JEREMI 22 - Boy Lonana

¹ Yawe ɓak anaba, tuɗ ha hu ziŋ mulna Yudana aŋ hin ɓak boy namma huwa.

² Aŋ dasi ana, Humugi boy ma vi Yawena haa, mul ma Yuda ma tli mulla vi Davidna. Aŋ u suu maŋ suu sunda, suu maŋsina halaŋ suu kal hu vun zi nammana.

³ Yawe ɓak anaba, njunugi kay ma ɗegeena u ma jivina, buɗugi suu suu saɓakŋa lasasina kiyo, lasasiɗi, lasagi sa mbay ŋgayra varaginaɗi. Goo haw kuyuna u cara donoraɗi lay. Voogi busu suu li va kaɗina kaŋga hu li nammaɗi.

⁴ Lini agi li ko ndaɗta na ni, muli suu tli mulla vi Davidna hin kal fun zi namma ful ki kolo hu pupusna may, kay kulumina may. Nam tamba lay suu mam suu sunda lay, suu mamsina halaŋ lay.

⁵ Na may lini agi hum boy namma kaɗi ni, an suu u tanda, Yawe di ana zi namma hin mbuɗ ki ni didiŋga cuk zozoɗta.

⁶ Gasi, Yawe ɓak kay zi ma vi mul ma Yudana anaba, aŋ li irinni ko Galaad na lay, ko ndal duk gura Libanda na lay, an ka saa kaŋ a mbuɗuŋ ki fullaɗi. Ҥoŋzi ma sa ka kak hurumbinaɗi.

⁷ An yow suuna kay a ɓeŋeŋ kira, gegelay u tlegeyem suu duuna komu. Asi hin kaaŋ gu ɦoy maŋŋa kiyo, hin hinim nam ŋgal ki duk kura.

⁸ Suuna u njafasi halaŋ hin jak hu ɦoŋzi namma, asi hin ɓak tasi ana, «Ni kay me Yawe li dla cora eg ɦoŋzi namma nage?»

⁹ Asi hin hoŋdira ana, «Ni kay noyra asi noy galamba duk tasi u Yawe Loosina kiyo tuɗ goɓ kaŋga fok loogi suu daŋŋa lasi ɓivunna mayra.»

Kay Sallum sa varak Josiyasna

¹⁰ Tiirigi kay sa miɗinaɗi. Lagi dlara yoo ta kambi. Na may tiirigi kay sa tuɗ kina, kay ana nam hin ka wi mbassa nam vuɗ huruɗtaɗi.

¹¹ Gasi, Yawe ɓak kay Sallum anaba, goŋ Josiyasna, mul ma Yuda ma varak balam bum Josiyas, col tuɗ ki hin li nammana. Nam hin ka hoŋ ay oloɗi.

¹² Kay ana nam miɗ ki hu li ma asi tuɗum ha ki mbaɓura huna, mbas ndaɗta nam hin ka waɗ oloɗi.

Kay Joakim ma varak balam Josiyas a mbarana

¹³ Cora ka kay sa ma min ziim ka saa kay ɗegeeraɗina. Min zigini suu daŋŋa kolo kasi, bay saa kay ma jivina layna, ma tin sunda nekka kay suuna ka ɦasi warakŋaɗi layna.

¹⁴ Nam ma di ana, an min ziinda ŋgolla, min zigini suu hurusi ŋgolona kolo kasiya. Co ii zira ki a gol lina hin boɗ tlena ki iriɗ may, guluɗuɗ ki u daɓaŋga may.

¹⁵ Aŋ saa ana aŋ hin ti mulla ni u takka aŋ tak taŋ ki ko gu ɦoyna nara su? Buŋ ti tlena kaɗi su? Ci kaɗi su? Doo ka kay jivira u ɗegeeraɗi su? Nam hin fi jivira ni na.

¹⁶ Nam tli dlaŋ sa hahawra u ma hawra komu, ni jivira. Wira wanda ni naɗi su? Di na ni Yawe.

¹⁷ Iriŋ u saaraŋ tinira ni kay li ma aŋ a fi tlena huna, a vo busu sa ma li va kaɗina ki kaŋga lay. Li dlara eg suuna u saɓakŋa bay saara lay.

¹⁸ Na ɗaŋŋi Yawe, ma Saɓakŋa Kom Belna, ɓak Joakim, ma goŋ Josiyas ma mul ma Yudana, anaba, sa ka gi soolla hahaw kambi. «Ni dlara hahaw me nage, wayanna? Ni dlara hahaw me nage, wayanda?» Sa ka gi soolla hahaw kambi, «Ni dlara hahaw me nage, malanna? Ni dlara hahaw me nage, sa ŋgolna? Ni dlara hahaw me nage, ma jivi cocona?»

¹⁹ Asi tosommi ko tos korra na. Taɗam kaŋga tuɗ gam ha ki day eg vun zi ma Yerusalemma.

Zolona u hahawra vi Yerusalemba

²⁰ Ɗiŋ kolo kay ɦinira Libanda, yi ha kolo u deleŋga eŋga hu Basan. Hu lina bel bel aŋ yi huwa, banayaŋŋa halaŋ, asi casi ki wa.

²¹ An ɓak u aŋŋi hu li ma dla ka kaŋ tuɗi na, aŋ hoŋon dira ana, «Aŋ ka min a humbi.» Ni dlara aŋ laɗ ay u goo taŋ dayra, aŋ humun delen ay kaɗi a fafaɗta.

²² Suu goloŋŋa halaŋ semeɗna sunusi a taa suuna, banayaŋŋa tuɗ ki mbeera wa. Gasi, zolona u hahawra hin mba kaŋu kay ci wayra aŋ caɗ kay dla cooŋgara.

²³ Aŋ sa kaki kay ɦinira Libanda, aŋ min ziiŋ duk gu ɦoyna. Aŋ oy hu li ma dlara tiitara mbay kaŋŋa ko ndal cara tii taɗ hu buu ma vuɗtanana.

Kay Koniya ma goŋ Joakimma

²⁴ Ni tanda gaw Yawe di na. Hu li ma Koniya ma goŋ Joakimma mul ma Yudana hin li ni ko ndal tampoŋ ma njuni del kon ma njufna an hin buɗum kiyo.

²⁵ Gasi, an ɦaŋ ki maŋ suu min a caŋ kina. Suu aŋ li ndaana kosina, maŋ Nabukodonosor mul ma Babilonna, maŋ suu Kaldena.

²⁶ An gaŋ ha kiyo, aŋ lay suŋga vuɗuŋga lay kay ndaŋgara daŋga agi vuɗ ay ka huruɗɗira. Aŋ hin miɗ ha ki hu li namma.

²⁷ Kay ndaŋga ndaɗta asi hin saa ana asi hoŋ ay voo may hin ka ndakgi.

²⁸ Sa yam ana Koniyana mbuɗ ni va ma ki tooyna, ma ka li sun oloɗina, mbuɗ ni va ma suuna ka minim oloɗinaɗi su? Ni kay me asi cukusi ha ki ni ge? Nam lay goryom lay cukusi ha ki kay ndaŋgara asi ka waɗɗi layra ni ge?

²⁹ Ndak mbas manda, hum boy ma vi Yawena haa.

³⁰ Yawe ɓak anaba, ɓiirigi kay sa namma, «Sa sunum kaɗina, goo ma li dlara jivi ka na ndeɗi layna.» Duk goryom halaŋŋi ma hin li dla jivi dew kaɗi, ma hin kak kay mulla vi Davidta, a gol u mulla vi Yudara kaɗi.