Magaara Vi Sa Jok Vun Lona OZE 11 - Boy Lonana

Lona ni ko sa ma goryom silim kina na

¹ Hu li ma Israel ay goo tuna, an miniɗu. An yi goronna ay ki hu Egipte.

² Suu may suu yasina, asi ɦuɗ tasi ki egesi na day. Asi li ɓivunna ni maŋ Baal, ni maŋ fuli suu ceɗesi u kosina asi lasi ɓivun ma ŋgalam ki ŋgalina.

³ An tanda doli haɗ tuɗta maŋ Efrayimmi anu, vam kom colom koloo, na may asi wi ka ana an loɓ tan ay kasi ni anuraɗi.

⁴ An tuɗ u asi u jivira vi suu warnara, minda duk ɦoŋ tamiya. An ay u asi ni ko ndal suu tli gor kemba tinisi eg ŋgotlosira na, an ɦasi tlesuu a wulusina.

⁵ Nam hin ka hoŋ ay hu mbassa Egipteraɗi, Asiri hin li a mul mamma kay ana asi min ka a hoŋ ay egenɗi.

⁶ Ŋgewra hin gik mberwenna hu ɦoŋzi namma. Ndaɗ hin bulumusi saɓakasi kiyo. Ndaɗ hin casi ki kay dla coosira.

⁷ Suu mansina taɓ tasi u suu ɓeŋesi kina. Asi ka yasi ay koloo. Asi may ni ko wanda na halaŋ ka min a col koloɗi.

Minda vi Lona hin suu kamu

⁸ An hin lakŋi nanage Efrayim, an hin ɦakŋi maŋ gege, Israel? An hin lakŋi nana ko ndal Adma nage, an hoŋok ki ni ko ndal Seboim na su? Hurun ɓeŋŋi hurunu, na may ni oora hurunda mbuɗ yoo taɗ gaw may.

⁹ An hin ka ɦal so ura maŋ saɓak yaandaɗi. An hin ka hoŋ ay bulum Efrayim kiɗi. Kay ana anni Lona, ka sa warnaɗi. An ka ki teteɗ vo varaŋu. An hin ka mbay u yaraɗi.

¹⁰ Asi hin tuɗ ha kay cee Yawe, nam hin ndi ay ki ko ndal dlona na, hu li ma nam mbuɗ yara, ŋgobba, wani gor kemba hin col liŋŋa ay u fiɗigina day dlak ko ndaana mbay egemu.

¹¹ Asi hin col liŋŋa ay hu Egipte day dlak ko ndaana mbay egem ko ndal lay dawana, ay hu mbassa Asirira ko ndal gugukka na. An hin holoŋosi cukka hu ziisiya, Yawe di na.