JEREMI 19 - Boy Lonana

Doyra ki tooyra

¹ Yawe ɓak anaba, tuɗ gus doyra aya, man suu maarina duk suuna, duk muli suu li ɓivunna.

² Aŋ kal ki keŋ ko ma ɦuɗugumba Hinnomba, ay hu vun grek ma doyogi suu tooyna huna na a ɓak boy ma an hin daŋŋa hana kiyo.

³ Aŋ dasi ana, humugi boy ma vi Yawena haa, muli suu Yudana u suu Yerusalemma. Yawe, ma Saɓakŋa Kom Belna, Lona vi Israel, di anaba, «An hin mbaa dla cora ay hu li namma, gegelay ma hum dla ndaɗta na humma hin viɗ kiyo.

⁴ Hu li ma asi noyon ki may, asi ɓeŋ li namma ki u ɓivun ma ŋgalam maŋ loogi suu daŋ suu loɓ tasi ay ka kasiɗi lay, ka kay somoyosiɗi lay, ka kay muli suu Yudanaɗi layna. Asi oy li namma ki u busu kem gorira li va kaɗira.

⁵ Asi mbu lina kolo maŋ Baal a ŋgal goryosi ki a ɓivunna maŋ Baal u kura huwa. Dla ndaɗta an ɓiiriɗ kaɗi, an ɓakaɗ kaɗi lay, saa ndaɗta mba ka kanɗi lay.

⁶ «Na ɗaŋŋi buuna mba wa, Yawe di na, ma suuna hin ka yi li namma ana, li ma mbuyna oloɗi, ɗowba ɦuɗugumba Hinnomba oloɗi may, hin yam ana ɦuɗugumba ci suuna.

⁷ Hu li namma an hin mbuɗ boy ma vi Yudana ki dlara bay uɗta, dlara vi Yerusalemba lay, an hin casi ki u ŋgewna fok suu babali masisina. An hin yow suu min a casi kina cukusisina kasiya. An hin ɦasi maɗasi ki maŋ layagi suu pii kolo huulonana u mburi suu kay ndaŋgarana a tiisina.

⁸ An hin mbuɗ li namma ki li ma hahawra ma suuna tii tii ma hahawra huna. Sa tli hu li namma tokŋa hin viɗ ki na dawlaɗ hu li ma nam wi dla co ndaɗta nana. Nam tii tii ma hahawra lay.

⁹ An hin ɦasi tliw goryosi suu njufiina u gorɓiina asi komom lay. Asi hin kom tasi lay, ki hahaw coco lay. Suu babali masisina suu min a casi kina, hin tinisi dlara nekka kasiya.»

¹⁰ Aŋ hin to doyra ki kaŋga ii suu may suu tuɗ u aŋŋa.

¹¹ Aŋ hin dasi ana, Yawe, ma Saɓakŋa Kom Belna, di anaba an ci suu asina ki hu ɦoŋzi namma ko ndal suuna to doyra sana miniɗta ki hin ka miniɗ oloɗira na. Li ma tos suuna kaɗi hin tososi ni hu otel ma ɓivunna lay.

¹² Ni dlara an hin laɗ eg li nammara, Yawe di na, eg suu hu li nammana lay, mbuɗ ɦoŋzi namma ki ko li ma mbuyna na.

¹³ Zigini suu njenje suu Yerusalemma u muli suu Yudana mbuɗ ki ko li ma mbuyna na, gasi zigini asina halaŋ suu ŋgal ɓivunna kolo kay yasi maŋ suu duu suu huulonana, li ɓivunna maŋ loogi suu daŋŋa lay.

¹⁴ Jeremi hoŋ ay ki hu Tafet ma Yawe sunum ay hu ana nam ɓakam boy mamma kina. Nam col fun zira vi Bu Suunara. Na ɗaŋŋi nam ɓak suuna halaŋ.

¹⁵ Na ɗaŋŋi Yawe, ma Saɓakŋa Kom Belna, Lona vi Israel ɓak anaba, an hin mbaa suuna ay kay ɦoŋzi namma, kay suu ŋguy kamma lay dla cora an min a laɗ egesira kay ana asi so delesi kiyo, ka min humun boy mannaɗi.