JEREMI 30 - Boy Lonana

Hu cokira tiitara u fira buɗ kira

¹ Yawe ɓak boy mamma maŋ Jeremi ko wanda na,

² «Na ɗaŋŋi Yawe, Lona vi suu Israelna, ɓak anaba, ɓii boy ma an ɓakaŋŋa hana kaŋga hu magaara.

³ Buuna hin mbaa, Yawe di na, an hin hoŋ suu man suu Israelna u suu Yudana aya. Yawe di na. An hin hoŋosi ay hu mbas mayra an ɦaɗ ki maŋ somoyosira. Asi hin tlaɗ a jona.»

⁴ Gola ni dlara Yawe ɓakaɗ kay suu Israelna u suu Yudana.

⁵ Yawe ɓak anaba, aygi hum tii ma hahawra. Ni dlara ndaana. Va jivi ka oloɗi.

⁶ Halagi u boyna ki jiviya, gologiya, njufiina hin vuɗ gorra su? An gol wanni gegelay ma saɓakŋa ɦayna kom cuki kay hayam ko ndal cara kak a vuɗta na. Irisi mbuɗ ki na zeɗ hahaw coco lay.

⁷ Ni dla co me ɗaŋge? Gasi buu namma ŋgol cocoo, buu ma tli tam u nam kaɗi. Ni buu ma hahawra kay Yakob. Na may nam hin buɗ kiyo.

⁸ Hu buu namma ni, Yawe, ma Saɓakŋa Kom Belna, di ana, an hin kusum mbal ma kelemma kiyo. An hin tlamma ki kelemu. An hin jaam gali ma semma kiyo. Nam hin ka loɓ tam u sunda fok suu daŋŋa oloɗi.

⁹ Asi hin sunni Yawe, Loosina u David mul ma an hin tinim kasina.

Ɗagka u Cilla

¹⁰ Aŋ saan ma sunda, Yakob, li ndaaɗi. Di na ni Yawe. Hin tok a asi kak ki Israel. An hin buɗuk ay ki hu mbassa dayra, njafak lay hu ndaŋgara agi ay ki ŋgayra huruɗta. Yakob hoŋ aya, nam fi saɓakŋa wa, nam ki kaki na en, sa mbuɗum ndaa ka oloɗi.

¹¹ An ka u aŋ a buɗuŋ kira. Di na ni Yawe. An hin ci njaf suu an njayagi ha ki dukusina ki halaŋ. Na may aŋ wani an ka caŋ kiɗi. An haɗaŋŋi a aŋ hum u gaɗta ka hin ta jak kiɗi.

¹² Yawe ɓak anaba, dlara aŋ daɗta sa ka mbuɗuɗ ki zeɗɗi. Mbil ma aŋ kaamma ka cilɗi.

¹³ Sa ka njun kaŋgi, mbil ma aŋ kaamma kumu ma kam kaɗi.

¹⁴ Suu banayaŋŋa halaŋ maaraŋ kiyo. Humusi ka gasi kaŋ oloɗi. An caŋ poŋga ko ndal poŋ sa babalira na. Ni haɗta eŋ cocora kay maɗ ma aŋ cam bolowna kay dla cora aŋ laɗ ka seŋ dukgi layra.

¹⁵ Aŋ gurni duk dla cooŋga wanni mbil maŋŋa ka cil kiɗi. Ni kay maɗ ma aŋ cam bolowna kay dla cora aŋ laɗ ka seŋ dukgi layra. An mbaaŋ dla ndaɗta ay kaŋŋi na.

¹⁶ Na ɗaŋŋi suu caŋ kina hin casi ki may. Suu babali maŋsina halaŋ dukusi sa ka hin kiɗi, hin tuɗ ki ŋgayra. Suu ɦurumuŋŋa hin ɦurumusi ki may. Suu ɦurumuŋŋa halaŋ an hin suuna ɦurumusi ki may.

¹⁷ Aŋ may ni an hin mbuɗuŋ ki mariyaɗ, an hin ciliŋ mbiliŋ kiyo. Di na ni Yawe. Kay asi yaŋ semma kaŋ ana, «Va ma jivi ka huɗi, Siyon mayra sa humum ka gam kaɗɗira.»

Suu vi Lonana hoŋ balamasiya

¹⁸ Na ɗaŋŋi Yawe ɓak anaba, an hin hoŋ mbutluɓma vi Yakobma kolo balamamu. An hin wi hahaw suu hu ɦoŋzi nammana. Ҥoŋzi managelay ni minim ki kolo kay ɦini mamba. Zira jivi taragelay hin fi liiɗ ma jewna.

¹⁹ Suuna hin gi deɓpa ŋgol cocoo, vun sunna hin soo a li luuna. An hin mbuɗusi ki bolowo, asi hin ka hoŋ ki kaŋga oloɗi. An ɦasi saɓakŋa wa.

²⁰ Goryom fi jivi masira jewra wa. Suu mamsina tok ki fokon eg tasi ŋgol wa. An lasasi suu babali masisina.

²¹ Mul mamma hin li ni dukugiya. Sa hin tuɗ fokogina hin vuɗ ni varamu. An ɦam voɗta nam mbaya, nam ɦuɗ tam ay egenu. Sa hin ka min a ɦuɗ tam ay egenɗina ni gege? Di na ni Yawe.

²² Agi hin mbuɗ ki ni suu mansina. An hin li ni a Loogina may.

Babaa ma vi Bu Suunana

²³ Babaa ma vi Yawena, yara mba wa, semeɗ ma ŋgolna hin liya, nam paɗ mbiriwinda kay yam suu dlara vasina.

²⁴ Saɓak yara vi Yawera hin ka heɓbi. Nam hin li dlara nam min a laɗta ki li gi. Agi hin fagi yalna ha fok tuwa.