JEREMI 21 - Boy Lonana

Bu Suuna hoŋ dira maŋ mulna Sedesiyas

¹ Yawe ɓak boy mamma maŋ Jeremi hu li ma mulna Sedesiyas sunum Pasehur ma goŋ Malkiyana u mul ma li ɓivunna Sefaniya, ma goŋ Maaseyana, a dam ana,

² «Aŋ joɓ Yawe ay kamiya kay Nabukodonosor, mul ma Babilonna, ka duurumiya. Yawe li hin dlaamba mbuɗ mbuɗta li kami dew a mbuɗum ki ndaana kami kalage?»

³ Jeremi dasi ana, «Dlara agi hin i daɗ maŋ Sedesiyassa ni ko wanda na,

⁴ Yawe Lona vi Israel bak anaba, ɓagi ma agi yowom kogi a duurugi mul ma Babilonna u suu Kaldena, suu sulul ay kagi ki keŋ hu gulumunna na an hin mbuɗusi irisi ay hin selesi ki hu ɦoŋzi namma.

⁵ Aŋ maɗ koŋ kiyo u saɓak maŋŋa aŋ taŋga hin li duuna u yara, yara ŋgol cocora.

⁶ An hin ci suu hu ɦoŋzi nammana kiyo, suu warna u yoorina. Asi hin miɗ ki ni maɗ bora eŋ cocora.

⁷ Ŋgoo dagan wanni, Yawe di ana, an hin ci Sedesiyas, mul ma Yudana, ki u suu mam suu sunda u suu hin bay miɗ ki ko tuguɗi bora hu ɦoŋzi nammana ki u ŋgewna, baktarra lay. An hin ɦasi ki ko mul ma Babilonna, ko suu babali masisina lay, ki ko suu min a casi kina lay. Asi hin casi ki bay saara, bay wasi hahawasi lay, bay oora hurusi lay.»

⁸ Maŋ suu asina aŋ hin dasi ana, «Yawe ɓak anaba, an hin tinigi tlena fokogi mba' agi ŋgaɓa, maɗna ɗowba iirira su?

⁹ Sa ma hin kak hu ɦoŋzi nammana hin cam ki u ŋgewna, baktarra u tuguɗi bora. Sa ma hin kal ay ki ŋgaf suu Kalde suu casi kina hin kak iiriya. Nam hin furi kay ana iiri mamba suɗ ki wa.

¹⁰ Gasi, an pereɗ irin kay ɦoŋzi namma a lam dla cora egemba, ka lam dla jiviɗi. Yawe di na. Ҥoŋzi namma hin ɦam ki maŋ mul ma Babilonna, nam hin ŋgalam kiyo.»

Boy ma ɓakam maŋ suu vi mulna Yudana

¹¹ Maŋ suu vi mulna Yudana, humugi boy ma vi Yawena haa.

¹² Suu vi Davidna, Yawe ɓak anaba, kaɓak ma ɗegeena maɗii hu buuna tew tew, buɗugi suu suu saɓakŋa lasasina kiyo. Li ka naɗi ni yaanda hin mba kagi ko ndal kura na. Ndaɗ hin ŋgal lina, sa ka ndak a caɗ kiɗi, ko dlaasira cora asi laɗta.

¹³ Ni duk ɦoŋ tay mba' may ɗaŋ aŋ sa ka hu ɦoŋzi nammana, ɦinira hu fullara. Di na ni Yawe. Agi suu di ana, sa hin mbay duuruygina ni gege? Sa hin kal hu ziygina ni gege?

¹⁴ An duu u agi ni kay sun magira cora. Di na ni Yawe. An ŋgal kura ŋgolla duk gura. Ndaɗ hin ŋgal tlesuu ŋguy kaɗna ki halaŋ.