JEREMI 16 - Boy Lonana

Kakka Jeremi kak donora kay tam dewra

¹ Yawe ɓakan boy mamma ana,

² Aŋ ka vi caɗi. Aŋ ka vuɗ go njuf taniɗi lay, go tamaɗi lay.

³ Ko ndaɗta na, Yawe ɓak kay gor njufiina u gorɓii suu vuɗ tanina, ɓak kay somoyosi suu vuɗusi hu mbas ndaɗtana.

⁴ Mayra hin casi ki ni ndaɗu. Sa hin ka tiirisi maɗasiɗi lay, ka wasi ususiɗi lay. Asi hin li ni ko tlesuu cim ndaŋgarana na. Asi hin miɗ ki ko ŋgewra u mayra. Maɗasi hin li ni tlesuu layagi suu pii huulonana u mburi suu kay ndaŋgarana Komosina.

⁵ Gasi Yawe ɓak anaba, kal hu zira suuna tok tasi huruɗ a tii maɗnaraɗi. Tuɗ tii maɗnaɗi. Saa kay suu asina a lasi dlara jivi egesiɗi, kay ana an hoŋ begera an ɦaɗ maŋ suu asinara ki yowra wa, ɗegeera u heɓba. Yawe di na.

⁶ Hu mbas ndaɗta suu ŋgolona u kemba gorira hin miɗ kiyo. Sa hin ka tososiɗi. Sa hin ka li dlara hahaw kasiɗi. Sa hin ka jii hurumbi lay, ka wel yam kiɗi lay.

⁷ Asi hin ka ɦal funa maŋ sa tii maɗna a nam fi saɓakŋa ŋgoo tii maɗnaɗi. Asi hin ka ɦam va ma cira a nam fi saɓakŋaɗi, kay maɗ bumbi lay, kay maɗ sumbi lay.

⁸ Aŋ kal hu zira asi ka li furira huraɗi, a asi taɓaŋ ki u asiraɗi, a cagi may tagi mayraɗi.

⁹ Ko ndaɗta na, Yawe, ma Saɓakŋa Kom Belna, Lona vi suu Israelna, ɓak anaba, an hin seŋegi vunugi hu li namma. Hu buu magina agi hin wi u irigiya, tii ma furira, luu ma furira, soolla suu ɗum tasi wilina gaɗta lay.

¹⁰ Hu li ma aŋ jok boy namma ha ki maŋ suuna wa halaŋ halaŋŋi, lini asi hoŋoŋ dira ana, «Ni kay me, Yawe, tinimi dla cora ŋgol ndaɗta kami ni amege? Maɗ ma ami camma ni manage? Dla cora ami laɗ eg Yawe, Loominara ni tarage?»

¹¹ Na ɗaŋŋi aŋ hin dasiya, «Ni kay ana somoyogi noyon kiyo. Yawe di na. Asi liŋ tuɗ ki u loogi suu daŋga a goɓosira, goɓ kaŋga fokosi lay. An tanda asi noyon kiyo, haɗ manda lay asi vaɗ ka kasiɗi.

¹² Agi may ɗaŋŋi lagi dla cora ni suu somoyogiya, dukugi ni gegelay tuɗ irimmi fok u yamba eŋga, ka humunɗi.

¹³ An dikigi ki hu ndaŋga magira, hu ndaŋgara daŋga agi ka waɗɗi layra, somoyogi ka waɗɗi layra. Agi hin goɓogi kaŋga fok loogi suu daŋga faali lay, njeŋge lay, kay ana an hin ka saa a lagi dla jivi egegi oloɗi.»

Hoŋga hoŋ ayra ŋgolla

¹⁴ Na ɗaŋ buuna mba wa, Yawe di na. Hu buu namma wanni sa hin ka di ana, «Yawe ma sel suu Israelna ay ki hu mbassa Egiptena ka iiri» ɗi.

¹⁵ May hin di ni na ɗow ana, «Yawe ma sel suu Israelna ay ki hu mbassa mbayawra, ay ki hu mbassa nam njayasi ha ki huruɗta halaŋŋa.» Gasi, an hin hoŋosi ay hu ndaŋga mayra an ɦaɗ ki maŋ somoyosira.

Suu dlara vasina halaŋ hin yowosiya

¹⁶ An hin sun suu li sulukŋa ha ŋgol cocoo. Yawe di na. Asi hin halasi ay kiyo. An hin sun suu ci mburina ha ŋgol cocoo. Asi hin dikisi ay ki kay ɦinira halaŋ halaŋ, ta ta hu zul gogoyra lay.

¹⁷ Irin ka tinira kasi hu liisi ma tuɗtana ta, va ka viɗ irinɗi. Dla coosira ka ndak a ŋgay irinɗi.

¹⁸ An gijaŋ warakasi dla cora asi laɗta yasi mba' mba', dla cosira lay kay ana asi mbuɗun mbas manda ki njenjera u dlasira moli ko didiŋga nara, oyon joonna ki u dla coosira.

Lo ma dew ma gasi ma suuna halaŋ wamma

¹⁹ Yawe, saɓak manna u ŋgusu ma kanna, liin ma ŋgayra hu li ma wihawra. Suuna hin mbay ni egeŋu, suu ay keŋ ndaŋgara day dayna hin di ana, va ma somoyomi fam hu ɓorowna na ni dla cora kaboyna. Dlara ganyamba sa ka li sun u ndaɗɗira.

²⁰ Suu warna ndak a min loogina su? Tlesuu asi minisina ka ni looginaɗi.

²¹ Na ɗaŋŋi an hin ɦasi wira, ndaɗta wanni an hin takasi saɓak manna. Asi hin wi ana senni Yawe.