JEREMI 25 - Boy Lonana

Sok boy ma ŋgolona hu basara laɗ dog hindi yam hindi u diboynara

¹ Boy ma ɓakam maŋ Jeremi kay suu Yudana halaŋ hu basara vi Joakim ma goŋ Josiyas mul ma Yudana, ta fiɗira. Ni hu basara jewra vi Nabukodonosor mul ma Babilonna.

² Boy ma sa jok vun Lona, Jeremi, ɓakam ki maŋ suu Yudanna halaŋ, ki maŋ suu Yerusalemma halaŋ lay.

³ Ay hu basara doogo yam hindira vi Josiyas, goŋ Amonna, mul ma Yudana, ta ta hu buu ma tew ki basara dok-mba yam hindira, Yawe ɓakan boy mamma. An ɓakagi seŋ ka dukgi, may agi humun kaɗi.

⁴ Yawe sunugi suu mam suu jokom vunumma ki egegi halaŋ, asi ɓakagi ta ta lay agi hum kaɗi. Agi tin humugi ka a humbi.

⁵ Nam dagi ana gegelay hom ki kay tuɗ mamba cora, kay dlaagira bay uɗta, agi hin kak kay ndaŋga mayra Yawe ɦagira ki magi u somoyogi ay ki fok jew day a fafaɗtara.

⁶ Liŋigi u loogi suu daŋŋa a lasi ɓivunnaɗi, a goɓ kaŋga fokosiɗi lay. Hinigi ɓeŋga agi ɓeŋen huurun ki u dlaagira kiyo, an hin ka lagi dla co egegiɗi.

⁷ Na may ni agi hum kaɗi. Yawe di na. Doli ɗaŋŋi agi lan dla cora egenni li na ɗow.

⁸ Na ɗaŋŋi Yawe, ma Saɓakŋa Kom Belna, ɓak anaba, ko ndaɗta na agi ka humungiɗi ni,

⁹ An ɦal voɗta maŋ suu mbayawna halaŋ asi mbay kagiya. Yawena di na. An yi Nabukodonosor, mul ma Babilonna, saan ma sunda, an mbaasi ay kay mbas ndaɗta kay suu huruɗna kay njaf suu keŋesina halaŋ lay. An ɗogosiya an mbuɗusi ki a li ma suuna tii tii ma hahawra hurumma mbuɗum ki jo ma senena.

¹⁰ An hin mbuɗusi asi ka yi u della furiraɗi, gi soolla furiraɗi lay ko ndal suu li ɗumba naɗi, ko ndal suuna luɗ kay ɦinira ii ku pindillara naɗi.

¹¹ Mbas ndaɗta u ŋgoloɗ halaŋ hin mbuɗ ki ni jo ma senena, li ma hahawra. Suu huna halaŋ hin li sunda maŋ mul ma Babilonna i basara dok kiɗisiya.

¹² Na may hu li ma basara dok kiɗisiyara daɓ ki wa ni, an hin li yara u mul ma Babilonna u suu mamsina. Yawe di na. Kay ci maɗ masina, kay mbassa Kaldera. An hin mbuɗuɗ ki li ma hahawra a fafaɗta.

¹³ An hin cuk boy ma an ɓakam kay mbas ndaɗtana kaɗ halaŋ, boy ma ki ɓiiri hu magaarana, ma Jeremi ɓakam ki maŋ suuna halaŋŋa.

¹⁴ Muli suu saɓakŋa u suu bolowna hin lasasi cocoo. An hin hoŋosi warakŋa ki kay dla coosira.

BOYNA KAY NJAF SUU DAŊŊA Va ma sum veŋŋa hurumma ni dlara kaɓakŋa u ndaɗta

¹⁵ Gola ni dlara Yawe, Lona vi suu Israelna dandara, «Tli va ma cira u sum veŋŋa hurumma kon wanni, ni sum veŋ ma yaanda. Aŋ ɦam maŋ njaf suu an sunuŋ ha egesina halaŋ halaŋ.

¹⁶ Asi hin camu, hin viriw na cow, hin puk kaŋga fun ŋgew ma an sunum ha dukusina.»

¹⁷ An tli va ma cira ko Yawe tani ɦam maŋ njaf suu Yawe sunun egesina halaŋ halaŋ.

¹⁸ Yerusalem lay, ɦoŋzi ma Yudana lay, muli masisina u suu ŋgolo masi suu sunda lay, mbuɗ li namma ki didiŋga hu jonara, mbuɗ li namma ki li ma hahawra ma suuna tii tii ma hahawra huna. Ma suuna ndumum ki duk li ma conana lay, ni dlara ka cecem wanda.

¹⁹ Faraw, mul ma Egiptena, u suu mam suu sunda, suu ŋgolo mam suu sunda u suu mamsina halaŋ.

²⁰ Njaf suu zeɗ zeɗna u muli suu Usna halaŋ, muli suu hu mbassa Filistinda halaŋ, suu Askalonna lay, suu Gazana lay, suu Ekronna lay u suu hin hu Asdodna lay.

²¹ Suu Edomma, suu Moabma, suu Amonna.

²² Muli suu Tirna halaŋ, muli suu Sidonna halaŋ, muli suu ha ki hu li ma daŋŋa ŋgoo mbo lumma ŋgolna ii ko hiŋŋa.

²³ Suu Dedanna, suu Temanna, suu Buzna, suu vogosi ki welina halaŋ.

²⁴ Muli suu vi Arabmana halaŋ, muli suu vi njaf suu zeɗ zeɗna halaŋ suu ka kaki hu fullana.

²⁵ Muli suu vi Zimrina halaŋ, muli suu Elamma halaŋ, muli suu Medesna halaŋ.

²⁶ Muli suu ii mbayawna halaŋ suu tok tokŋa u suu day dayna, gegelay u dlaamba, muli suu kay ndaŋgarana halaŋ, suu ka kaki kay ndaŋgarana halaŋ. Mul ma Sesakŋa hin ci ha ŋgorosi dagani.

²⁷ Aŋ hin dasi ana, «Yawe, ma Saɓakŋa Kom Belna, Lona vi suu Israelna, ɓak anaba, Cagiya, guruɗugi tagi kiyo, vinigiya, pukugi kaŋgaa, ka cologi kolo oloɗi ko ŋgew ma an sunum ay dukugina.»

²⁸ Lini asi ka min vaŋ va cira koŋgi, ka min a cambi ni aŋ dasi ana, «Yawe, ma Saɓakŋa Kom Belna, ɓak anaba, agi hin cam mbee lay.

²⁹ An sun dla cora ha kay ɦoŋzi ma humun sen kina jew tuwa, agi may ni dla hin ka li kagiɗi su? Ҥawaa, agi hin ka li ki bay dla kagiɗi, kay ana an ka sun ŋgewiina ay kay suu kay ndaŋgarana halaŋ, Yawe, ma Saɓakŋa Kom Belna, di na.»

³⁰ Aŋ may ni hin ɓakasi boy ma vi Yawe namma kiyo. Aŋ dasi ana, Ay kolo day ni Yawe hurum mbuɗ ki yara. Ay kolo hu ziim day ni Yawe ka ɓak ay u delemu. Nam mbuɗ ki yara, gasi nam mbuɗ ki yara eg suu mamsina. Nam yi ay kolo u delemba to tlena kira kay suu kay ndaŋgarana halaŋ.

³¹ Vun ma nam lamma ndak ki kay ndaŋgara. Yawe cola li ɓakŋa u suuna. Nam mal voɗta a li ɓakŋa u suuna halaŋ. Suu dlara vasina nam casi ki u ŋgewna, Di na ni Yawe.

³² Yawe, ma Saɓakŋa Kom Belna, ɓak anaba, Dla cora hin li ni kay suuna u deeresiya, deeresiya. Babaa ma ŋgolna hin col ay kolo kay keŋ ndaŋgara ma daɓ ayna.

³³ Hu buu namma, col ay ko hiŋŋa tew ki ko wanna, suu Bu Suuna hin dagasi hin tok tok a miɗnana sa hin ka tiirisiɗi. Sa hin ka yowosi a tososiɗi lay. Asi hin mbuɗ ki ni zozoɗta cim ndaŋgara.

³⁴ Gurnigiya, suu taa suuna. Yagi suuna mbay njun ugiya. Bulumugi tagi kaŋgaa agi malayaŋ yoorinana. Lina mba kagi a ŋgaɗagi kira wa. Agi hin njay kiyo ko ndal tlesuu cuk tlena suu gususi loɓmana na.

³⁵ Li ma ŋgayra ka kay suu taa suuna oloɗi. Li ma koɗ tara ka kay suu malayaŋ yoorina oloɗi.

³⁶ Aygi hum tii ma vi suu taa suunana, gurnira vi suu malayaŋ yoorinara. Yawe ɓeŋesi liisi ma ti haɗna ki wa.

³⁷ Katlaŋ mayra mbiira seŋ ki na yerek yerek fok yara vi Yawera.

³⁸ Suuna tuɗ ki ko ndal dlona col hin zulum kira na. Mbas masira mbuɗ ki ni li ma hahawra ko ŋgewra ka wi hahaw saɗi layra, fok yara vi Yawera.