Magaara Vi Sa Jok Vun Lona OZE 10 - Boy Lonana

Mulla daɓ ɓivun ma vi fulinana wa

¹ Israel gugutlu mayra mbiira ɦayra, vuɗ coco ɦay lay. Vuɗuɗ zul ha fok zuli na ɗow ɗow may, ndaɗ zul otel ma li ɓivunna zuli na ɗow ɗow may. Ndaŋga maɗta li tlena coco may, ndaɗ zul gogoyra ceɗta zuli na ɗow ɗow.

² Suu asina hurusi ki coo, cecem wanda asi hin waraka. Nam Yawe u tamba hin toosi otel masi ma li ɓivunna ki lay, ɓeŋesi ɦini masira asi ceɗeɗta ki lay.

³ Cecem wanda asi di ana, «Aygi mul ka kaygiɗi, kay ana aygi ka li ndaa Yaweɗi ni mulna ndak li me kaygi ge?»

⁴ Aygi ɓakaygi boyna, suuruygi taygi suura ɦawara, vaygi vunuygi kay dlara ɓak ma ɗegeena wul kolo ko ndal ŋgusu ma ci suuna na kay zum hu senena.

⁵ Suu hu Samarina dlak u ndaana ko mbutlugi tamagi suu hu Bethel ta kura kay ana suu maɗsina ka yoo tasi kay goo mbutl masina, muli maɗ suu li ɓivunna lay. Ko asi li furira kay jivi mamba, cecemi ni ndaɗ ha ki tuɗi egeygi day.

⁶ Goo mbutl namma lay asi hin tlam tuɗum ha ki Asiri, ɦam ki a ɓivunna maŋ mul ma ŋgolna. Efrayim hin fi ni dlara zolona. Israel hin tii taɗ kay cora ndaɗ laɗ ndaɗta.

⁷ Dla ndaɗta li ki eg Samari u mul maɗna wa, nammi ko ndal vun guna dol kay mbonara na.

⁸ Li ma kolo mbuy ma cona hin bulumum kiyo, suluk ma vi Israel namma. Way virna u wayra hin laki kolo kay otel masi ma li ɓivunna asi hin di ɦinira ana, baa ŋgusuk kamiya, ɦinira asi hin daɗ ana bow ay kaŋga kamiya.

⁹ Ay hu buu ma vi Gibea na day ni ndak li suluku Israel, asi hin jok usi kaɗi. Duu ma kay suu ci maɗna na li ay ka ni Gibeaɗi su?

¹⁰ An hin gaɗasiya, kay ana asi njun tasi kay ci maɗ ma asi cam mbana. Suuna hin yow kolo duuna u asiya.

¹¹ Efrayimmi ko go mbutl tamara haɗi jivira na, ta min to wana ɦayra. Hu li ma an jak eg deleɗ ta saɓakŋa na, ni an gi banaŋŋa ko Efrayim, Yuda a zumma may, Yakob balas lina ki may.

¹² Zaaragi ni zaara gasira, agi hin feɗegi tlena u furira. Poogi sene ma wilina, cecemmi ni li ma hal Yawena ta ta nam mba njayaygi ɗegee mamba kaygiya.

¹³ Agi zumugi ni huu ma cona, agi feɗegi ni sulukŋa may. Agi tagi ni vuɗ kaboyna. Aŋ hin taŋŋi kay saɓak maŋŋa, kay suu maŋ suu duu suu bolowna.

¹⁴ Ci wayra duuna col kolo duk suu maŋsina wa, ɦoŋzi maŋ ma saɓakŋa halaŋ hin toom kiyo, ko ndal Salman to ɦoŋzi ma Betel ta kura ki hu buu ma duu ma nam ci cara ki u goryoɗta na.

¹⁵ Wanni dlara an hin lagira egegira, kay hurugi ma co ma kal ki saɓak ndena. Maɗii feɗeɗ ni dla ndaɗta hin li eg mul ma Israelna na may.