JEREMI 14 - Boy Lonana

Cenda vi Jeremi hu li ma yona ka siɗina

¹ Hu li ma Yawe ɓak Jeremi kay yona hin ka siɗi.

² Yuda ka tiira, ɦoŋziiɗna ɓeŋ ki wa, nam mbuɗ ki ndufunda, ndaɗ ki kaki kaŋgaa, col ki kolo. Yerusalem tiira.

³ Suu ɓii magaara sun suu gorina ha hu li ma yona, asi tuɗ ha hu hurgukka ni asi fi yo ka hu oloɗi. Asi hoŋ ay vo u tlegeyesi yo ka huɗi, mbuɗi hahaw lay, mbuɗi zolo lay, ka furi oloɗi.

⁴ Kay ndaɗta ndaŋgara ki sooya, yona kaɗi, suu horokŋa hurusi ki ɓeŋiya, va ka kosi oloɗi.

⁵ Duk bubura ni dukka vuɗ goroɗna ki kaŋga may ni gi taɗ gaw, kay ana haɗna kaɗi.

⁶ Korra bagira mol ki kay li ma mbuyna. Asi tli cinisi kolo u semeɗna ko ndal bayakka na. Irisi loɓ ki ko juɓpa juɓ usunara kay ana nam ka oloɗi.

⁷ Lini suluk mamina ka kaami ɓakŋa kamiya, kay seŋ aŋ Yawe a fi ŋgara ni aŋ li ko aŋ minda na. Gasi ami ka bay hin tinda tin vunumi kaŋga ki tuwa, ami ki suluk fokoŋu.

⁸ Israel saa ni kaŋu, aŋ sa suɗ suuna ki hu li ma hahawrana. Aŋ hin mbuɗ taŋ ki hu mbassa ko koyna na, ko ndal sa tuɗ koyra hal lina kam a buu njeŋgena na ni nanage?

⁹ Ni kay me aŋ mbuɗ taŋ ki ko sa ma mbuɗ ki ndaana na, ko ndal sa duuna ka ndak a suɗ sa oloɗira na ni nanage? Doliɗi ni aŋ Yawe ka dukumiya. Ami humuŋ seŋ ki lay. Aŋ hinimi kiɗi.

Lona ka min hum cenda vi Jeremiraɗi

¹⁰ Na ɗaŋŋi Yawe ɓak suu asina ana, «Gasi, asi min ni poyra, asi ka gol tasi hu poy masira jiviɗi.» kay ana asi ka jivi ii Yaweɗi. Cecem wanda nam gasi u dla coosira ki koloo. Nam gasi daŋgayna kay coosira lay.

¹¹ Yawe dan ana, «Loɓ tan u suu asinaɗi. Joɓon jivi masira kasiɗi.

¹² Lini asi li laara lay, an ka humusi tii masinaɗi. Lini asi lan ɓivun ma ŋgalam kina u ma ɦawana lay ni, tle asina hurun ka vasiɗi. An hin casi ki u ŋgewra u baktara u tuguɗi bora.»

¹³ An dam ana, «Aa, Bu Suuna Yawe na may suu jok vun Lona dasi ana, ŋgewra hin ka cagiɗi. Baktara hin ka mba kagiɗi. An hin ɦagi jivira ka daɓbira hu li namma.»

¹⁴ Yawe hoŋon dira ana, «Dlara suu jok vun Lona ɓakaɗ u senda ki ni coo. An cukusi ay ka ni anɗi. An joɓosi va kaɗi lay. An dasi dla ha kaɗi lay. Wiisira ni ta kaboyna. Asi di ni boy ma um kaɗina. Dlara njaɗaɗ u yasira, dlara asi faɗ kolo duk ganyam suuna u ndaɗta ni boy ma asi ɓakamma.»

¹⁵ Ni kay ndaɗta, Yawe ɓak anaba, «Kay suu jok vun Lona suu ɓak ki u senna ni, an sunusi ha ka ni anɗi, ko asi saa ana ŋgewra u baktara hin ka mba kay mbas ndaɗtaɗi. Gasi an hin ci suu jok vun Lona suu asina ki ni u ŋgewra u baktara.

¹⁶ Suu asi ɓakasi dla ndaɗta nana hin cuk ki kaŋga keŋ voɗta Yerusalemba ko baktara u ŋgewra. Sa hin ka tososi maɗasiɗi lay. Asiya, boyogosiya, goryosi suu njufiina u gorɓiina ko ndaɗta na an hin cukusi coosira kasiya.»

Jeremi hom ki kay cora vi suu mamsinara

¹⁷ Aŋ hin ɓakasi boy namma, irin ka tii simina njeŋge lay, faali lay, ka soɗi. Dla cora ɓeŋen go tama manda, suu mansina ki wa, ni waɗta ci maɗna.

¹⁸ Lini an tuɗ hu senena lay, an fi suu casi ki u ŋgewrana. Lini an tuɗ ni ɦoŋzina lay, an fi suu mayra casi kina lay. Suu jok vun Lona u muli suu li ɓivunna ŋguy hu mbassa lay ka wi u boy kosiɗi.

¹⁹ Aŋ noy Yuda ki wa su? Aŋ ka min Siyon oloɗi su? Ni kay me aŋ waɗami u dla cora ka daɓbi lay ni ge? Ami juɓumi ni heɓpa may, ndaɗ ka mbaɗi. Ami juɓ li ma ami a fi garaɗta hurumma may ndaana mbay kamiya.

²⁰ Yawe ami wi dla coomira wa, wami dla cora vi somoyomira lay. Gasi ami li suluk fokoŋu.

²¹ U seŋ ma saɓakŋa ɦayna, aŋ noyomi kiɗi. Mbuɗ saɓak mul maŋga ki maŋiɗi. Hin galamba li dukuygiya. Aŋ ɓeŋeɗ kiɗi.

²² Duk fuli suu cona na ni, suu ndak a mba yo Lona ay kaŋgana ka su? Yona col sira ay ni kolo huulonaɗi su? Ka ni aŋ, Yawe, Loominaɗi su? Ami ka juɓuŋu kay ana aŋŋi sa li tle asinanaɗi su?