JEREMI 17 - Boy Lonana

Cora suu Yudana laɗta ka bulum kiɗi

¹ Cora vi suu Yudana ki kaŋga ɓiiri u kawina, ki saɓak cocoo. Ndaɗ ki ɓiiri hurusi kurufu u vun kawi ma eŋŋa, ki kolo kay otel masi ma li ɓivunna lay.

² Asi ɓak kay goryosi may ni, asi hin ɓak kay otel masi ma ɓivunna u gu ma ɓivun ma pii eg ŋgusugina humum ɗuf tew tew kolo kay ɦinira fiyekkana may.

³ Aŋ ma ɗegee ma goɓ Lona kay ɦinira lay, hu lina bel layna, bege maŋga u tlegeyeŋ halaŋ an ɦasi ki maŋ suuna asi ɦurumusi kiyo, kay cora agi laɗ hu li ma kolo dayna kay ndaŋga magira halaŋ halaŋga.

⁴ Aŋ hin hoŋ mbassa kiyo. Aŋ u dew taŋga hin col ha ki eg jo ma an ɦaŋŋana na day. An hin cukuŋ suu maŋ suu babalira kaŋu. Suu asina mbay ni hu mbassa aŋ ka waɗɗira, kay ana agi cukungi ku yaanda kagi wa, ndaɗ ka ŋgal na gak gak.

Heɓpa cora u heɓpa gasira

⁵ Yawe ɓak anaba, cora ka kay sa ma tin saaram kay suu miɗ kina, saɓak mamma ni tliwim ma egemma, hurum ki day eg Yawe.

⁶ Ni ko ndaɗta na lay kay ŋgusu ma hu fullana, nam ka wi jivira hin mbayraɗi, nam hin kakŋi hu sene ma gogoyra hu fulla, ni ndaŋgara galakka sa ka kak huɗira.

⁷ Heɓpa ka kay sa ma tin saaram kay Yawena. Yawe hin mbuɗ ni saɓak mamma.

⁸ Ni na lay kay ŋgusu ma pii fun mbona na, ma sii sariyam ha kaŋga duk mbonana. Nam ka wi faɗta egembi lay, humum warra na tew tew lay. Basara haw yona dew daŋŋi ka lam vaɗi. Nam ka seŋ duk bay vuɗtaɗi.

⁹ Va ma ganyamba su belna ni saara sa ka ndak a gaɗ iriɗɗira. Sa hin waɗ uɗna ni gege?

¹⁰ An, Yawe, sa wi saa suuna, wi dlara hurusira lay, kaɓakŋa kay gegelay ni u dlaamba u sunumba nam laɗta.

¹¹ Ceke mayra buu kay se ma ndaɗ gam kaɗi layna, ni sa ma ci suuna ki bay dlara kosina, tew hu buu mamma dukka gayra may ni bege mamba hin ka li kom oloɗi. Nam hin hoŋ ki dagani, mbuɗ sa bay vana komma.

Jeremi joɓ Bu Suuna ana nam njunumu

¹² Mulla saɓakŋa ka kolo hu ura tin ayra day, otel mami ma li ɓivunna ni na.

¹³ Saara vi Israella ana Yawe, suu noyoŋ kina halaŋ zolona casiya. Suu ɦuɗ tasi ki egenna dlara vasi wa, kay ana asi noy ki ni voɗ mbo ma iirina ni Yawe.

¹⁴ Garaɗanu, Yawe, an hin garaɗ kiyo. Suɗun kiyo, an hin suɗ kiyo, kay ana aŋŋi saɓak manna.

¹⁵ Asi dan ana, «Boy ma vi Yawena ni ara ɗaŋge, nam tak tam kiyo.»

¹⁶ An ka sa min ana dla cora mbay zakinaɗi, buu ma cona an yam ay ka ni anɗi, aŋ wi layɗi su? Dlara kal ay ki fununda an ɓakaɗ ni fokoŋɗi su?

¹⁷ Mbuɗ yara egenɗi aŋ liin ma an ŋgay tan hurum hu buu ma dla cora mbana.

¹⁸ Ko zolona li kay suu lasanna, li kan anɗi, ko dla cora ndi ni kasiya ndi kan anɗi. Mbaasi buu ma cona ay kasiya, casi ki u koŋ ma waɗ eŋ cocona.

Yi suuna asi koɗ tasi hu buu ma vi Lonna

¹⁹ Yawe ɓak anaba, aŋ tuɗ col fun zira ŋgolla, muli suu Yudana sel huruɗ may kal ay ki huruɗ mayra, col fun grek ma Yerusalemma halaŋ may.

²⁰ Aŋ hin dasi anaba, humugi boy ma vi Yawena haa, muli suu Yudana, suu hu Yudana, suu hu Yerusalemma lay. Agi suu kalagi hu vun zi ndaɗtana halaŋ.

²¹ Yawe ɓak anaba, gologi tagi jiviya, tlagi va nek kagi hu buu ma vi Lonnaɗi, kalagina fun grek ma Yerusalemmaɗi.

²² Agi ka ndak a tli va kagi ha ki keŋ eg ziigi hu buu ma vi Lonnaɗi lay. Agi ka li sun hu buu nammaɗi. Buu ma vi Lonna hin li ni a buu ma ɓivunna tew tew, ko ndal an ɓak somoyogi kamba na.

²³ Asi may ni hum kaɗi, tin humusi kaɗi lay. Asi so delesi ki eŋga ka min a humbi lay, ka vi u gaɗtaɗi lay.

²⁴ Agi may ni li ni agi humun jiviya ni, Yawe di na, li ni hu buu ma vi Lonna agi ka kal va nek ay vun grek ma hu ɦoŋzinaɗi, saaragi kay buu ma vi Lonna ana ni buu ma ɓivunna, ka min a lagi sun taragelay hu buu nammaɗi may.

²⁵ Na ɗaŋŋi suu hin kal hu vun grek ma hu ɦoŋzi nammana ni suu mulina u suu ŋgolo masi suu sunda, ɓorow mulla vi Davidta fuli kay kulumina, hu puspusna. Asi lay suu ŋgolo masi suu sunda lay. Suu Yudana lay, suu Yerusalemma lay. Ҥoŋzi namma suuna hin kak hurum a fafaɗta.

²⁶ Na ɗaŋŋi suuna hin mbay hu ɦoŋzi ma Yudana, ɦoŋzi ma ŋguy kay Yerusalemma, ay hu mbassa vi Benjaminda, ay hu mbassa kaŋga ura, ay kolo kay ɦinira, ay dali lay, suu mbay u ɓivun ma ŋgalam kina may, ɓivun ma lam ɦawana may, ɦalla ɦawara may, mbul ma his jivina may u suu mbaa ɓivun ma ŋgara ay hu zira vi Yawera.

²⁷ Lini agi humungi ka kay buu ma vi Lonna ŋgaɓam ki duk ndarayammanaɗi, ka saa kay tlira tli nekka hu buu nammaraɗi lay, kay kalla kal hu vun grek ma Yerusalemma hu buu ma vi Lonnaɗi lay ni, an hin ŋgal kura vun grek namma ndaɗ hin ŋgal zigini suu jivi suu Yerusalemma ki lay, hin ka tew kiɗi lay.