JEREMI 29 - Boy Lonana

Magaara Jeremi ɓiiriɗ maŋ suu yowosi ki mbaɓura jewna

¹ Gola ni boy ma sa jok vun Lona, Jeremi, ɓiirim ay hu magaara sunuɗ ay Yerusalem maŋ suu basina halaŋ duk suu yowosi mbaɓurana, muli suu li ɓivunna lay, maŋ suu jok vun Lona u suuna halaŋ halaŋ, suu Nabukodonosor yowosi hu Yerusalem tuɗusi mbaɓura Babilonna.

² Ŋgoo dagan hu li ma mulna Yekoniya, su mulnara, sa ŋgol ma hu taraŋgana, suu ŋgolo suu sunda suu Yudana u suu Yerusalemma, suu wi yal min tlena, suu ŋgolo suu duuna tuɗ ki hin Yerusalem.

³ Nam hin ɦaɗ maŋ Elassa ma goŋ Safanna, maŋ Gemariya ma goŋ Hilkiyana, ma Sedesiyas ma mul ma Yudana sunum eg Nabukodonosor mul ma Babilonna hu Babilon.

⁴ Na ɗaŋŋi Yawe, ma Saɓakŋa Kom Belna, Lona vi suu Israelna, ɓak suu may suu nam yowosi Yerusalem tuɗusi mbaɓura ki Babilonna halaŋ anaba,

⁵ Minigi ziginina kakagi hurusiya, vagi senena, pagi tlena tagisina vuɗusiya.

⁶ Ɗumugi boyogina, vuɗugi gor njufiina u gorɓiina. Minigi tagi a ɗum boyogina maŋ goryogiya, a ɦagi gorɓii magisina ki zi njufna lay a asi vuɗ gor njufiina u gorɓiina may. Zulugi ha tana zuli na ɗow ɗow, hoŋogi ki daganɗi.

⁷ Saaragi kay begera hu ɦoŋzi ma an yowogi ay ki huna, joɓogi Yawe kaɗu. Begera ɦoŋzi namma faɗta ni begera agi hin faɗta may.

⁸ Gasi Yawe, ma Saɓakŋa Kom Belna, Lona vi suu Israelna, ɓak anaba, hinigi dlaagira mbuɗ bisna u suu jok vun Lona suu dukuginaɗi, ɗowba u suu joɓ suu dukuginaɗi. Gologi tagi jivi kay doy mayra dagiraɗi.

⁹ Dlara asi ɓakagira u senda ki ni coo, an sunusi ay kaɗi. Di na ni Yawe.

¹⁰ Na ɗaŋŋi Yawe ɓak anaba, hu li ma basara dok kiɗisiyara jak ki kay Babilon wa ni an hin gologiya, hin tak dla mayra an vi vunun kaɗ a laɗ kay hoŋogi ay hu li nammara.

¹¹ An wi dla mayra an vi vunun kaɗ a lagira egegira. Di na ni Yawe. Ni vi vun ma ɦagi begera, ka vi vun ma mbuɗugi hahawɗi. An hin ɦagi jivira, agi hin saa kan may.

¹² Agi hin yan senu, hin tuɗugi koyra fiyekka, agi hin joɓongiya an hin humugi may.

¹³ Agi hin halanu, hin fan may. Agi hin halanni huurugi tagira kurufuwa.

¹⁴ Agi hin fan may. Di na ni Yawe. An hin hoŋogi balamagiya, an hin tokogi eg tagi u njafagi bel, ay hu li ma an njayagi ay ki huna bel may. Di na ni Yawe. An hin hoŋogi hu li ma an yowogi ay huna may.

¹⁵ Lini agi di ana, Yawe ɦami suu jok vun Lona ay hu Babilon...

¹⁶ Gola ni dlara Yawe daɗ maŋ mul ma ka balam Davidna u suu ka hu ɦoŋzi nammana halaŋ, gorsegi suu tuɗ ka ugi mbaɓuraɗina lay.

¹⁷ Na ɗaŋŋi Yawe, ma Saɓakŋa Kom Belna ɓak anaba, an hin cukusi ŋgewra, mayra u tuguɗi bora kasiya. An hin lasasi ko ndal tulum ma ki loɗina sa ka tam oloɗina na.

¹⁸ An hin ciɗisi usi u ŋgewra, mayra u tuguɗi bora. An hin mbuɗusi ki va takka maŋ suuna a asi ɓakaɗ tew tew li ndaana may. Ni dlara hahawra suuna hin tii koɗta, kay njaf suu an njayasi kina humusi hin gasi hu li ma asi min a li dla corana.

¹⁹ Ni kay ana asi ka humun boy mannaɗi. Yawe di na. Na ɗaŋŋi an sunusi suu man suu sunda ha tew tew suu jok vun Lona. Na may asi ka humbi. Di na ni Yawe.

²⁰ Agi suu tuɗ ki ŋgayra suu an dikigi ki hu Yerusalem, tuɗugi ki hu Babilonna, humugi boy ma vi Yawena.

²¹ ...Gola ni dlara Yawe, ma Saɓakŋa Kom Belna, Lona vi suu Israelna, daɗ maŋ Ahab ma goŋ Kolayana, maŋ Sedesiyas ma goŋ Maaseyana suu ɓakagi boy ma kaboyna u senna. An hin ɦasi ki ko Nabukodonosor mul ma Babilonna, nam hin casi ki irigiya.

²² Dlaasira hin li ni a dla cora kay suu yowosi ki mbaɓura hu Yuda ha ka hu Babilonna. Asi di gasi ana Yawe lasaŋ ko nam las Sedesiyas u Ahab suu mul ma Babilonna cufusi ku i kura na.

²³ Dla coosira ni ana asi li dlara sa ka laɗɗira duk suu Israelna. Asi ɦal tasi ki a li zoŋga u boyogi suu vi ndaryasina na. Asi ɓak boy ma kaboyna u sen lay, doli ɗaŋŋi an joɓosi va ka kosiɗi lay. An wiya, anni sa vovoɗta kay dla ndaɗta lay. Yawe di na.

Kay Semaya, sa jok vun Lona, ma kaboy ma tuɗ ki ŋgayrana

²⁴ Aŋ di Semaya ma Nehelamma ko wanda na.

²⁵ Na ɗaŋŋi Yawe, ma Saɓakŋa Kom Belna, Lona vi suu Israelna, ɓak anaba, aŋ sun ay kay suu ka Yerusalemma halaŋ, kay mul ma li ɓivunna, Sefaniya ma goŋ Maaseyana, kay muli suu li ɓivunna halaŋ lay, magaara ɓiirira u seŋu.

²⁶ «Yawe tiniŋŋi namu balam mul ma li ɓivunna, Yoyada, ko ndal mul ŋgol ma li ɓivunna hu zira vi Lonara kay suu tuɗ kolo duk ɦawana a aŋ njunusi u galiina kaŋgaa.

²⁷ Aŋ ka ɓak ki kay Jeremi kay boy ma bay umma dukugi naɗi nige.

²⁸ Nam ɓii magaara sunumira ha Babilon, ana agi hin kak Babilon basara bolowo. Minigi ziginina kakagi hurusiya, vagi senena, pagi tlena tagisina vuɗusi may.»

²⁹ Mul ma li ɓivunna, Sefaniya, ndum magaa ndaɗta ki maŋ sa jok vun Lona, Jeremi.

³⁰ Na ɗaŋŋi Yawe ɓak boyna maŋ Jeremi.

³¹ Aŋ sun boy namma ha ki maŋ suu ha ki ŋgayrana halaŋ, «Na ɗaŋŋi Yawe ɓak kay Semaya ma Nehelamma kay ana Semaya ɓakagi dlara ni an sunum ha kaɗi, nam jokogi saaragi kiyo.

³² Na ɗaŋŋi an hin li dla cora eg Semaya ma Nehelamma, eg njafam lay. Sa dukusi dew lay hin ka fi liim duk suuna a hin li furira kay tlesuu jivi suu an hin ɦasi maŋ suu mansina naɗi. Di na ni Yawe. Na ni nam ɓak ka ni dla cora suuna yow duuna u Yaweraɗi su?»