Magaara Vi Sa Jok Vun Lona OZE 4 - Boy Lonana

Lona ka li ɓakŋa u Israel

¹ Humugi boy ma vi Yawena haa, goryoŋ Israelna. Yawe ka li ɓakŋa u suu hu mbassana, kay ana dlara gasira u minda kaɗi lay, wira wi Lonara ka hu mbassa oloɗi.

² Gi vunna, ganyamba, ci maɗna, ɦulla, li zoŋga zul ni zuli na ɗow ɗow. Busu ma voom ki kaŋgana fi tam ha ni na gaw gaw.

³ Mbassa lay ni mbuɗ ki hahawi. Suu huruɗna hin miɗ kiyo. Mbuuri suu hu senenana lay, laygi suu huulonana lay, kuluf ma duk mbo lum ma ŋgolnana lay hin daɓ kiyo.

Lona kaɓakŋa kay muli suu li ɓivun suu Israelna

⁴ Gologi tagi jiviya. Sa ka hal dlara doo kay tambi, ka sa ci wayɗi, ka suu maŋsina ɗowba, aŋ taŋga ɗowba muli suu li ɓivunna lay hal boy ma ɓakgi.

⁵ Aŋ hin daɓ taŋ kolo hu buuna, sa jok vun lona lay hin daɓ tam kolo u aŋ njeŋgee. An hin mbuɗuŋ suŋ vunuɗ ka ɓakgi.

⁶ Suu mansina lay hin mbuɗ ka ɓakgi, ni cora kay asi ka wi dlaɗira, kay ana asi zuɗ wira wi dlara kiyo an hin zuɗuŋ ha kiyo. Aŋ hin ka li a mul man ma li ɓivunna oloɗi, aŋ maa gaɗta vi Looŋara kiyo, an may ni hin maaraŋ goryoŋ kiyo.

⁷ Asi halaŋ ko asi ka wanda na, li sulukŋa egenu, an mbuɗusi furi masira ki hahawra.

⁸ Asi wul tasi ni u suluk ma vi suu mansinana, hurusi ki tinira kay cora asi laɗta.

⁹ Dla cora ko ndaɗta nara hin fi suuna u muli suu li ɓivunna. An hin ɓakasi ki kay tuɗ masira. An hin tinisi nek dla coosira kasiya.

¹⁰ Asi hin ti funa may ka hoɓbi, asi hin cuk tasi ki gawlaŋŋina lay, ka zul ɗi, kay asi hin vira vi vun Yawera kiyo.

Saara li gawlaŋŋa viɗ Israel kiyo

¹¹ Dla cora u guruɗ summa viɗ saara jivira kiyo.

¹² Suu mansina tuɗ joɓ ŋgusuna, gogor kom hin hoŋosi dira ni ndaɗu. Kay ana saara gawlaŋŋa viɗisi ki ni ndaɗu, u lira asi li gawlaŋŋa nara asi ɦuɗ tasi ki eg Loosina ni ɦuɗi day gaw.

¹³ Kolo kay yam ɦinira asi li ɓivunna tew tew huwa, kolo kay ɦinira asi li ɓivun ma ŋgalam ki ŋgalina, kaŋga u ŋgus guna, ɦoyna, peplierna, terebintena, ŋgususi jivi cocoo. Na may gorɓii magisina hin cuk tasi ki gawlaŋŋina, boyogi suu vi goryogina hin li zoŋga.

¹⁴ An hin ka li ɓak kay gawlaŋ ma vi gorɓii magisinanaɗi, kay zoŋga vi boyogi suu vi goryoginaɗi, kay ana asi tasira muli suu li ɓivunna lay tuɗ viɗ tasi ha ki u suu gawlaŋŋina, ɓorow ɓivun ma teteɗna duk tasi u suu gawlaŋŋi suu hu Ziŋ Lonara. Suu may suu saara ka kasi ŋgolɗina tuɗ a ba ki ni baaya.

¹⁵ Li ni ndak tak ka Israel li gawlaŋŋa lay ni, Yuda gin ni ka kal taɗ hu dla ndaɗtaɗi. Tuɗugi Gilgalɗi, tlagi ha hu Bethel li ma kuraɗi, suurugi tagi ana, «Yawe ka iiriyaraɗi».

¹⁶ Gasi, Israel yaɗ ay jew eŋ daŋ may, ko ndal mbutla ka min a sa tlaɗ va kaɗɗira na. Cecem wan daŋga Yawe hin cukusi kay haɗna ko ndal gor timigiina na.

¹⁷ Efrayimmi sa taɓ ki ko tam u fulina dewna, hinim haa.

¹⁸ Liisi ma asi ci tlena hurum u furirana daɓ ki wa, asi zuɗ tasi tuɗ ni hu li ma zoŋga. Suu muli masisina min hal ni dla cora.

¹⁹ Mbiriwinda hin yowosi kolo uɗuy, asi hin mbuɗ ki zolona kay ɓivun masina.