Magaara Vi Sa Jok Vun Lona OZE 6 - Boy Lonana

¹ «Mbaagi aya, hoŋoygi eg Yawe. Nammi sa dakaygi kina, nam hin ciliygi ki ni nam lay. Nam waɗaygiya, nam hin njunuygi mbiliygi ni nam lay.

² Tew buuna mba' ni nam hoŋoygi ki iiriya, hu buu ma hindina ni nam ka coloygi ki koloo, aygi hin kak iiri fokomu.

³ Loɓoygi taygi a waygi Yawe, col mamba kolora ni gasi ko ndal li ma fora na may. Nam hin mbay egeygi ko ndal yona mbay sirara na ko ndal mbaɗagira vun ndolla laɓ yam ndaŋgara na.»

⁴ An hin laŋŋi nanage, Efrayim? An hin laŋŋi nanage Yuda? Min magira ni ko ndal ɗugulla maɗiira na, ko ndal mbaɗagira jakka na.

⁵ Kay ndaɗta an waɗagi u suu jok vun lona. An casi ki u boy ma kal ha ki fununna, ɓak man ma kara njay ha ki ko kiɗikka na.

⁶ Kay ana minda ni va ma hurun furiyumma, ka ni ɓivun ma liraɗi, wira wi Lonara an miniɗ ŋgolla ni suu ɓivun ma ŋgalam ki ŋgalina.

Lona di ki u vunum ana Israel gam um kiyo

⁷ Asi may ni, ko ndal suuna calaɗ kay vi vunnara na, gola ni boy ma asi gan un ki u namma.

⁸ Galaad ni ɦoŋzi ma vi suu cona, balam busuna hu cocoo.

⁹ Ko ndal suuna yow u tasi bolowra ŋgay tasi kaŋga voɗ suuna, muli suu li ɓivunna u tasi bolowra ci suuna hu voɗta Sekemba na. Gola ni dla cora asi laɗta.

¹⁰ Hu ɦoŋzi ma Israelna, an wi tlesuu co ɦayna, ni dla cora vi Efrayimba, Israel mbuɗ taɗ njenjera ki um wa lay.

¹¹ Mak ndak Yuda may ni, an ka min tan a feɗta hu li ma an hin mbuɗ dlara vi suu mansina kira.