Magaara Vi Sa Jok Vun Lona OZE 14 - Boy Lonana

¹ Samari hin warakka, kay ndaɗ mbuɗ yara eg Looɗna, hin casi ki u ŋgewra, kemba vuɗ wilira hin njereɓesi kiyo, boyogi suu wiina hin coosi hurusi kiyo.

Suɗta vi suu cona

² Hoŋ ay eg Yawe, Lookŋa, ndak, Israel, kay ana ni dla cookka gak kaŋga ni ndaɗu.

³ Vagi boyna kogi hin hoŋogi ay eg Yawe dam ana, «Aŋŋi sa bulum cora ki halaŋŋa, min dlara jivira, balam bolo mbutlina ami hin ɦaŋ a ɓivunna ni boy ma funumina.

⁴ Asiri ka ndak a suɗumiɗi. Ami ka ful kolo kay kulumbi, ami hin ka di olo ana tlesuu ami minisina ni Loominaɗi, aŋ taŋga sa ma ka wi hahaw goo ma kuyuna.»

⁵ An hin suɗusi ki ko dla coosira, an hin minisi u huu ma jivina, yaanda tli ki kam wa.

⁶ An hin li kay Israel ni ko ndal mbaɗagira na. Ndaɗ hin ɦus ko usu ma fun lummana na. Ndaɗ hin pi sarayaɗ kaŋga ko ndal gura Libanna na.

⁷ Gogoryoɗ hin zul kosiya, jivi maɗta hin li ni ko ŋgusu conora na, hiziɗ hin li ni ko duk gura Libanda na.

⁸ Asi hin hoŋ aya, suu li ay kaki u ŋgusuɗna, asi hin holoŋ wana zumma, asi hin hoŋ ɦussa ko ndal gu gugutlura na. Asi hin ɓak kaɗ ko ɓak kay sum veŋ ma Libanna na.

⁹ Efrayim, va ma an hin lam u fulinana ni me ologe? Anni sa hoŋom dirana, ni sa ka golomma lay. An tanda ni ko ndal ŋgusu sipre na humum ka ɗuf tew tewna na, vuɗuŋ col ay ni egenu.

¹⁰ Sa ma yal coco ma wi u tle asina kina ni gege, ma wi dlara coco hin a wasi kina ni gege? Gasi voɗta vi Yawe ni ɗegee, suu jivina hin tuɗ huwa, may suu ci maɗna hin puk ki kaŋgaa.