JEREMI 15 - Boy Lonana

Kaɓak ma kay suu vi Lonana a fafaɗta

¹ Yawe dan ana, lini gi Moiz u Samuel col fokon lay, an hin ka mbuɗ hurun kay suu asinaɗi. Dikisi ki fokonu, asi tuɗ kiyo.

² Lini asi joɓoŋ anaba, «Ami tuɗ ni arage?» Ni aŋ hoŋosi dira anaba, «Yawe ɓak ana, Maŋ maɗna, sa ki maŋ maɗna na. Maŋ ŋgewra, sa ki maŋ ŋgewra na. Maŋ mayra, sa ki maŋ mayra na. Maŋ mbaɓura, sa ki maŋ mbaɓura na.»

³ An cukusi suu duuna fiɗi kasi toŋgo zak. Yawe di na. Ŋgewra a casi kira, diginina a taɗasi kira, layagi suu huulonana u mburi suu kay ndaŋgarana a komosi kira.

⁴ An hin lasi ki ni a dlara tak mayra mbuɗ suu muli suu kay ndaŋgarana ndaana u ndaɗ halaŋga. Ni kay Manasse ma goŋ Ezekiyasna, mul ma Yudana, dlara nam laɗ hu Yerusalemba halaŋ.

Buu namma um ka jok fok oloɗi

⁵ Sa wak hahawakŋa ni ge? Ɗaŋ ge Yerusalem, ni ge a lak dla jivira egekŋi ge? Sa hin loɓ tam a humuk dlaakka na ni gege?

⁶ Ndak noyon ki ni ndaku. Yawe di na. Ndak ɦan ŋgorok wa, an tli kon kolo kak a cak ki ni na may. An ɦuɗ buuna fok ŋgol cocoo.

⁷ Hu ɦoŋzi ma hu mbassana, an tli kaalamba kon a njayasi kira. An ɓeŋ suu mansina ki ni u cira casi goryosi kira, na lay ni asi jok tuɗ masira kaɗi.

⁸ An hinisi boyogina ki varasi donora bolow coco ko ndal ŋgetlna fun lummana na. An mbaasi suu ci suuna ay kasi faali nduh nduh kay su goozoŋ ma duuna, sa wi kaɗi lay, an mbaaɗ dlara ndaana ay kaɗ viɗiɗ ki ni na gaw.

⁹ Cara vuɗ goora ki kiɗisiyara miɗ kiyo. Ndaɗ ka musuk oloɗi. Fataɗ ca ki hu buuna dukka gayra wa. Dlara zolona mba kaɗ wa. Ndaɗ mbuɗ ki zolona wa. Dlara hin ŋgoo daganda ni an caɗ ki u ŋgewra, hin ɦaɗ ki maŋ suu babali maɗsina. Di ni Yawe.

Jeremi yoo tamu. Lona soom hurumu

¹⁰ Ni hahaw me nage? Sunu, ndak vuɗun ki dukuɗ ge? An sa duk suuna hu mbassa halaŋ. Suuna ka mininɗi lay, ka dan dlan jiviɗi layna. An joɓ va kaɗi lay, tli va kaɗi lay. Asi halaŋ gan vunna.

¹¹ Yawe di ana, an ɓak ki u vunun ana tlesuu hin ka ŋgoroŋ daganna ni jivira. An di ki u vunun olo ana sa babali maŋŋa hin furi kaŋu, hu li ma hahawra u yoo tara.

¹² Sa ndak a kus ɓalaŋ ma col ay mbayawna ki u walakka ni gege?

¹³ Bege makka u tlegeyek an ɦasi ki maŋ suuna asi ɦurumusi kiyo. Ni warak ma vi dla cookka kay ndaŋga makka u ŋgoloɗ halaŋ.

¹⁴ An hin ɦak ki maŋ suu babali mak suu ki hu mbassa ndak ka waɗɗira. Ku yaanda hin kal ay kiyo. Ndaɗ ka vi kagiya.

¹⁵ Aŋu, aŋ wiya, Yawe, maa ki kanɗi. Aŋ njununu. Aŋ saan sugulun u suu lasanna. Ko an mbuɗ ki cora u juɓpa aŋ juɓpaɗi. Ni kaŋ aŋu, aŋ wi ana an ka vi ŋgulla kanni na.

¹⁶ Hu li ma an humuŋ boy maŋŋa wa gaw ni, an vam hurunu. Boy maŋŋa heɓen hurunu, mbuɗun hurun furi coco lay. Asi ɓakan ki u seŋ lay, Yawe Lo ma Saɓakŋa.

¹⁷ An ka tuɗ a hal ni jivi mandaɗi hu li ma an tuɗ eg suu luu u dlara na. U ndaa ma lam koŋŋa an kak ki keŋe kay ana aŋ oyon ndaana ki hurun cocoo.

¹⁸ Ni kay me tiita manda hin mbuɗ ki a fafaɗta nige? Mbil manna ka cilɗi lay, yara u ndarayanna lay nige? Gasi aŋ mbuɗ ki irinni ko goloŋga ganyamba mbo ka huɗira na.

¹⁹ Na ɗaŋŋi Yawe ɓak anaba, lini aŋ hoŋ aya, an hoŋoŋ ay wa ni, aŋ hin col fokonu. Lini hu li ma ɓak dlara feɗta aŋ ɓakŋi dlara ŋgolora ni, vunuŋ hin mbuɗ ki ni manna. Asi hin hoŋ ay egeŋu. Aŋ may ni hin ka hoŋ ha egesi na ɗowɗi.

²⁰ A col fok suu asinara ni an mbuɗuŋ ki ko gulumun kawi ma toɗina na. Asi hin duuruŋ lay, hin ka tew egeŋgi kay ana an ka u aŋu a suɗuŋ ki lay, buɗuŋ ki lay. Di na ni Yawe.

²¹ An buɗuŋ ki ko suu cona. An buɗuŋ ki ko suu ci maɗna.