Magaara Vi Sa Jok Vun Lona OZE 7 - Boy Lonana

¹ Hu li ma an a cil mbil Israel gawna ni, cora vi Efrayimba uɗ hin gi ki kolo u ci maɗ ma vi suu Samarina. Gasi asi li ni dlara li iira. Suu ɦulla sel ay vo hu zina, ha ki bunsu wanni suu li dla cora ɦurum suuna may.

² Asi may ni ka ɓak tasi hurusi kurufu ana dla cora asi laɗta halaŋŋi an ka ndumuɗ kanuraɗi. Cecem wanda dla coosira ka tini kasiya, ndaɗ ka fokonu.

Tum ura kay suu mulina

³ U dla coosira asi pan mulna u ganyam masira asi pan suu ŋgolona lay.

⁴ Asi halaŋ li zoŋga, asi ni ko ndal kura ŋgolla sa gi mappana gaɗna ŋgik ŋgik hiniɗ vunuɗ vi kaŋga a juɓ mappana nam bu ay ki tura na.

⁵ Hu buu ma vi mul mayginana ni suu mulina hin mbuɗ tasi ki tuguɗiira u ndoos sum veŋŋa, asi hin maɗ kosi maŋ suu pan suuna.

⁶ Kay ana asi ɦuɗ tasi ay ko ndal kura hu zul ŋgollara na, hurusi oyra u ganyamba, njeŋgera bel ni yaasira buu sene, maɗii wanni ndaɗ ŋgal ko ndal kura ŋgol saɓak cocora na.

⁷ Asi halaŋ gi ki kura ko ndal ku jojokka na, asi ci suu ŋgolo masi suu fokosina kiyo, asi ci muli masisina kiyo, dukusi halaŋŋi sana dew lay a yan ha kolo kaɗi.

Ŋga ŋgaɗta Israel laɗ maŋ Lonara

⁸ Efrayim hin a tlum tam ki u suu hiŋŋa, Efrayimmi faŋgasa ma asi pereɗem irim kaŋgaɗina.

⁹ Suu koyogina tam saɓakam may, nam ka wi va dewɗi. Hussa tlum ki kay yam lay, nam ka wi va dewɗi.

¹⁰ Ŋga tara vi Israella kaaɗ ɓakŋa kaɗ lay, asi ka hoŋ ay eg Yawe Loosinaɗi. Dla ndaɗta li na lay ni asi ka min a halambi.

¹¹ Efrayimmi gugukka giniŋga totoonoɗ kaɗira, asi yi Egipte lay, asi liŋ hu Asiri lay.

¹² Hu li ma asi liŋ nana an cukusi bay manna kasiya. An casi ko ndal laygi suu huulonana na. An yowosi hu li ma an humusi delesi asi ka tok tasina.

¹³ Cora ka kasiya kay asi ŋgay tasi konu. Ɓeŋga ka kasiya kay asi mbuɗ tasi ki suu babali mansina. An may ni hin buɗusi ay ki ni buɗiya, asi suu kaan boyna kanna.

¹⁴ Asi yan ha kolo ni ka u hurusi ma ay kurufu daynaɗi. Hu li ma asi yoo tasi hu liisi ma buuna ni, asi jii tasiya kay joɓ wana u sum veŋ ma wilinara. Asi tak yasira eŋga ki ni egenu.

¹⁵ An tuɗ u asiya, mbuɗusi bikisi saɓaki, may asi ɓakan dla cora egenu.

¹⁶ Li ni asi hoŋ aya ni, ka hoŋ ay ni egenɗi, asi ni ko ndal gu mbuurura eŋeɗ kaɗira na. Muli masisina hin casi ki u ŋgewra, ni kay dla cora vunusi daɗta, asi hin san usi hu mbassa Egiptera.