JEREMI 26 - Boy Lonana

Dira vi lona kay suɗta vi suu Israelna u suu yudana u iirira vi Jeremi

¹ Hu cokira Joakim, ma goŋ Josiyasna, mul ma Yudana gijaŋ ti mulla, Yawe mbay eg Jeremi dam ana,

² Yawe ɓak anaba, aŋ col fun Zira vi Yawera ɓak suu hu ɦoŋzi ma Yudana suu mbay goɓ kaŋga hu Zira vi Yawerana halaŋ, dasi boy ma an daŋŋa ha masina ki halaŋ hin maa kiɗi.

³ Asi li hin hum kala, li hin hom ki kay dlaasira cora kay dla cora asi laɗta kala, an hin doorosi dla cora an tinisira kasi ginda ki kala kay dla cora asi laɗta.

⁴ Aŋ hin dasi ana, Yawe ɓak anaba, lini agi ka tin humugi a hum dlara an daɗta a tuɗ unɗi ni,

⁵ Lini agi ka hum boy ma suu man suu jokon vununna dammaɗi, suu an sunusi ha egegi tew tewnaɗi, ka humugiɗi lay ni.

⁶ Na ɗaŋŋi an hin li dla cora eg zi namma ko an laɗ eg Silora na, hin mbuɗ ɦoŋzi namma ki ni zi ma suuna hin ɓak kam duk suu an gasi vunna kay ndaŋgara duk njaf suuna halaŋ halaŋŋa.

⁷ Muli suu li ɓivunna, suu jok vun Lona u suuna halaŋ hum vun Jeremi hu li ma nam ɓak boy namma hu Zira vi Yawera.

⁸ Hu li ma Jeremi daɓ boy ma Yawe sunum ay kam a dam maŋ suuna halaŋŋa ki may ni, muli suu li ɓivunna u suu jok vun Lona u suuna halaŋ vi Jeremi dam ana, «Aŋ ɓak ki ni dla maɗaŋu.

⁹ Aŋ hal doli a ɓakŋi ana u sem Yawe, Zi ndaɗta hin mbuɗ ki ko Silo na, ɦoŋzi namma hin paliyam kiyo, hin cam suu hurumma kiyo.» Suuna halaŋ hu Ziŋ Yawera tok tasi eg Jeremi.

¹⁰ Maliyaŋ ndaŋgara Yudara hum boy namma may ni yow ay vi mulna mba ki fun zira vi Lonara mol ki funuɗ hu vunuɗ ma wilina.

¹¹ Muli suu li ɓivunna u suu jok vun Lona di maliyaŋ ndaŋgara u suuna halaŋ ana, «Sa namma vi a aygi lam egemmi dla ŋgolo, kay nam di dla cora kay ɦoŋzi namma agi tagira humuɗ ki u humugi lay.»

¹² Jeremi di maliyaŋ ndaŋgara u suuna halaŋ ana, «Yawe sunun ay ana an ɓak boy namma ki kay Zi ndaɗta u ɦoŋzi namma, ni dlara agi humuɗta.

¹³ Cecem wanda mbuɗugi tuɗ magira u dlara agi laɗta ki zeɗ, humugi yira Yawe Loogina yagira, Yawe hin doo dla cora nam a lagira gin egegira kiyo.

¹⁴ Li ni anu ni, anni hu duk kogiya, lagi dlara hurugi vaɗta u an halaŋ, ta agi goloɗ irigi jivira halaŋ.

¹⁵ Agi wi ki kagi ana lini agi can ki wa ni dlara hin vagi ni agiya. Agi tagira lay ɦoŋzi namma u suu hurumma lay. Kay agi ci ki ni sa li va kaɗina. Gasi daŋ may ni Yawe sunun ay ana an dagi boy namma ki agi humumu ni namu.»

¹⁶ Suu maliyaŋ ndaŋgara u suuna halaŋ di muli suu li ɓivunna u suu jok vun Lona ana, «Sa namma agi vi ka lam dla co egembi. Nam ɓakaygi ni u sem Yawe, Looygina.»

¹⁷ Suu basi suu ɦiw suu hu mbas ndaɗtana col kolo di suu tokina ana,

¹⁸ «Mise ma Moresetna, ma li sunda jok vun Lona, hu li ma Ezekiyas a mulna hu Yudana di suu Yudana halaŋ ana, Bu Suuna, ma Saɓakŋa Kom Belna, ɓak anaba, Siyon, suuna hin laɗ ki baraɗna ko senena na, Yerusalem hin mbuɗ ki ni didiŋga zozoɗta, yam zira vi Lonara ma kolona hin mbuɗ ki ni ko bubura na.

¹⁹ Na ni mul ma Yudana, Ezekiyas, u suu mamsina hin cam ki su? Asi hoŋ yasi ga u Yawe ni hoŋi na ɗowɗi su? Yawe hin doo dla cora nam gin a lasira egesira ki kasiya. Aygi may ɗaŋŋi hal a laygi ni dla cora.»

Dlara sa jok vun Lona Uriya laɗta

²⁰ Sa daŋŋa dew ɓak boyna ki u sem Yawe yam ana Uriya. Nammi goŋ Semaya hu ma Kiriyat-Yearimma. Nam ɓak boyna kay ɦoŋzi namma u mbas ndaɗta ko Jeremi ɓakka na may.

²¹ Mulna Joakim u suu golom umma u suu ŋgolo mam suu sunda humusi vunusi hummi hal a cam kiyo. Uriya hum hummi mbuɗ ndaana, pii ki gaw, tuɗ ki hu Egipte.

²² Na may nam mulna Joakim sun suuna hu Egipte. Elnatan ma goŋ Akborna u suu daŋŋa umu tuɗ ay hu Egipte.

²³ Asi vi Uriya ay hu Egipte mbaaram ay ki maŋ mulna Joakim. Nam cam ki cini, hin gam maɗam ki hu zulla dukusi dewra.

²⁴ Jeremi may ni li furira kay doora Ahikam ma goŋ Safanna doo kamba, hin ɦam ka ki maŋ suu min a cam kinaɗi.