JEREMI 24 - Boy Lonana

Kaalamba mba u tulumma huruɗu

¹ Yawe takan kaalamba mba' u tulumma huruɗ tinira eg taɗ fun Ziŋ Yawena hu li Nabukodonosor vi Yekoniya ma goŋ Joakim, mul ma Yudana tuɗum ay ki Yerusalem tuɗum ki mbaɓura. Suu ŋgolo suu sunda hu Yudana suu wi yal min tlena, suu wi yalduuna lay tuɗusi ki Babilon.

² Kaalam taa dew tulum ma huruɗna jivi coco ko ndal ma vuɗ vun semeɗna jewna na. Kaalamba hiŋga may ɗaŋŋi tulum ma huruɗna ni ma cona, ki saɓak coo sa ka tambi.

³ Na ɗaŋŋi Yawe dan ana, «Aŋ wi ni mege, Jeremi?» An hoŋom dira ana, «Tulumma. Ma jivina ki jivi cocoo, ma cona ki saɓak co gaw may, ka sa tambi.»

⁴ Na ɗaŋŋi Yawe ɓakan ko wanda na,

⁵ Yawe, Lona vi Israel, ɓak anaba, ko aygi gol tulum ma jivi cocona na aygi hin gol yowra yow suuna Yuda an dikisi ki hu li namma hu mbassa vi suu Kaldenara.

⁶ Irin ka tinira kasi u oora, an hin hoŋosi ay hu mbas ndaɗta, an hin mbuɗusi ki saɓaki, an hin ka hawaɗasi kiɗi, an hin hoŋosi balamasiya, an hin ka paɗasi sariyasi kiɗi.

⁷ An hin ɦasi yal ma hin takasi voɗta asi wanda. Gasi an ni Yawe, asi hin mbuɗ ki suu mansina, an hin li ni a Loosina, asi hin hoŋ ay egen u hurusi halaŋ.

⁸ Na may dlara laɗ eg tulum ma cona ma ka sa tambina, na ɗaŋŋi Yawe ɓak anaba, ni dlara an hin laɗ eg Sedesiyas, mul ma Yudana u suu ŋgolo mam suu sunda u suu hin hu Yerusalemma halaŋ, suu hin hu mbas ndaɗtana, kay suu kaki hu mbassa Egiptera halaŋ.

⁹ Suuna mbuɗ ki ndaana kay an li ki egesi ni dlara tak ki eg muli suu kay ndaŋgarana halaŋ, ki hu li ma an njayasi ki huna, asi hin mbuɗ ki ni dlara njunjunda suuna san uɗta. Suuna hin dogoɗosi ŋgulla u givunna na dok dok.

¹⁰ An cukusi ŋgewiina, baktarra u tuguɗi bora kasi ta ta asi bulum ki kay ndaŋgara an ɦasira ki u somoyosira.