Magaara Vi Sa Jok Vun Lona OZE 8 - Boy Lonana

Lona yoo tam kay yira yam a koynara

¹ Bu tokolomma. Ko ndal ɓarawna na dla cora ka tuɗ ha kay zi ma vi Yawena, kay ana asi calaɗ ki kay vi vun manna wa, mbuɗ yara egen kay gaɗ manda.

² Asi yan ay kolo ana, «Loomina, ami waŋ wa, ami suu Israelna.»

³ Israel noy dlara jivira kiyo, suu babali maɗsina dikiɗu.

⁴ Asi tin mulina fokosi bay an huwa, bay an huwa, asi tin suu mulina. U doono masira u lor masira asi min fulina, ni a bulumusi ki ni tasira.

⁵ Goo mbutl makŋa noyom kiyo, Samari. Yaanda ndi kasi wa, ta ta hu buu ma asi ka tew a li dla cora oloɗina su?

⁶ Nam mbay ni hu Israel, sa ceɗ tlena lammi namu, nam ka Lonaɗi. Gasi goo mbutl ma Samarina hin hoŋŋi kamiyamu.

⁷ Asi zaa kaŋga ni semeɗna, asi hin feɗ ni babaana may. Wa ma bay yam iinana hin ka luɗ fuɗɗi, lini fuɗta ka na nde lay ni suu koyogina taɗ ki ni asiya.

⁸ Israel ki ligiya, gola asi ka duk njaf suuna ni ko ndal va ma sunum kaɗina na.

⁹ Hu li ma asi tuɗ ha kay Asirina ko ndal korra viɗ ki duk bubura kay taɗ dewra na. Suu vi Efrayimma gus tasi ni gusiya.

¹⁰ Lini asi ka ɓorow tlena ki ɦawa maŋ suuna lay ni, an hin tokosi eg tasi cecemi, kak njok daŋŋi asi hin gijaŋ dlak ko nekka suu mulina hin tinisira kasira.

¹¹ Efrayim zul otel ma li ɓivunna coco a bulum cora kira. Na may gologiya, otel ma li ɓivun namma mbuɗ ni va ma kalam hu cora.

¹² Lini an ɓiirim gaɗ manda na buɓ lay ni asi hin goloɗ ni ko ndal va ma col ay ki ko sa daŋŋana na.

¹³ Ko va ma lam a ɓivunnana na ni, asi ŋgaɗ tliwna ŋgaɗ ni hin komomu, na may ni Yawe hurum ka furiɗi. Cecem wanda nam ka ndumusi coosira komu. Nam hin joɓosi ki kay coosira. Asi hin hoŋŋi hu Egipte.

¹⁴ Israel maa ki kay sa laɗna wa, na may ndaɗ min zigini suu jivina kaɗu. Yuda may ni zul ɦoŋzi ma jivi ma saɓakŋa ni zuliya. Na may an hin sun kura ay kay ɦoŋzi namma ndaɗ hin ŋgal zigini suu jivi asina kiyo.