HEBRENA 8 - Boy Lonana

Yesu ni mul ŋgol maygi ma li ɓivunna

¹ Gola ni boy ma ŋgolna duk mami ma ami ka damma halaŋ, mul ŋgol maygi ma li ɓivunna kal ki kolo huulona, kaki hu bik kom ma njufna kay dlam mamba mulla, ma saɓakŋa kom halaŋŋa.

² Nam ka li sun mamba mul ŋgol ma li ɓivunna hu li ma teteɗna. Ni di ana hu mbutluɓma gasina ma Bu Suuna minimma, ka ni saɗi.

³ Mul ŋgol ma li ɓivunna ni kay a mbaa ɦala u tlesuu li ɓivunna maŋ Lona. Mul ŋgol maygi ma li ɓivunna lini nanagelay ni va ma nam a mbaaram fok Lona ka may.

⁴ Nam li ay gin ni kay ndaŋgara ni nam ka li a mul ma ɓivunna ko suu hiŋŋa naɗi. Kay muli suu li ɓivunna suu hiŋŋa mba ni ɦala u gaɗta vi suu Juifna.

⁵ Muli suu li ɓivunna jok ay ni va ma ay ɓiiri jewna, ni ŋgus tlesuu ka kolo huulonna. Dla ndaɗta tli taɗ ni u mayra li ay u Moizza. Hu li ma nam a tuɗ min mbutluɓma wanni Lona dam anaba, «Aŋ tuɗ minim ko ma an takaŋŋa ay kolo kay yam ɦinirana na.»

⁶ Cecemi sunda vi Yesura ni ŋgol suu masira kay nammi sa ma duk ɦoŋga u Galamba Wilira ndaɗta, doli ni kay vi vun ma jivina.

⁷ Galamba jewra lini ŋgul ka egeɗɗi ka mbuɗuɗ u ndaraɗta daŋgi.

⁸ Lona ka yal suu mamsina kay cora ko nam di hu magaara na, «Bu Suuna di ana buuna hin mbaa, hu li namma an hin vi galamba wilira u suu Israelna, ni suu hu njafna vi Yudana.

⁹ Galamba ndaɗta hin ka a li ko mayra an vaɗ u somoyosira naɗi, hu li ma an taɗasi ay ki a hin ndaŋgara Egipte kina. Asi min vi ka u galamba an vaɗ u asiraɗi, Bu Suuna di ana an ka yoo tan kasiɗi.

¹⁰ Gola ni galamba an hin vaɗ u suu man suu Israelna, Bu Suuna di ana ŋgoo buu namma wanni an hin ɦasi gaɗ manda hu ŋgus masira, an hin ɓiirisira hurusiya. An hin li a Loosina, asi hin li a suu manna.

¹¹ Sa maa dukusi dew lay ma hin haɗ ndaram kaɗi, sa ma di maŋ wayamma ana wi Bu Suuna kiyo ka oloɗi. Suu halaŋ halaŋŋa hin wam kiyo, gorkemba gorira lay u suu ŋgolona lay.

¹² An hin bulumusi coosira kiyo, humun hin ka a gan kay coosira oloɗi.»

¹³ A ɓak kay galamba wilira ni Lona mbuɗ ta jewra basiya. Va ma mbuɗ ki basina, ki maa lay, ana hin tok a daɓ kira.