JEREMI 10 - Boy Lonana

Loogi suu ɦawana fun tasi u Lo ma gasina

¹ Humugi boy ma Yawe ɓakam kagi agi suu Israelna haa.

² Na ɗaŋŋi Yawe ɓak anaba, kalagi tagi hu dlaŋ suunara bay uɗtaɗi. Mbuɗugi ndaana fok dlara tak taɗ kolo huulonaraɗi. Suu ɦawana li ndaana koɗ ni asiya.

³ Na may gaɗ masira uɗ kaɗi. Gu ma kaam ay ki duk gurana, sa li sun guna ceɗem tam ki jivina.

⁴ Guluɗum tam ki u doonora u lorra, ɓalam ki kaŋga u pondina u do caffa ka nam gun ki oloɗi.

⁵ Fuli asina ni ko ndal tlesuu mbaɗ tara hu sene kuusira na, asi ka ɓakgi, yowosi ɗow, asi ka ndak a tuɗɗi. Lagi ndaa kosiɗi, asi ka li va co eg saɗi, asi ka ndak a sunugi ha hu fokkaɗi.

⁶ Sa ko ndal aŋ na kaɗi, Yawe. Aŋ ŋgolo, seŋ ŋgolo u saɓakam may.

⁷ Sa hin ka laŋ ndaaraŋgi na ni gege, mul ma vi suunana. Dla ndaɗta ni ŋgol maŋga. Duk suu yalna halaŋ lay, duk mulina halaŋ lay, sa ko aŋ na kaɗi.

⁸ Asi halaŋ, sa hin ka ki dewɗi, ganyam tasiya, viɗ tasi ki lay. Haɗasi ki u dlara bay uɗta asi hin ba ni huwa.

⁹ Fuli asina ni zew doonora yowoɗ ay Tarsissa, lorra ay Ufassa, suu li sun guna u suu yoo tlena laɗta, hooroɗ walakka taɗ guyvun guyvunda egeɗ may, ta tlawra egeɗ may. Asi halaŋŋi sunda vi suu wi sun ndaɗtana.

¹⁰ Na may Yawe Lona ni gasira, nammi Lo ma iirina, mulna a fafaɗta. Hu li ma hurum mbuɗ yara wa ni ndaŋgara dlakka, suuna ka ndak a col fok yaambaɗi.

¹¹ Gola ni dlara agi hin dasirara, loogi suu li huulona u ndaŋgara kaɗina hin bulum ki kay ndaŋgara, ki kaŋga u huulona.

¹² Sa ma li ndaŋgara u saɓak mammana, ma min duliyara u yal mammana, ma u wiimba li huulona mayna,

¹³ kay ana nam tok mbo ma saɓak cocona ki kolo huulona, nam hin ɗugulla ŋgolora tin kolo kay ndaŋgara hu uɗ ma daɓ ayna, nam hin yona si kaŋga kaygi u welera lay. Nam sel semeɗ ma ay hu gurumma ki kaygiya.

¹⁴ Gegelay hin kagira u ndaana, ki doori lay. Suu yoo tlena mbuɗ ki zolona kay fuli masisina, foto mburi masisina ki coo, ŋgus ka hurusiɗi.

¹⁵ Ni dlara bay uɗta, ni tlesuu luuna hu buu ma kaɓakŋa ni asi hin miɗ kiyo.

¹⁶ Sa li jivira maŋ Yakobma ka naɗi. Nammi sa li tlena halaŋŋa. Israel ni deera hin yowom joomba. Yawe, ma Saɓakŋa Kom Belna, ni semu.

Dla cora mba wa tok

¹⁷ Yow giɗ makka kaŋga duk ndaŋgara, ndak mayra asi ŋguyuk kira.

¹⁸ Na ɗaŋŋi Yawe ɓak anaba, wanda ɗaŋŋi an hin dik suu hu mbassana kiyo. An ɦeɓesi kolo na peɗeɗ, ka asi suɗ kiɗi.

¹⁹ An sa hahawra, ni dla co me nage? Mbil manna ka cilɗi. An tanda di ana gasi daŋ may ni dla coonda, an ndak a vaɗ kanu.

²⁰ Mbutluɓ manna ɓeŋ ki wa, a ɓuɗom zewem ki halaŋ lay. Goryon u liin ma kakka ka oloɗi. Sa ka minin mbutluɓ manna kolo oloɗi, a minin liin ma kakka oloɗi.

²¹ Suu taa suuna ki giniŋi, asi ka hal Yaweɗi. Ni kay ndaɗta saɓakasi kaɗi, yoorina halaŋ hin ki kay tasiya.

²² Asi hum vunna ka ɦuɗ aya, dla cora ŋgolla mbay hu mbassa mbayawra a mbuɗ ɦoŋzi ma Yudana ki hahawra, li ma bayakka mol huna.

Cenda Jeremi cen kay suu mamsinara

²³ Yawe, an wi ana sana ka ni malaŋ voɗta nam tlaɗtaɗi. Sa tuɗ lina ka wi yal ma nam tuɗ u nammaɗi.

²⁴ Gaɗanu, Yawe, na may u ɗigilla ka u yaraɗi, kay aŋ hin bulumun ki ko va kaɗina naɗi.

²⁵ Aŋ hin yaaŋga li ni kay suu ka waŋgina kay suu ka yaŋ seŋgina, kay asi kul tlena vi Yakob kiyo. Asi cam kiyo. Asi daɓam dlam kiyo. Asi yowom tlegeyem kiyo.