Magaara Vi Sa Jok Vun Lona OZE 13 - Boy Lonana

Ɓeŋga Israel hin ɓeŋ ha ki fokka

¹ Hu li ma Efrayim ɓak tuna, nam tuɗ boy ma ndaana hu Israel. Na may u Baal nam mbuɗ tam ki mala dlara hin miɗ kiyo.

² Cecem wanda asi ka tuɗ fok u cora lira. Asi min tlesuu yoo kina u doono masira u yal masina asi li fulina. Halaŋ ca ni tlesuu suuna ceɗesina. Suuna ɓak kasi ana, «Suu wara suu li ɓivunna, furi tasi u gor mbutli suu asi minisina.»

³ Ni kay ndaɗta asi hin li ni ko ndal ɗugulla maɗiira na, ko ndal mbaɗagira yoŋgora jakkira na, ko ndal usuna viriw ki kolo day duk semeɗnara na, ko ndal ndoosna sel ay ki fun vunnara na.

⁴ An tanda, Yawe, Looŋŋa, ay hu mbassa Egiptera day. Aŋ wan an kaɗi ni ka wi Lo ma daŋgi, sa suɗ ma daŋ kaɗi, ni an dew.

⁵ An waŋ ay ki hu fulla, hu mbas mayra faɗta huruɗta.

⁶ Tew ha ki hu li ma ti haɗna may, ni asi hoɓ kiyo. Asi hoɓ ki wa ni hurusi mbuɗ va daŋŋa, ni kay ndaɗta asi noyon ki ni na.

⁷ An mbuɗ ki kasi ko ndal dlona na, ko ndal sindilna na, an juɓ keŋ voɗta.

⁸ An gasi jaŋŋasi duuna ko ndal bosogo ma asi yowom goryomma na, an coosi hurusi kiyo, ko ndal dlona na an komosi hu li namma, mbuuri suu bagina hin palawasi kiyo.

⁹ Gola, ndak bulum ki wa Israel, an u dew tanda ndak a njunukŋi anu.

¹⁰ Mul makŋa ni ara daŋge, a hin suɗuk ki hu ɦoŋzi ma halaŋ wannage, suu mak suu kaɓakŋa, suu ndak di kasi ana, «Ҥami mulna ay u suu ŋgolo suu sunda»?

¹¹ An ɦak mulna ha ni u hurun ma yara, u hurun ma yara hin hoŋom ki tlira.

¹² Cora vi Efrayimba tokoɗ ki eg taɗ hu li ma dewna wa ɗal ɗal, suluk mamma ka ɗogom tini na ta.

¹³ Ca mayra ka vuɗ tura tiitara hin mba kaɗu. Nammi goo ma hin ka wi yal dlaraɗina. Buurum ma vuɗta ndak wa ni nam hin ka tak tam a kal ay ki kaŋga u sumbi.

¹⁴ An hin buɗusi ay ki duk suu miɗina. Ay hu li ma maɗna an hin gaɗasiya. Maɗna saɓak maŋŋa arage? Li ma vi suu miɗina na dla cooŋga arage? Irin ka wi hahaw sa oloɗi.

¹⁵ Efrayim fi begera coco duk gorsemma may. Semeɗ ma u maɗiinana hin col aya. Semeɗ ma vi Yawena hin col ay hu fulla, mbo ma ɓaɗta hin so ki lay, gor goloŋŋiina hin so ki lay. Asi hin yow begera u tlesuu jivi cocona.