Magaara Vi Sa Jok Vun Lona OZE 5 - Boy Lonana

Gi humba maŋ muli suu li ɓivunna u mulna

¹ Humugi dlara wanda haa, agi muli suu li ɓivunna, tinigi humugi jiviya suu Israelna. Suu vi mulnana tinigi humugi jiviya. Agi ni suu a kaɓakŋa u ɗegeera na, doli ɗaŋŋi agi ni ko ndal daw ma gunum hu ɦoŋzi ma Mispana na, ko ndal bay ma gunum kolo kay yam ɦinira Taborra na.

² Suu li dla cora vek zul ŋgolla kaŋga na yik yik, an tanda may ni ka min tan a cukusi daŋgayna halaŋ.

³ An tanda wi Efrayim, Israel lay ni ka ki irin ŋgayɗi. Efrayim u zuɗta aŋ zuɗ Israel a li dla corara, Israel ɓeŋ ki wa.

⁴ Dlara asi laɗta mbuɗusi hoŋ masira eg Loosinara ki loɓma kay ana saara li gawlaŋŋa oy ki varasi wa, asi ka wi Yaweɗi.

⁵ Ŋga tara vi Israella ɓak ki kaɗu. Israel u Efrayim ka daɓ sesi eg coosira, Yuda may ni ka daɓ seɗ u asi may.

⁶ U yoori masi suu gorina lay, suu ŋgolona lay asi mbay a hal Yawe may asi hin ka fambi. Nam ɓorow duk ɦoŋom ki u asi wa.

⁷ Asi gi u Yawe kiyo, kay asi vuɗ gor suu mboymona. Cecem wanda luu ma asi luu fun tilna hin casi ki u tlesuu hu joosina lay.

Duu ma duk ɦoŋ Israel u Yudana

⁸ Buugi tokolomma ha hu Gibea, tokolomma hu Rama, gagi dlara hahawra ha kay Bethel ta kura, asi ka vaŋ ay ŋgoroŋ dagan Benjamin.

⁹ Efrayim hin mbuɗ ki ni jona hu buu ma kaɓakŋa. Duk ɦoŋ njaf suu Israelna an dagi ni dlara gasira.

¹⁰ Suu muli suu vi Yudana ni suu jok u ii hakara, an hin tinisi yaanda kasi ŋgol cocoo.

¹¹ Efrayim ki dooriya, toom ki hu ɓakŋa wa, kay ana nam vi tam a liŋ na ta ta u dlara uɗ kaɗira.

¹² An tanda may ni an hin li ni ko ndal njufulna na kay Efrayim, ko ndal tuguɗii siina na kay suu vi Yudana.

¹³ Efrayim wi tuguɗii mamba wa, Yuda wi mbil ndoɗi mamma wa. Efrayim tuɗ ha eg Asiri, cuk gor suu sunda ay eg mul ma ŋgolna, nam may ni ka ndak a garaɗagi tuguɗii magira kiɗi lay, ka ndak a buɗugi ki ko mbil ndoɗinaɗi lay.

¹⁴ Suu na nde, an tanda hin li ni a dlona kay Efrayim, ko ndal goo dlona na kay suu vi Yudana. Ni anu, an sa hin haragi kina, olo an hin tuɗ u tliw manna, sa hin ka ɓaɗam konɗi.

Lona hurum ɓeŋ kiyo, col a ɦuɗ tam kiyo

¹⁵ An hin tuɗa. An hin hoŋ vo varan ta ta hu buu ma asi hin di ki u vunusi ana asi ni suu li corana. Asi halanni anu na. Hu hahaw masira asi hin gijaŋ joɓon dlanu.