JEREMI 3 - Boy Lonana

Cara gawlaŋga huruɗ viira

¹ Lini sana dik caamba kiyo, ndaɗ hinim ki tuɗ a kak ki u sa daŋŋa ni, nam ndak a hoŋ egeɗ olo su? Ndaŋga ndaɗta ka ki ni mbuɗi njenje gawɗi su? Ndak may ni li gawlaŋŋa u suuna bolowra ndak hin mbay egenu. Yawe di na.

² Tli irik kolo gol ha hu voɗta. Li ma ndak li gawlaŋ ka hurumbina ka ni wan su? Ndak kak kaŋga keŋ voɗta a juɓusira, ko ndal Arabma hu fullara na. Ndak mbuɗ ndaŋgara ki njenje u dla cookka u boy zoŋ makka wa.

³ Yo lo ma si ŋgolona doorom ki kak wa. Lo ma si ŋgoo daganna ka mba oloɗi. Na may ndak su vunna u yamba eŋga a li gawlaŋŋa ka vi dla cookka kakgi.

⁴ Olo, cecem wanda na ni ndak ka yan ana, «Bunu, aŋ ma minin ay u gooron daynaɗi su?»

⁵ Nam ka coli u saɓak mamma tu su? Nam ka u yara hurum tu na gak gak su? Na may hu ɓak ma ndak ɓak nana ndak ka seŋ lira li coraɗi ni ndak hin fi ni jivi tarage.

Israel cara gawlaŋŋa, Yuda cara kaboyna

⁶ Hu cokira vi mulna Josiyasa, Yawe dan ana, aŋ wi dlara Israel ta gawlaŋga laɗta su? Ndaɗ mayra tuɗ ay kolo kay ɦinira fiyekka halaŋga ay kaŋga u ŋgusu ma ɗufina halaŋ a li gawlaŋŋara.

⁷ An joɓ tan ana, lini ndaɗ li dla ndaɗta ay kiwa halaŋŋi ndaɗ hin hoŋ ay egenu. Na may ndaɗ hoŋ ay ka egenɗi. Wayaɗta, Yuda ta kaboyna, waɗ lay.

⁸ An wiya, gasi ni kay boy zoŋga an dik Israel ta cora kiyo, ɦaɗ magaara jokka ki koɗu. Na may wayaɗta, Yuda ta kaboyna, li ndaa ka na ndeɗi. Ndaɗ lay gi taɗ ki gawlaŋŋa.

⁹ U tuɗ maɗta cora feɗta ndaɗ ɓeŋ ndaŋgara ki lay. Ndaɗ li zoŋga u gogoyra lay u guna lay.

¹⁰ Dla ndaɗta li na lay ni, wayaɗta, Yuda ta kaboyna, hoŋ ay egen ka u huruɗɗi. Hom maɗta ni kaboyna. Yawe di na.

Yira yi suu Israel suu mbayawnara

¹¹ Yawe dan ana, eg Yuda ta kaboyna, Israel, ta noy Lona kira, hin ndak mbuɗ ki jivira.

¹² Aŋ tuɗ ɓak boy ma wanna ha ii ko ma mbayawna di ana, hoŋ ay ɗaŋ Israel ta noy Lona kira. Yawe di na. Kak manna dukugina hin ka lagi va oloɗi. Gasi an ɗegee, Yawe di na. An ka col saɓakŋa a fafaɗtaɗi.

¹³ Na may ndak wi cookka. Ni eg Yawe, Lookŋa, ndak mbuɗ yara. Ndak nja kok ki u tuɗta cora kay cee suu daŋŋa u ŋgusu ma ɗufina lay. Agi humun delen kaɗi. Yawe di na.

¹⁴ Hoŋogi aya, goryon suu noyon kina. Yawe di na. Kay an ka a malagina ni anu, an tli dew hu ɦoŋzina, yow mba' hu njafagiya, hoŋogi hu Siyon.

¹⁵ An ɦagi suu taaragina ha u min manda. Asi hin taaragi ni u yal ma wi dlara cocoo.

Tokka ŋgolla Yerusalemba

¹⁶ Hu coki ndaɗta hu li ma asi zul ki bolow coco hu mbassa wa ni, Yawe di ana, sa hin ka di ana, «Zandukka Galamba vi Yawera» oloɗi. Dlaɗ hin ka li kay sa dewɗi lay. Sa hin ka yaɗ seɗɗi lay. Sa hin ka saa ana ndaɗ ka dukuygiɗiraɗi lay. Sa hin ka hoŋoɗ lira oloɗi.

¹⁷ Hu li namma ni asi hin yi Yerusalem ana, «Dlamba mulla vi Yawera.» Njaf suuna halaŋ hin hoŋ irisi ay kaɗu kay sem Yawena ma ɦam ki maŋ Yerusalemma. Asi hin ka su vunna u yasira eŋga kal ki na nderaɗi.

¹⁸ Hu li namma ni suu vi Yudana hin taɓ ki u suu Israelna. Asi col ay hu mbassa mbayawra hin mbay ko tasi dew hu mbassa an ɦaɗ ki maŋ somoyosi a jonara.

Suu viɗ kina hoŋ aya

¹⁹ An ɓak tan ana, an a mbuɗuk ki duk goryon zeɗta ni, an ɦak mbas mayra dlara tak taɗ ki ii suuna ɦayra, ni li ma su ki kay njaf suuna u jivira belna. An hin di ana, agi hin yan ki ana bugiya, agi hin ka noyon ki oloɗi.

²⁰ Na gasi daŋ may ko ndal cara kaboyna eg njufuɗ, poy u tasira na, agi kaan gii boyna egenu, suu Israelna. Yawe dina.

²¹ Tiina hin col kolo ŋgolla hu voɗta halaŋ halaŋ. Yira hahawra vi suu Israelna kay asi tli voɗta cora kosi, maa Yawe, Loosina kiyo.

²² Hoŋogi aya, goryon suu noyon kina. An hin garaɗagi tuguɗi magira ki a fafaɗta. Ami wana, ami ni varaŋu. Gasi ni aŋ, Yawe, Loomina.

²³ Gasi daŋ may tlesuu col ay kolo kay ɦinirana ki coo. Asi li kolo kay ɦinira ni vunna ɦawaa. Gasi daŋ may ni u Yawe, Loomina, Israel fi suɗta.

²⁴ Na may zolo ma ay kaygi u goora day na taygi sunda vi somoyoygira kiyo, yoori masi suu gorina u suu ŋgolona lay, goryosi suu njufiina u gorɓiina lay.

²⁵ Kakaygi kaŋga u zolo maygina. Nam su ki kaya. Gasi daŋ may aygi li co eg Yawe, Looygina. Somoyoygi lay, aygi lay ay hu goryoygi day ta ta karami aygi humuygi del Yawe, Looygina, kaɗi.