JEREMI 18 - Boy Lonana

Jeremi vo vi sa min doyogina

¹ Yawe ɓak boy mamma maŋ Jeremi ana,

² «Tuɗ vi sa min doyogina cecem gaw. An hin ɓakaŋ boy manna ha ni hu li namma.»

³ An tuɗ vi sa min doyogina. An fam nam ka li sunda kasiya.

⁴ Hu li ma kom gun wa nde ni va nam a minim gin u luɓunana ka li jivi oloɗi. Nam hoŋ ma daŋŋa lira u yal ma vi sa min doyogina ma jivina.

⁵ Na ɗaŋŋi Yawe ɓakan boy mamma ana,

⁶ «An ka ndak a lagi agi suu Israelna ko ndal sa min doyogina naɗi su?» Yawe di na. «Agi suu Israelna ni kolo duk kon ko ndal luɓuna duk ko sa min doyogina na.

⁷ An ndak a paɗagi ki u sariyagi lay, pukugi ki kaŋga lay, ɓeŋegi ki lay, ɓeŋ mulla ki lay.

⁸ Lini suu asina hom ko dla cora an tinisira kasirawa ni, an hin ka lasi dla cora an a lasira gin egesira oloɗi.

⁹ An ndak hoŋ li na kolo minda ɗowba hoŋ mulla tinda balamaɗ lay.

¹⁰ May ɗaŋŋi lini asi hin dlara humun delenda tani lini dla co mayra an ka miniɗɗira ni, an hin ka lasi jivi mayra an gin a lasira egesiraɗi.»

¹¹ Cecem wanda aŋ tuɗ di suu Yudana u suu Yerusalemma, Yawe ɓak ana, «An hin tinigi dla cora kagiya. An hin faɗ vun dlaanda ki egegiya. Gegelay hom dla coomba ki gasi, mbuɗugi tuɗ magira jiviya, mbuɗugi dlaagira agi laɗta ki jiviya.»

¹² Na may asi hin di ana, «Ҥawaa, boy kaɗi. Ami hin tuɗ irimi ni foko, gegelay hin tuɗ irim fokŋi u yam eŋ mamba.»

Israel maa malaɗna kiyo

¹³ Na ɗaŋŋi Yawe ɓak anaba, halagi u boyna duk suuna, na ni agi hum boy ma ko namma nana kaɗi su? Goo wayra Israel li dla cora ŋgol ɦay.

¹⁴ Na ni aygi ndak a noy tlesuu col ay duk mborɦoyra Libanda u mborɦoy mayra gi kay ɦinira ki su? Na ni aygi ndak noyoygi yo ma col ay dayna ki su? Ma ɓaɗ heɓpa na cetl cetlna.

¹⁵ Suu mansina maaran kiyo, tuɗ ŋgal ɓivunna ki maŋ suu sunusi kaɗina, suu daɓasi sesi eg guna hu voɗta lay, hu voɗta vi somoyosi ta jew dayra. Asi tli voɗ ndaɗta may, voɗ mayra huruɗ ka jiviɗira.

¹⁶ Na ni asi hin mbuɗ mbas masira ki a li ma hahawra, ma suuna hin tii tii ma hahawra hurum tew tewna. Suu tli voɗta hu li nammana viɗ ki na dawlaɗ, kisik yasi na gak gak.

¹⁷ Ko ndal semeɗ ma col ay u faɗta maɗiira na, an njayasi ki fok suu masi suu babalira hu buu ma asi ɓeŋ kina, an hin pereɗesi zagaɗanu hin ka takasi vogonɗi.

Kaboyna eg Jeremi, cenda vi sa jok vun Lona

¹⁸ Asi di ana, «Tuɗuygi halaygi dlara eg Jeremi. Aygi hin faygi boy ma jivina fun muli suu li ɓivunna, faygi gaɗta fun suu wi yal dlara, faygi boyna fun suu jok vun Lona. Tuɗuygi ɓeŋeygina ki u boy ma cona, tiniygi yaygi kay boy mammaɗi.»

¹⁹ Yawe ɦan yal maŋŋa halaŋ, hum dlara suu babali mansina ɓakaɗta.

²⁰ Na ni sana ndak hoŋ jivira ndaramma lambara ki u dla cora su? Asi may ni ŋguyun ki u dawna. Humuŋ gaŋ ko an ka coli fokoŋ a ɓakaŋ kay dlasira na, hin yaaŋga lasiɗi.

²¹ Na ɗaŋŋi Aŋ gasi mayra kay goryosiya, casi ki u ŋgewna. Ko boyogosi viɗ goryosi ki u njufuyusiya, ko maɗna ci suu warna kiyo, ko ŋgewna ci gorzoŋŋina ki fun duuna.

²² Ko suuna hum tii ma hahawra varasiya hu li ma aŋ hin mbaasi dla cora ay kasi gawna, kay ana asi ŋguyun ki u dawna a vanda. Asi ɗaaran bayra kaŋga u senu.

²³ Yawe aŋ wasi saa masira maŋira egenda. Aŋ bulumusi dla coosira ci maɗna kiɗi, hin a coosira bulum taɗ ki fokoŋgi. Ko asi casi ki kaŋga fokoŋgi liiŋ ma yara mba wa ni aŋ lasiya.