JEREMI 13 - Boy Lonana

Jeremi u baraw damba dereŋga

¹ Gola, ni dlara Yawe dandara, «Tuɗ gus gandi macili u baraw dlembana, njunum u furuŋu. Na may aŋ mbusum u yonaɗi.»

² An gus gandina ko Yawe danda na, hin njunum u furunu.

³ Olo, Yawe hin ɓakan ana,

⁴ «U gandi ma aŋ gusum njunum u furuŋŋa, aŋ tuɗ ɗiŋ mbo lum ma Farana kiyo, aŋ hin ŋgay ɗik namma ki hu zul gogoyra.»

⁵ An tuɗ ŋgayam ha ki hu Fara ko Yawe danda na.

⁶ Buuna jak ki jivi yo ca, Yawe danu, «Aŋ tuɗ ɗiŋ mbo lum ma Farana kiyo, hoŋ gandi ma an daŋ ana aŋ ŋgayam ha huwana ay kiyo.»

⁷ An tuɗ hu Fara a hal gandi ma an ŋgayamma a yowom ay kira, halam hu li ma an ŋgayam huna, gandi namma cim ki wa, ka jivi oloɗi.

⁸ Na ɗaŋŋi Yawe ɓakan anaba,

⁹ «Yawe ɓak anaba, ni ko ndaɗta na an hin ɓeŋ furira vi Yudara kiyo, furira jivira vi Yerusalemba.

¹⁰ Suu may suu co suu ka min a humun boy mannaɗina, tuɗ fok u su vunna, liŋ ki u loogi suu daŋŋa a goɓosira. Asi mbuɗ ki cora ko gandi namma ka jivi oloɗira na.

¹¹ Ko ndaɗta na asi njunusi gandina u furusiya, ni ko an njun suu Israelna halaŋ, suu Yudana halaŋ ki u furundana, Yawe di na, a asi mbuɗ ki suu mansina, sen ma geleɗta, sem ma saɓakŋa, dla jiv tara, na may asi min ka hum va dewɗi.»

Sum veŋ ma yara vi Bu Suunara

¹² Aŋ hin ɓakasi boy namma haa, «Yawe, Lona vi suu Israelna, ɓak anaba, Oyogi doyogina ki u sum veŋŋa halaŋ halaŋ.» Lini asi hoŋ dira ana, «Na may ami wi gasi ana doyogina halaŋ halaŋ asi oyosi ki u sum veŋŋa,» ni,

¹³ aŋ hin hoŋosi dira anaba, «Yawe ɓak ana, Suu hu mbas ndaɗtana halaŋ, muli suu hu njaf Davidna suu ka kay mul mambana, muli suu li ɓivunna suu jok vun Lona u suu hu Yerusalemma halaŋ, an hin guruɗusi ki halaŋ halaŋ.

¹⁴ An hin ɗaɓasi eg tasiya, kususi ki gegelay eg ndaramma, somoyosi u goryosiya hu li ma dewna. Yawe di na. Hahaw kaɗi, gi deɓ kaɗi, oo kaɗi, a dooron bay ɓeŋesi ki kaɗi.»

Humugi ki jew bay lina kal kiyo

¹⁵ Humugi haa, tinigi humigi jiviya, suugi vunnaɗi. Yawe ɓakŋi namu.

¹⁶ Ŋgaagi Yawe Loogina jew bay nam kuluɓugi lina kagi ndufunda, jew bay segi daɓ eg tlesuu kolo mbuy suu ndufunda viɗisi ki irigiya. Agi juɓugi kiɗikka may, nam mbuɗuɗ ki ndufunda ci maɗna, nam tin ɗugulla warra ay koloo.

¹⁷ Lini agi ka humbi ni, an hin mbuɗ tan ki hahawra hu liinna, kay ana dla ndaɗta ndakan wa, irin hin tii simina, tiira, mbus ki u simina, yoori suu vi Yawena tuɗ ki ni hu daŋgayna.

Suu cona sa ka saa kasiɗi ni asi njay kiwa

¹⁸ Di ha maŋ mulna, u su mulna, «Jum makka mulla cecemmi ndaɗ ndi ay ki kaŋga ni kay yakka su? Jum makka mulla ta jivira.

¹⁹ Ҥoŋzi ma dalina ki dukiya, sa ka mbay a malam vunum ki oloɗi. Suu Yudana halaŋ yowosi ki wa, ni yowra ŋgolla.»

²⁰ Tli iriŋ kolo gol haa, asi ka mbay mbayawi, yoori suu varaŋŋa ni arage? Timigii maŋ suu ŋgaaŋŋa ni arage?

²¹ Aŋ hin di ni me ologe hu li ma suu aŋ haɗasi ki u wihaw maŋgana, suu ki vo varaŋŋa hin mbuɗ ki iriŋ cora. Gasi tiitara hin faŋu, ko ndal cara hu buu ma vuɗta na.

²² Ndak hin joɓ tak ana, «Dla ndaɗta mbay kanni kay mege?» Ni kay dla cookka ŋgolla asi mbay ɗuɗuk baraw makka ki kolo ni naɗi su? Asi durukŋi na lay.

²³ Sa warna ndak a mbuɗ bakka haɓpa egem su? Sindilna ndak a mbuɗ tlimiɗta ndalira ki zeɗ su? Agi suu haɗ ki u dla corana ndak a lagi dlara jivira su?

²⁴ An hin njayagi ki ko usuna na duk semeɗ ma hu fullana.

²⁵ Gola ni dla cookka. Ni ta an ŋgaakka kakka. Yawe di na. Ndak mayra maaran ki hin li dlara bay uɗta.

²⁶ Na ɗaŋŋi an fokok baraw makka ki kay yaku. Asi hin wak uk kiyo.

²⁷ Dla zoŋ makka, yira ndak yi suuna a li zoŋgara, gawlaŋ mak ma bay zolona kolo kay ɦinira, hu senena, an wak dla cookka. Ҥii, Yerusalem, ndak ka ndak a mbuɗ tak ki jivi teteɗ a tuɗ unɗira ni buuna ga ologe?