JEREMI 28 - Boy Lonana

Jeremi u sa jok vun Lona, Hananiya

¹ Hu coki ndaɗta Sedesiyas, mul ma Yudana, gijaŋ ti mulla hu basara fiɗira hu til ma vadlna. Sa jok vun Lona, Hananiya, ma goŋ Azurna, hu njafna vi Gabaonna, dam hu Zira vi Yawera fok muli suu li ɓivunna u suuna halaŋ.

² «Na ɗaŋŋi Yawe, ma Saɓakŋa Kom Belna, Lona vi suu Israelna, ɓak anaba, an kus mbal ma nek ma vi mul ma Babilonna ki wa.

³ Tew basara mba ni an hin hoŋ tlesuu sun suu hu zira vi Yawera suu mul ma Babilonna yowosi tuɗusi ha ki Babilonna ay ki hu li namma.

⁴ Na lay an hin hoŋ Yekoniya ma goŋ Joakim mul ma Yudana u suu yowosi ki mbaɓura hu Yuda tuɗusi ki Babilonna halaŋ. Yawe di na. Kay ana an kus mbal ma nek ma vi Mul ma Babilonna ki wa.»

⁵ Sa jok vun Lona, Jeremi, hoŋ dira maŋ sa jok vun Lona, Hananiya, fok muli suu li ɓivunna u suu ka hu Zira vi Yawera halaŋ.

⁶ Sa jok vun Lona, Jeremi, di ana, «Amin, Yawe li ko ndaɗta na. Ko Yawe tak dlara aŋ ɓakaɗta kiyo. Ko nam hoŋ tlesuu sun suu ay Babilonna ay hu zira vi Lonara, suu yowosi ay ki mbaɓurana halaŋ halaŋ.

⁷ Hum boy ma an ɓakam kaŋŋa, kay suuna halaŋ layna.

⁸ Suu jok vun Lona suu li sun masira ki fokon lay, fokoŋ jew day layna, ɓak dlara kay mbassa bolowo kay mulina bolow lay, ɓak kay duuna, kay dla cora, kay tuguɗi bora lay.

⁹ Na may ni lini sa jok vun Lona ɓak kay heɓpa, ni hu li ma dlaamba tak taɗ kina, suuna hin wi ki ana gasi sa jok vun Lona namma sunum ay ni Yawe.»

¹⁰ Na ɗaŋŋi sa jok vun Lona, Hananiya, tli mbal ma nekŋa ki kel Jeremi kusum kiyo.

¹¹ Sa jok vun Lona, Hananiya, di ki fok suuna halaŋ ana, «Yawe ɓak anaba, ni ko ndaɗta na tew basara mba' ni an hin kus mbal ma nek ma vi Nabukodonosor, mul ma Babilonna, kiyo. An hin tlam ki kay njaf suuna halaŋ.» Sa jok vun Lona, Jeremi, tuɗ ni na gaw.

¹² Ŋgoo dagan hu li ma sa jok vun Lona, Hananiya, kus mbal ma ay gii kel sa jok vun Lona, Jeremi, kina, Yawe ɓak boy mamma maŋ Jeremi.

¹³ «Tuɗ di Hananiya, Yawe ɓak anaba, mbal guna aŋ kusum ki wa, aŋ hin li mbal kawina balamamu.

¹⁴ Na ɗaŋŋi Yawe, ma Saɓakŋa Kom Belna, Lona vi suu Israelna, ɓak anaba, ni mbal kawi ma an tinim kay njaf suuna halaŋ a asi sun Nabukodonosor, mul ma Babilonna, asi hin sunumu. Mburi suu bagina lay an ɦamsina kiyo.»

¹⁵ Sa jok vun Lona, Jeremi, di sa jok vun Lona, Hananiya, ana, «Hum haa, Hananiya, Yawe sunuŋ ay kaɗi. Aŋ mbuɗ ana suuna jok saarasiya ni aŋu.

¹⁶ Na ɗaŋŋi, Yawe ɓak anaba, an hin dikiŋ ki kay ndaŋgara. Aŋ hin miɗ ki hu basa ndaɗta kay ana aŋ ɓak boy ma suuna yow duuna u Yawena.»

¹⁷ Sa jok vun Lona, Hananiya, miɗ ki hu basa ndaɗta hu til ma kiɗisiyana.