JEREMI 11 - Boy Lonana

Banara ɓeŋ kiwa

¹ Yawe ɓak boy mamma maŋ Jeremi.

² Humugi dla bana ndaɗta haa. Aŋ ɓak suu Yudana, maŋ suu Yerusalemma.

³ Aŋ hin dasi ana, «Yawe Lona vi suu Israelna ɓak anaba, cora ka kay sa hum ka u dla bana ndaɗtaɗina.

⁴ Ta an ɓakaɗ dlaɗ ay maŋ somoyogi hu li ma an cukusi ay ki hu mbassa Egiptera, hu li ma kura cocona. Humungi delenu, takangi dlara an ɓakagirara ki kiɗiki. Na ɗaŋŋi agi hin mbuɗ ki suu mansina may. An hin mbuɗ ki Loogina may.

⁵ Na ɗaŋŋi an hin li u vi vun ma an vam u somoyogi ana an hin ɦasi mbas mayra mbiira u mbul yumma ɓaɗ huruɗta may. Agi ka karammi huruɗ daŋ may.» An hoŋom dira ana, «Amin, Yawe.»

⁶ Yawe dan ana, «Tuɗ ɓak boy namma ki hu ɦoŋzi ma Yudana halaŋ, ki hu voɗta Yerusalemba halaŋ may ana, humugi dlara kay galambara haa, hin takagi dla ndaɗta ki kiɗik may.

⁷ An fi tan u somoyogi ay hu buu ma an cukusi ay ki hu mbassa Egiptera day karami, an vi vunun u asiya loɓ ka ki dukgi. Hoŋosi dira tew tew ana, humungi delenu.

⁸ Na may asi hum kaɗi. Asi tin humusi kaɗi lay. Gegelay su vunna ki u yasira eŋga ka haɓbira. Na lay ni an li dlara an ɓakaɗ kay galambara egesiya, ta an ɓakasi ana asi takaɗ ki kiɗikira asi hin takaɗ ka ki kiɗiki lay.»

⁹ Yawe dan ana, «Dlara kaboyna mba duk suu Yudana u suu Yerusalemma.

¹⁰ Asi hoŋ tasi ki hu suluk ma vi somoyosi ma ka min a humun boy mannaɗina. Asi may ɗaŋŋi liŋ tuɗ ki u loogi suu daŋŋa a goɓosiya. Suu Yudana u suu Yerusalemma may ni buɗ galamba an vaɗ u somoyosira kiyo.

¹¹ Na ɗaŋŋi, Yawe ɓak anaba, an hin mbaasi dla cora ay kasiya, asi hin ka ndak a taɗ tasi kiɗi. Asi hin yan ay ana an mbay njunusiya, an hin ka humusiɗi.

¹² Ҥoŋzi ma Yudana u suu Yerusalemma hin tuɗ joɓ njunda ay eg loogi suu asi lasi ɓivun ma ŋgalam kina. Na may asi ka ndak a suɗusi ki hu li ma dla cora mba kasinaɗi.

¹³ «Loogi maŋsina mbuɗ ki bolow coco ko ɦoŋziiŋŋa na lay aŋ Yuda, otel ma li ɓivun ma agi minimma mbuɗ ki zolona lay. Otel ma ŋgal ɓivunna maŋ Baal huna bolow coco ko voɗ maŋga na lay Yerusalem.

¹⁴ «Aŋu, tli dlaŋ suu asinara kaŋgi. Yoo taŋ kasiɗi lay, cen kasiɗi lay, kay ana hu li ma asi hin yan an hin ka humbi, hu li ma hahawra mba kasina.»

Bu Suuna ka gu cono mamba kiyo

¹⁵ Va ndaɗ mbay lam hu ziindana ni mege ta an miniɗ ɦayra? Dlara ndaɗ laɗta halaŋŋi oyra hu ni dla cora. Na ni tlesuu ɦasi ɦawana u tliw ma ŋgaɗam kina ndak a dikik dla cora ki egek su? Ndak hin suɗ tak ki ko dla cora ni u boy namma su?

¹⁶ «Gu conora humuɗ warra tew tewra, jivira u vuɗuɗ ma jivi cocona,» sek ma Yawe tinikŋa kakŋa ni na. Duk vun ma ŋgol cocona, nam ŋgalaɗ humuɗ ki u kura. Asi kusuɗ gogor koɗ kiyo.

¹⁷ Ni Yawe, ma Saɓakŋa Kom Belna, sa pakŋa mbaak dla cora ay kakŋi kay dla cora suu Israelna u suu Yudana laɗta. Asi li cora egem u ɓivun ma asi ŋgalam maŋ Baalna.

Suu vi Jeremina lam dla cora egemu

¹⁸ Hu li ma Yawe ɓakan dla ndaɗta ki an humuɗna, na ɗaŋŋi an fasi suu sun masira kiyo.

¹⁹ Anni ko goo timii ma lalamma na, tuɗum hu li ma ŋgaɗtara na. An ka wi ana dla cora asi laɗta ni kan layraɗi. «Kaaygi ŋgusna ki u mbiirim egemu, kaaygina ki hu mbassa vi suu iirinara. Ka sa yam sem oloɗi.»

²⁰ Yawe, ma Saɓakŋa Kom Belna, aŋ sa ti mulla u ɗegeerana, aŋ sa wi huu suuna u saarasi layna. An hin wi dlara aŋ hin lasira egesira kay ana an hin tanni hu duk koŋu.

²¹ Na ɗaŋŋi Yawe ɓak eg suu Anatotna, suu min a caŋ kina, di ana, «Ɓakagi boyna ha ki u sem Yawe oloɗi, li ka naɗi ni aŋ hin miɗ ki komiya.»

²² Na ɗaŋŋi Yawe, ma Saɓakŋa Kom Belna, ɓak anaba, «An hin kaasi ɓakŋa kasiya, gor zoŋŋi masisina hin casi ki u ŋgewina. Goryosi suu njufiina u gorɓiina hin miɗ ki ko mayra.

²³ Sa ka hin varasi dewɗi lay. An hin mbaa dla cora ay kay suu Anatotna hu basara asi hin ɓak dlaasira kira.»