JEREMI 27 - Boy Lonana

Mbal ma vi mul ma Babilonna

¹ Ay hu li ma Sedesiyas ma goŋ Yosiyasna, mul ma Yudana, gijaŋ ti mulla Yawe ɓak boyna maŋ Jeremi ko wanda na.

² Yawe ɓak anaba, aŋ ceɗ mbalna may dli galina may, aŋ cukum keleŋu.

³ Aŋ sunum maŋ mul ma Edomma, maŋ mul ma Moabma, maŋ mul ma vi suu Amonna, maŋ mul ma Tirna, maŋ mul ma Sidonna ko suu masi suu sunda suu mbay Yerusalem eg Sedesiyas mul ma Yudana.

⁴ Aŋ hin ɦasi boy namma ha kosi u sem malayasina ana, Bu Suuna, ma Saɓakŋa Kom Belna, Lona vi suu Israelna, gola ni dlara agi hin daɗ maŋ maliyaginara.

⁵ Anni sa li ndaŋgara u suu warna layna, li mburi suu kay ndaŋgarana lay, an lasi ni u saɓakanu. An ndak a ɦasi maŋ gegelay ma an minimma.

⁶ Cecem wanda anni sa ɦal mbas ndaɗta ki ko saan ma sunda Nabukodonosor, mul ma Babilonna, mburi suu bagina lay an ɦamsina a asi sunumu.

⁷ Njaf suuna halaŋ hin sunumu, nam tamba lay, goromma lay, gorom ŋgolona lay. Kam nam tamba may ɗaŋŋi lina hin mba kamu, suu bolowna u muli suu saɓakŋa hin lasamu.

⁸ Na ɗaŋŋi njaf suuna u muli suu ka min a sunumbina nam tamba Nabukodonosor, mul ma Babilonna, ka tin delesi kaŋga u mbal ma vi mul ma Babilonnaɗi na, an hin ci suu asina ki u ŋgewra, mayra u tuguɗi bora. Yawe di na ta ta asi ɦoɗ njayra ki konu.

⁹ Agi may ni humugi vun suu jok vun Lo magisinaɗi, suu magi suu dandaɗi lay, suu magi suu joɓpaɗi lay, suu magi suu tin gariraɗi lay, suu magi suu li kumuna suu dagi ana agi hin ka hom yagi kaŋga fok mul ma Babilonnaɗina.

¹⁰ Dlara asi dagirara ki ni coo, asi min a ɦuɗugi ki eg ndaŋga magira day lay. Gasi an hin njayagi kiyo, agi hin miɗ kiyo.

¹¹ Na may ni suu min a tin delesi u mbal ma vi mul ma Babilonna sunum ayna, an hin hinisi na en kay ndaŋgara. Yawe di na. Asi hin horokoɗ yaɗ may, hin kak kaɗ may.

¹² Kay Sedesiyas mul ma Yudana may ni an dam ki u vunun ana, tin delegi u mbal ma vi mul ma Babilonna, sunumu, nam tamba, suu mamsina, agi hin kak iiriya.

¹³ Aŋ u suu maŋsina agi min a cagi tagi ki u ŋgewna, mayra, tuguɗira ko Yawe ɓak ki kay suu ka min a sun mul ma Babilonnaɗina na ni kay mege?

¹⁴ Humugi boy ma suu jok vun Lona dagina ana, agi hin ka sun mul ma Babilonnaɗi naɗi. Boy ma asi dagina namma ki ni coo.

¹⁵ An sunusi ay ka anɗi. Yawe di na. Boy ma asi ɓakagina u senna ki ni coo. Na ɗaŋŋi an hin njayagi ki may, cagi ki may. Agi u suu jok vun Lona suu dagi boy nammana.

¹⁶ Maŋ muli suu li ɓivunna u suuna halaŋ an ɓak ana, Yawe ɓak ana, humugi boy ma suu jok vun Lona suu dagi ana tlege suu li sunda hu Zira vi Yawera hin hoŋosi yowra ay ki hu Babilonna cecem ka gi buuɗinaɗi. Boy ma asi dagina namma ki ni coo.

¹⁷ Humugisina vunusiɗi. Lagi sunda maŋ mul ma Babilonna agi hin kak iiriya. Ni kay me ana ɦoŋzi namma mbuɗ ki jona na mbee nige?

¹⁸ Asi lini suu jok vun Lona asi li ka u boy ma vi Yawena kosiya ni asi vi tasi eg Yawe, ma Saɓakŋa kom Belna, ka tlesuu sunda suu ka hu zira vi Lonara, hu taraŋgana, hu Yerusalemma ka asi yowosi ki Babilonɗi.

¹⁹ Ko ndaɗta na Yawe, ma Saɓakŋa Kom Belna, ɓak kay mbal walakka fun Ziŋ Lonara u mbo lumma ŋgolna, kay doroŋ ma lagaɗam lagaɗina, kay tlesuu sun suu daŋ suu hin ka hu ɦoŋzi nammana halaŋ halaŋ.

²⁰ Kay tlesuu Nabukodonosor mul ma Babilonna yowosi ka ki Yerusalem tuɗusi ki Babilonɗina. Yekoniya goŋ Joakim ma mul ma Yudana. Ko tam u suu ŋgolo suu Yudana u suu Yerusalemma.

²¹ Gasi, gola ni dlara Yawe, ma Saɓakŋa Kom Belna, Lona vi suu Israelna, ɓak kay tlesuu sun suu hin hu zira vi Lonara, hu taraŋga, hu Yerusalem mayna.

²² Asi hin yowosi tuɗusi ki Babilon. Asi hin kak ha hu li namma ta ta hu buu ma an hin yowosi ay kina. Yawe di na. Na ɗaŋŋi an hin ɦoŋosi ay asi hin mbay hu li namma.