JEREMI 23 - Boy Lonana

Suu fok suuna suu cona u mul ma suɗ suuna

¹ Cora ka kay suu taa suuna suu hinisi asi viɗ ha ki kay tasi hu li ma ti haɗna na. Yawe di na.

² Na ɗaŋŋi Yawe, Lona vi Israel, ɓak kay suu taaram suu mamsina tinisi kay haɗna na anaba, «Agi ni suu hiningi suu mansina kay tasi asi njay kina. Agi tin saaragi ka kasiɗi. Na ɗaŋŋi an tanda hin tin saaran kagiya, gagi daŋgayna kay dla cora agi laɗta.» Yawe di na.

³ «An may ni hin tok u suu man suu hinna kay tasiya, hu mbassa an njayasi ki hura halaŋ. An hin hoŋosi ay hu kaana asi hin zul coco lay, fi begera coco lay.

⁴ An hin tinisi suu taara kasiya. Asi hin taarasiya. Asi hin ka li ndaa oloɗi. Asi hin ka miɗ ki oloɗi. Sa dukusi dew lay hin ka hin bay hum sembi.» Di na ni Yawe.

⁵ Buuna hin mbaa, Yawe di na, ma an hin ɦal goona hu njafna vi Davidna. Nam hin ti mulla u saɓakŋa. Nam hin njun kay ma ɗegeena u ma jivina hu mbassa.

⁶ Hu coki mamba ni Yuda ki suɗiya. Israel kak u heɓpa. Gola ni sem ma asi hinimma kamma, «Yawe ni ɗegee maygira.»

⁷ Gasi buuna ka mbaa, Di na ni Yawe, ma suuna hin ka di olo ana, «Yawe ka iiriya ma sel suu Israelna ay ki hu mbassa Egiptena» ka di naɗi.

⁸ May ɗaŋŋi asi hin di ni na ɗow ana, «Yawe ka iiriya, ma cuk suu Israelna ay kina, ma mbaa goryoŋ suu Israelna ay ki hu mbassa mbayawra, hu mbassa an njayasi ki kaɗta halaŋ a asi mba kak kay ndaŋga masira.»

Suu jok vun Lona u muli suu li ɓivun suu maŋŋina

⁹ Kay suu jok vun Lona, an tanda mbuɗ ki ndaana, tliw tan halaŋ dlaka. An mbuɗ ki ko sa guruɗ kina na, ko sa ci summana na, ni kay Yawe ni kay boy mamma teteɗna.

¹⁰ Hu mbassa suuna halaŋ mbuɗ ki suu li zoŋga, mbassa ka yoo taɗu kay dla cora oy ki huruɗu. Kaa ma ŋguy kadna hawaɗ ki wa. Asi ɓaɗ tasi kay a li dla cora, tasi tli feɗta kay dlara bay uɗta.

¹¹ Suu jok vun Lona u muli suu li ɓivunna ki njenjee, ta ta hu ziinda lay. An fasi coosira kiyo. Di na ni Yawe.

¹² Na ɗaŋŋi voɗ masira mbuɗ ki goloɓoɗta. Asi viɗ tasi ki duk li ma ndufunna. Asi puk kaŋgaa. An mbaasi dla cora ay kasi hu basara asi hin ɓak dlaasira kira. Di na ni Yawe.

Suu jok vun Lona suu co su suu Samarina

¹³ Vo vi suu jok vun Lona suu Samarina an wi tlesuu ɓeŋ huuna. Asi ɓak boyna ki u sem Baal. Asi viɗin suu man suu Israelna kiyo.

¹⁴ Na may vo vi suu jok vun Lona suu Yerusalemma, an wi dlara ŋgolora ɦay. Asi hin tasi ki kay boy zoŋga, asi kakŋi duk dla cora. Asi njun ŋgolla ni u suu li dla cora hu li ma asi wi ana sa dew lay ka min a hin dla coomba kiɗi layna. Asi halaŋ mbuɗ ki irinni ko suu Sodomma na. Suu asina tli tasi ni ko suu Gomorna na.

¹⁵ Na ɗaŋŋi Yawe, ma Saɓakŋa Kom Belna, ɓak kay suu jok vun Lona asina anaba, an hin ɦasi tlesuu ci suuna a tira. An hin ɦasi yo ma ci suuna, asi camu. Kay ana dla cora col ay ni ko suu jok vun Lona suu Yerusalemma jok suu kay mbassa halaŋŋa ni na.

Suu jok vun Lona suu ka boyna

¹⁶ Na ɗaŋŋi Yawe, ma Saɓakŋa Kom Belna, ɓak anaba, Tinigi saaragi kay boy ma suu jok vun Lona dagina naɗi. Asi ganagi ni yagiya. Dlara asi daɗta ni saa masira mbay kay yasira. Dla ndaɗta col ay ka fun Yaweɗi.

¹⁷ Asi min a di suu ka min boy ma vi Yawenaɗina ana, «Dlara hin li kagi agi jiviya.» Sa ma min a tuɗ fok u yamba eŋgana, «Dla cora hin ka mba kagiɗi.»

¹⁸ Sa ma ka coli a hum gaɗta vi Yawera ni gege? Nam gola, nam humum boy mamma. Sa ma humum ka tini a humunna ni gege? Sa ka humma ni gege?

¹⁹ Saɓak semeɗ ma vi Yawena, saɓak yara vi Yawera mba wa. Babaana ka paɗa. Nam ka paɗ kay suu dlara vasina.

²⁰ Yara vi Yawera hin ka heɓ kaŋga bay nam li dlara nam di kaɗta kiɗi. Dlara nam gaɗ iriɗ ay ki komba. Tuɗ fok na nde ni agi hin fagi yalna su olo.

²¹ An sun suu jok vun Lona asina ha kaɗi. May asi ka liŋ haa. An ka ɓakasi boy haɗi lay. Asi tuɗ ɓak ha kiyo.

²² Lini asi humun gaɗ manda ni, asi hin ɓakan boy manna ki maŋ suu mansina, asi humum may. Asi hin hoŋosi ay ki hu voɗ masira cora asi tlaɗta ki duk dlaasira cora lay.

Bu Suuna ki hu lina bel bel

²³ An hin li ni Lo ma kaki tokŋa. Di na ni Yawe. An hin ka li a Lo ma ha ki daynaɗi su?

²⁴ Lini sana ŋgay tam ha ki day lay ni, an hin ka wambi su? Di na ni Yawe. An oy li ma kolona u li ma kaŋgana, ka ki ni anɗi su? Yawe di na.

Boy ma bay umma vi suu jok vun Lona u boy ma vi Lonana

²⁵ An hum vun suu jok vun Lona suu ɓak boy ma kaboyna u senna di ana, «Tlena tak tasi irinu, tlena tak tasi irinu.»

²⁶ Hin tew ni ara na ga, tlena hin li kay suu jok vun Lona suu ɓak boy ma kaboyna ni ge? Asi ni suu jok vun Lona suu ganyamba u ŋgatara ɦawaa.

²⁷ U doy masira asi njaɗaɗ vunuɗ duk tasira, asi saa ana suu mansina hin maaran sen ki ko somoyosi u Baal masina maaran sen kira na.

²⁸ Sa ma jok vun Lona ma doyra damma njaɗ ni vun doy mamba. Na may sa boy manna komma ɓakam ki eg liim na ɗegee. Va ma duk ɦoŋ barra u ii wana na ni mege? Di na ni Yawe.

²⁹ Boy manna tli tammi ko ndal tlesuu wanna na, ko ndal kura u do caffa luɗ gogoyra kira na. Yawe di na.

³⁰ Na ɗaŋŋi an hin li dla cora eg suu jok vun Lona, Yawe, di na. Suu ɓorowon boy manna ki kosina.

³¹ An hin li dla cora eg suu jok vun Lona. Di na ni Yawe. Suu sinisi njaɗ dlara ganyamba pereɗ yam boy ma gasina ki kaŋgaa.

³² An hin li dla cora eg suu jok vun Lona suu doyra kaboyna dasina. Yawe di na. Suu njaɗaɗ ki u kaboyna u dlaasira ganyamba viɗin suu mansina kiyo. An sunusi ay kaɗi lay, joɓosi va kaɗi lay. Asi ka li va ma jivi eg suu asinaɗi. Di na ni Yawe.

Nekka vi Bu Suunara ŋgolla

³³ Lini suu asina ɗowba, sa jok vun Lona ɗowba mul ma li ɓivunna joɓoŋ ana, «Nekka vi Yawera ni tarage?» aŋ hoŋosi dira ana, «Agi ni nek ndaɗta. An hin noyogi kiyo.» Di na ni Yawe.

³⁴ Lini sa jok vun Lona ɗowba mul ma li ɓivunna ɗowba sa duk suuna daŋ ana, «Nekka vi Yawera ni an hin li dla cora eg sa namma u suu mamsina.»

³⁵ Gola ni dlara agi hin daɗ duk tagira, «Yawe hoŋ dira ni ana mege? Yawe ɓakŋi ana mege?»

³⁶ Na ɗaŋŋi kay nekka vi Yawera ni agi yagi sem dla ndaɗta oloɗi. Nekka hin li ni kay gegelay u boy mamma, kay ana agi ɓeŋ boyna vi Yawe, ma Saɓakŋa Kom Belna, Looygina, kiyo.

³⁷ Gola ni dlara aŋ hin daɗ maŋ sa jok vun Lona na, «Yawe hoŋoŋ dira ni ana mege? Yawe ɓakaŋŋi ana mege?»

³⁸ Na ɗaŋŋi li ni agi di ana, «Nekka vi Yawera» Yawera may ni ɓak anaba, ni kay agi di ana, «Nekka vi Yawerara». An doorogi ki ana agi di na oloɗi ana, «Nekka vi Yawerara» ɗi.

³⁹ Na ɗaŋŋi an hin gologi ni u tanda hin cukugi ha ki egen na day. Agi tagira u ɦoŋzi ma an ɦagina ki magi u somoyogina.

⁴⁰ An hin mbuɗugi ki zolona a fafaɗta. Mbuɗugi ki hahawra a fafaɗta. Sa hin ka maa dla ndaɗta kiɗi.