Magaara Vi Sa Jok Vun Lona OZE 1 - Boy Lonana

¹ Boy ma Yawe ɓakam maŋ Oze goŋ Beerina, hu cokira Oziyas, Yotam, Ahaz, Ezekiyas a mulina hu Yudara, hu cokira Jeroboam ma goŋ Joasna a mulna hu Israella.

Goryoŋ Ozena u Gomer

² Oze gijaŋŋa u boy ma vi Yawena. Yawe di Oze ana, «Tuɗ ɗum ca mayra hin taɗ ki gawlaŋŋara ndaɗ hin vuɗuŋ gor suu gawlaŋina, kay ana mbassa min ŋgolla ni gawlaŋŋa noy Yawe kiyo.»

³ Nam tuɗ ɗum Gomer goŋ Diblaimba. Ndaɗ vi wiina, hin vuɗum goona dew.

⁴ Yawe di Oze ana, «Tinim sem ana Jizreel kay ana hin kak ŋgoo dagan na njokŋi an hin joɓ suu hu ɦoŋzi ma Jehuna kay busu Jizreel an hin bulum mulla Israella kiyo.

⁵ Hu buu namma ni an hin kus gu mbuurura Israella ki hu ɦuɗugumba Jizreella.»

⁶ Ndaɗ vi wiina olo hin vuɗ go tamara. Nam Yawe hin di Oze ana, «Tiniɗ seɗ ana Lo Rouhama ni ana an ka minigi oloɗi. Kay ana an hin ka tuɗ fok u minda an min suu Israelna oloɗi. An hin bulum minda duk ɦoŋomira ki na bel.

⁷ Na may zi ma vi Yudana hin minimu, an hin suɗusi ki u Yawe Loosina. An hin ka suɗusi ni u gu mbuuruɗi lay, u ŋgewɗi lay, u duunaɗi lay, ka u kuluminaɗi lay, ka u suu li duuna u kuluminanaɗi lay.»

⁸ Ndaɗ noy pona ki fun Lo Rouhama hin vi wiina kaɗu, hin vuɗ goona.

⁹ Yawe hin di ana, «Tinim sem ana Lo Ami ni ana ka ni saanna oloɗi, kay ana agi ka ni suu mansina oloɗi. An tanda ka kagira ni kagiɗi.»