŋgusugina na hin duɗusi vuɗusiya.

⁶ Buu ma suu gol yamba hin yi kolo kay ɦinira Efrayimba ana, coloygi kolo, tuɗuygi, Siyon, eg Yawe, Looyginana ki ŋgaya.

Bu Suuna hoŋ suu mamsina ay Siyon

⁷ Na ɗaŋŋi Yawe ɓak anaba, lagi furira u Yakob, lagi tlesuu ti suu jivina maŋ mul ma vi suunana. Lagi furira, ayagiya, dagi ana, Yawe buɗ suu mamsina ki wa, suu Israel suu usi hinna.

⁸ An hin mbaasi ay ki hu mbassa ii mbayawra, hin tokosi eg tasi hu vun ndaŋgara ma daɓma. Dukusi ni suu dugina ka lay, suu dalira ka lay, boyogi suu wiina ka lay, suu ndak ki a vuɗtana ka lay. Asi hoŋ ay tani suuna bolow cocoo.

⁹ Asi mbay u tiina. Asi yi kolo ana, «Oora.» Ni an zuɗusiya. An tuɗusi hu ɦuɗugum mayra laɓi jivira, hu voɗta dewra ka sesi daɓ eg vaɗi. Gasi an mbuɗ ki ni bu Israel, Efrayimmi goron ma ŋgolna may.

Hahawra mbuɗ ki furira

¹⁰ Njaf suuna humugi boy ma vi Yawena haa. Jokogina ha ki maŋ suu ha ki fun lumma day dayna, dagi ana, sa njay suu Israelna ki keŋ lina fiɗina ka tokosi eg tasiya. Nam ka golosi ko ndal sa taa suuna gol suu mamsinara na.

¹¹ Yawe hoŋ Yakob ay gussa, nam hurum haɗ kamu. Nam buɗum ay ki ko sa saɓak cocona.

¹² Asi ka mbaya. Asi ka gi soolla furira ay kolo kay ɦinira Siyonda. Asi ka sulul ay kay tlesuu jivi suu vi Yawena, kay wana, kay sum veŋŋa, kay mbul ma heɓma, kay yoori suu gorina u suu ŋgolona. Asi hoŋ ki dliɗta ko sene ma mbaɗagira gamma na. Asi hin ka loɓ ki oloɗi.

¹³ Na ɗaŋŋi gorɓiina luu njoŋŋa, li furira, gor zoŋŋina lay, suu maarina lay. An mbuɗusi hahaw masira ki furira. An ɦasi saɓakŋa. An mbuɗ suu hurusi ki ɓeŋina li furira.

¹⁴ An hoɓ muli suu li ɓivunna ki u tliw ma mbulna. Suu mansina hoɓ hayasi ki u tlegeyenu. Yawe di na.

Dlara vinda saara tini kaɗta

¹⁵ Yawe ɓak anaba, della tiina hum ay hu Rama, tii ma yoo tara. Rakel tii ni kay goryoɗu. Ndaɗ ka min a sa heɓeɗ huruɗɗi, kay goryoɗ ki miɗiya.

¹⁶ Yawe ɓak anaba, Na ga della tii ka oloɗi. Ka simi li ii sa oloɗi. Sun makka ndak laɗta fi ni warak maɗna. Yawe di na. Asi mbay ni hu mbassa vi suu babalina.

¹⁷ Dlaakka vinda saara ka tini kaɗ ŋgolla. Yawe di na. Goryok hoŋ ay ni hu mbas masira.

¹⁸ An humma, gasi an humma, Efrayim ka yoo tamu, «Aŋ haɗanu an hin tan aŋ haɗanu ko ndal goo mbutl ma sa ka tin kom egembina na. Aŋ keŋen irin aya, an hin ndak hoŋ ay may. Kay ana aŋ Yawe aŋŋi Loonna.

¹⁹ Hu li ma an gijaŋ hoŋ ay wa ni, an hinni tok a hom kay coonda. Hu li ma an ka wi tan tok eg buu mannana, an ci ŋgaf gudiginu. Zolona u hahawra hin tok kanu. An ay hu zoŋga ni va ma daɓ semma, an vi dla co ndaɗta kanu.»

²⁰ Efrayimmi goron ma an minim ɦayna su? Ni goo ma li dlara hurun vaɗta su? Tew tew hu li ma an ɓakŋa ni, an hin yam sem olo. Hurun minim cocoo. An saa kam ɦay. An minimu, gasi an minimu. Yawe di na.

Hoŋ aya Israel

²¹ Njaa gogoyra keŋ voɗ makka, pi pikkina. Gol voɗta ndak tlaɗta jiviya, hoŋ aya, goo wayra Israel. Hoŋ ay tani hu ɦoŋzi makŋa.

²² Ni saba na ga ndak hin li ha ki colira keŋ tu na wan ge, go tamara li dla cora. Yawe li dlara wilira kay ndaŋgara. Cara min hu zina ki maŋ sa njufna.

Yuda hoŋ kolo balamaɗwa

²³ Yawe, ma Saɓakŋa Kom Belna, Lona vi suu Israelna, ɓak anaba, hu li ma an hoŋosi ay wa ni asi hin ɓak boy namma hu mbassa Yudara u ɦoŋziimma halaŋ, «Ko Yawe paɗ vunum ki kaku, li ma jivina, ɦinira teteɗta.»

²⁴ Yuda u ɦoŋziimma hin kak ko tasiya, suu horokŋa u suu taa yoorina.

²⁵ An laɓ vun suu laara mbuɗusi ki maŋiina, an hin mbuɗ suu maŋiina ki saɓak lay.

²⁶ Kay boy namma an ka jejege humma, sen ma an buurumma egen jivi ɦay.

Lo ma saɓakŋa, min tlena min pi tlena lay

²⁷ Buuna ka mbaa, Yawe di na, ma an hin zaa njaf suu Israelna u suu Yudana ki a njaf suu warna, njaf mburina lay.

²⁸ Na ɗaŋŋi an hin golosi usi a minisira, a pasira lay ko ndal an golosi usi ay hu li ma an paɗasi sariyasi ki lay, pukusi ki kaŋga layna na. A palayasi ki lay, bulumusi ki lay, a lasi dla cora, Yawe di na.

²⁹ Hu buu namma ni asi hin ka di olo ana, «Somoyosi ti ni ii wa ma bay ndakka, goryosi siisi cim ki ni na,» ɗi.

³⁰ Ka naɗi. Gegelay miɗ ni kay suluk mamma. Li ni sana ti ii wa ma bay ndakka ni, siim hin cim ki ni namu.

Galamba Wilira

³¹ Buuna ka mbaa, Yawe di na, ma an hin vi vunun u suu Israelna u suu Yudana vi galamba wilira.

³² Ndaɗ hin li ki zeɗ u mayra an vaɗ u somoyosi hu li ma an vasi kosi a kalasi ay ki hu mbassa Egiptera. Asi may ni ɓeŋen galam manda kiyo. An may ni ka ni malaŋ zina varasiya. Yawe di na.

³³ Gola ni galamba an hin vaɗ u suu Israelna ŋgoo dagan wanda. Yawe di na. An hin ɦasi gaɗ manda hurusi kurufuwa, ɓiiriɗ ki egesi lay, an hin li ni a Loosina, asi hin mbuɗ ki ni suu mansina may.

³⁴ Asi hin ka haɗ tasi u banayasina oloɗi, duk tasira wayaraɗi lay, ka hoŋoɗ ndumba ana, «Halagi yal ma wi Yawena», kay ana asi hin wan ki halaŋ halaŋ, kem gorira u suu ŋgolona. Yawe di na. An bulumusi dla coosira kiyo, suluk masina, an hin ka ɓak kasi oloɗi.

Gaɗta hu duliyara u ɗegeera vi Lonara

³⁵ Yawe ma tin faɗta a ɓo lina faalina, tilna u ciciwra u gaɗ masira kay a ɓo lina njeŋgera, ma pereɗ mbo lum ma ŋgolna irim kolona, ni bil mbo lum ma ŋgolna, ɓak ana, «Yawe, ma Saɓakŋa Kom Belna ni senu.»

³⁶ Lini an viɗ golla gol gaɗtara ki wa ni, Yawe di ana, na ɗaŋŋi njaf suu Israelna may ni hin ka li a njaf suuna fokonɗi.

³⁷ Na ɗaŋŋi Yawe ɓak anaba, Lini asi tew a ŋga huulona ma kolona, ŋga u ndaŋgara ma tin ay kaŋgana ki may ni, an may ni hin ndak a hin njaf suu Israelna ki kay dlara asi laɗta halaŋ. Yawe di na.

Yerusalem ta wilira

³⁸ Buuna ka mbaa, Yawe di na, ma ɦoŋzina hin hoŋom ki minda maŋ Yawe, col ay kay gulumun ma Hananeelna ta ta tew ki eg vun zira keŋga.

³⁹ Ay fokoɗ na gay ni asi hin waɗ zew ma ŋgara ay kolo kay ɦinira Garabpa.

⁴⁰ Ҥuɗugumba maɗ suuna huruɗ u buɗna lay, li ma u fiyek ɦuɗugumba col ay Sedron day tew eg vun zira kulumina u faɗ maɗiira. Tle asina halaŋŋi hin ki ni maŋ Yawe. Sa hin ka paɗasi kiɗi, ka hawaɗasi kiɗi a fafaɗta.