Magaara Vi Sa Jok Vun Lona OZE 12 - Boy Lonana

Boy ma ganyamba

¹ Efrayim ŋguyun ki u kaboyna, suu Israelna u dla cora may. Na may Yuda ka tuɗ u Lona tuwa, kaki u ɗegeera eg ma ki Teteɗna.

² Efrayim taa tammi u semeɗna, liŋ duk semeɗna ta ta ci buuna ki u ndaɗta. Nam zul ni kaboyna u ci maɗna. Asi vi banara u Asiri, ɦal mbulna maŋ Egipte.

Buŋgolo Israel ni Yakob ma ganyamba

³ Yawe ɓakŋa ka kom u Yuda, a Yakob ɓak ki kay dlaamba, kay tuɗ mamba a hin kaam ɓakŋa kam u sun mamba.

⁴ Ay huu sum kurufu day ni nam gijaŋ pan wayamma. Nam ndak ki sana may ni njogoɗ u Lona.

⁵ Nam njogoɗ u sa sunda vi Yawe, suu kamu. Nam tiira hin cenemu. Nam hin fam hu Bethel, ni hu li namma Lona hin ɓak u aygiya.

⁶ «Yawe, Lona ma Saɓakŋa Kom Belna, Yawe» agi yammi ko wanda na.

⁷ Aŋ may ni hin hoŋ ay vi Looŋŋa aŋ li u ɗegeera, teteɗta, tin saa maŋga tew tew kay Looŋŋa.

⁸ Kanaan vi va ma tli nekka ma ganyamba koɗu, ndaɗ minni kulla.

⁹ Efrayim di ana, «An mbuɗ ni tan bege ɦawaa, an taa kolo egenni begera, sunda an laɗta halaŋŋi sa kafan boy co ma suluk egenɗi.»

¹⁰ An may ni Yawe, Looŋŋa, ay hu mbassa Egiptera day. An hin hoŋoŋ cecemi aŋ hin kak u mbutluɓ maŋŋa daŋgadla, ko ndal hu buu ma an mbay ŋgafagina na.

¹¹ An hin ɓak u suu jok vun Lona, an hin tak tlena ki ii suuna cocoo. An hin ɓakagi ndal boy manna ki fun suu jok vun Lona.

¹² Lini Galaad ay ki jew coo ni, asi may ni mbuɗ ki ni ko va kaɗina na. Ay hu Gilgal ni asi ka seŋ ɓivun ma lam u bolo mbutlugina naɗi. Otel masi ma li ɓivunna lay ni ko ndal gogoyra moloɗ eg taɗ kay zumma duk senenara na.

¹³ Yakob ŋgay tam ki hu fulla Aramba. Israel li sunda ko ndal cara na, mbuɗ taɗ a gol yoorina.

¹⁴ Na may, Yawe u sa jok vun Lona maa dew kal Israel ay ki hu Egipte, sa jok vun Lona na dew gol Israel, ni namu.

¹⁵ Efrayim li dlara tiitara maŋ Lona, malamma hin hoŋom busu suuna ma nam voom kina kamu. Nam hin hoŋom dla coomba kamu.