Magaara Vi Sa Jok Vun Lona OZE 9 - Boy Lonana

Israel hin ti ni tlesuu njenjena

¹ Israel kal furira ki kak coco ko ndal suuna naɗi, kay ana ndak li dlara zoŋga, tuɗ ki eg Lookŋa day lay, ndak min ni warak ma ɦakŋa hu li ma to wana belna.

² Li ma to wana huna u li ma em mbulna huna hin ka heɓek hurukgi. Sum veŋ ma wilina hin viɗisi juɓ masira kiyo.

³ Asi hin ka tew a kak hu mbassa vi Yaweraɗi. Efrayim hin hoŋŋi hu Egipte, hu Asiri ni asi hin ti ni tlesuu njenjena.

⁴ Asi hin ka mba sum veŋŋa ay a li ɓivunna maŋ Yaweɗi, ɓivun masi ma asi lamma hurum hin ka furiyumbi. Nam hin li kasi ni ko ndal fu ma tam u hahawrana na, suu tamma halaŋ hin mbuɗ ki njenjee, kay ana fuusi na hin ɦuɗusi iiri masira fokŋi namu, nam hin ka kal hu zira vi Yaweraɗi.

⁵ Agi hin lagi ni nana hu buu ma ŋgaf yam tarage, hu buu ma luuna vi Yawena ge?

Asi hin tin vun ndemma u suu jok vun Lona

⁶ Gola, asi ŋgay tasi ki ko ɓeŋga wa, Egipte hin tokosi eg tasiya. Memfis hin li ni a zulusira tososira. Bege masira jivira gu njaana hin taɗ kiyo, gu wayra hin tlasi liisi ma mbutluɓma huna kiyo.

⁷ Li ma kaɓakŋa mba wa, li ma ɓak dlara mba wa, Israel wam kiyo. Sa jok vun Lona mbuɗ ki laɓaa, mbuɗ ni sa saaram kaɗina, ni kay ŋgol dla cora aŋ laɗta, ni kay ŋgol duu ma aŋ duurumma.

⁸ Sa golla vi Efrayim ka eg Loonna, ni sa jok vun Lona. Asi gunum dawna kaŋga hu voɗ mamba halaŋ, asi duurum ta ta hu zira vi Loommara.

⁹ Asi tuɗ ha ki duk na day u ganyamba ko ndal hu buu ma vi Gibeana na. Lona humum hin gam kay ci maɗ masina nam hin joɓosi ki kay suluk masina.

Dla cora vi ful ma basinara

¹⁰ An fi Israel ni ko ndal vuɗ gugutlu ma ay ki bagi hu fullana na, ko ndal vuɗ tulum ma famma kolo humum jewna na, an wagi somoyogiya. Asi may ni mba hu Baal Peor mbuɗ tasi ki zolona ni na gaw, asi mbuɗ ki ni suu cona ko ndal va hurusi minimma na.

¹¹ Efrayim, va takaŋ bibiŋil maŋga kina hin pii ki ko layna, hu vuɗ mamba gaw, hu vira vam wirimba gaw lay.

¹² Li ni asi wul gorra lay ni, an hin casi ki jew bay asi mbuɗ ki suu warna. Ni gasi, hahawra ka kasiya hu li ma an hin ɦuɗ tan ki egesina.

¹³ Efrayim, an wammi ko ndal Tir ta daŋga na, piira hu li ma ŋgusu cocona, na may Efrayim hin ɦal goryom ki a casi kira.

¹⁴ Ҥasiya, Yawe, an hin ɦasi ni mege? Ҥasi hayra geɗira, po ma mbiirim ka hurumbina.

¹⁵ Dla coosira halaŋ tak taɗ ay ki hu Gilgal, ay ni hu li namma day an mbuɗ hurun ki egesi cora ni na gaw ni kay dla coosira asi laɗta an hin dikisi ki hu ziinda, an hin ka minisi oloɗi, muli masisina halaŋŋi suu duu u anna.

¹⁶ An poŋ Efrayim, sarayam ki sooya, nam ka vuɗɗi. Li ni nam vuɗ goora lay an hin cam goryom suu hurum vasina kiyo.

¹⁷ Loonna hin zuɗusi kiyo, kay ana asi humum kaɗi. Asi hin gijaŋ poy kolo duk njaf suuna.