JEREMI 1 - Boy Lonana

¹ Boy ma Jeremi goŋ Hilkiyana damma, ma duk muli suu li ɓivunna kaki hu Anatot hu ndaŋgara vi Benjaminda.

² Yawe ɓakam boyna ni hu li ma Josiyas ma goŋ Amonna a mulna hu Yudana, hu basaɗamba doogo yam hindira.

³ Nam ɓakam olo hu li ma Joakim, goŋ Josiyasna ma mul ma Yudana ta ta hu daɓpa vi basara doogo yam dewra Sedesiyas goŋ Josiyasna mul ma hu Yudana ta ta yowra yow suu Israelna daŋgayna hu til ma vadlna.

BOYNA KAY JUDA Lona yi Jeremi a mbuɗum ki sa jok vun Lona

⁴ Yawe ɓakan boyna ana,

⁵ «Bay an laŋ ay hu suŋ tura ni an waŋu. Bay aŋ kal ay ki huruɗ tura ni an manaŋu. An mbuɗuŋ ki sa jok vun Lona maŋ suuna halaŋ.»

⁶ An di ana, «Aa, Bu Suuna Yawe, an hin ka wi ɓakŋaɗi. An goo cocoo.»

⁷ Yawe dan ana, «Aŋ di ana, aŋ goo cocoraɗi. Li ma an a sunuŋ huna halaŋŋi aŋ tuɗa, dlara an daŋgara halaŋŋi aŋ daɗ ha kiyo.

⁸ Aŋ li ndaa saɗi. An ka u aŋ a buɗuŋ kira. Yawe di na.»

⁹ Yawe maɗ kom maɗni, laman vununu. Yawe hin dan ana, «Ko ndaɗta na an hiniŋ boy manna funuŋ wa.

¹⁰ Aŋ wi ki kaŋ ana an ɦaŋ karam saɓakŋa kay suuna, kay mulina lay, a paɗasi ki u sariyasiya, bowosi ki kaŋgaa, toosi kiyo, hawaɗasi kiyo, a hoŋosi kolo minda, hoŋosi pira balamasi may.»

Tlesuu Jeremi wasina, ko gu amandana na u doyra

¹¹ Yawe ɓakan boy mamma ana, «Aŋ wi ni mege, Jeremi?» An dam ana, «Va an wamma ni ko gu amandana na.»

¹² Yawe dan ana, «Aŋ wam ki jiviya. An ka faɗ vun dlara an daɗta kiyo.»

¹³ Yawe ɓakan boy mamma sem a mbara ana, «Aŋ wi ni mege?» An dam ana, «Va an wamma ni doyra tini kay givinna zal na walak walak vunuɗ tinira ii ko ma mbayawna na ɗow.»

¹⁴ Yawe dan ana, «Ni ii ko ma mbayawna dla cora hin li saɓaki ŋgolla kay suu hu mbassana halaŋ.

¹⁵ An hin yi njaf muli suu ii ko ma mbayawna u deeresi halaŋ. Yawe di na. Asi mbaya, gegelay tin dlam mamba mulla vun grek ma vi Yerusalemma, irisi tini kay gulumun ma ŋguy kaɗna na ɗow, irisi tini kay ɦoŋzi ma Yudana na ɗow.

¹⁶ «An ɓakasi gaɗ manda kay boy dla coosira. Asi noyon kiyo. Asi li ɓivun ma ŋgalam kina maŋ loogi suu ɦawana. Asi goɓ kaŋga fok sunda asi laɗ u kosira.

¹⁷ Aŋ may ni, aŋ hin njun u furuŋu, col kolo ɓakasi dlara an daŋgara, hinisi a asi su kaŋgi. Li ka naɗi ni an hin su kaŋ fokosi may.

¹⁸ An tanda karam an mbuɗuŋ ki ni li ma saɓakŋa, mbal kawina, gulumun walakka. Iriŋ tinira kay mbassa u dlaɗ halaŋ. Iriŋ tinira kay muli suu Yudana kay suu ŋgolo mam suu sunda kay muli mam suu li ɓivunna, kay suu mam suu duuna lay.

¹⁹ Asi hin duu u aŋu, na may asi ka ndak a laŋ va egeŋgi.» Yawe di ana, «An ka u aŋ a buɗuŋ kira.»