HEBRENA 7 - Boy Lonana

Melkisedek mul ŋgolna u mul ma li ɓivunna

¹ Melkisedek mul ŋgolna hu Salem, mul ma li ɓivunna vi Lo ma Kolo Dayna lay. Hu li ma Abraham ay duuna, ni nam ti mulina aya, a mba vora wanni Melkisedek ŋgafam vokomu paɗ vunum ki kamu.

² Abraham ɦam yam tlesuu nam fasi ayna halaŋ. Sem Melkisedek ni di ana mul ma ɗegeena, nam lay ni mul ŋgol ma Salemma, ni di ana mul ma heɓpa.

³ Melkisedek sa ka wam bumbi lay, wam sumbi lay, sa ma hu njafam kaɗi, vuɗ mamba ka ii saɗi lay, miɗ mamma ka ii saɗi lay, nammi ko Goŋ Lonna na. Nam kak a mul ma li ɓivunna a fafatɗa.

⁴ Gologi ŋgol mamba gige? Abraham buy ŋgolo ɦam yam tlesuu nam fasi ay hu duunana bel bel.

⁵ Ni hu njafna vi Levi li ay a muli suu li ɓivunna ni asiya, tuɗ ni u deera deera u gaɗta asi joɓ yam tlesuu Israel fasina. Ni di ana asi joɓmi ko suu hu mbas masirana asi lay ni hu njafna vi Abraham.

⁶ Melkisedek ay ka hu njafna vi Abrahambi, nam vi yam tlesuu Abraham ɦamsina na. Olo ni nam paɗ vunum ki kay sa ma Lona vi vunum u namma.

⁷ Aygi wi ana sa ma paɗ vunum ki kay ndarammana ni ŋgol su ma nam paɗ vunum kamma.

⁸ Ay hu lina vi muli suu li ɓivunna wanni vammi suu miɗ kina, hu lina vi Melkisedek wanni yam tle asina vasi ni sa ma ka iirina. Ko magaara dira na.

⁹ Ni kay a di anaba hu li ma Abraham ɦal yam tlegeyemma, Levi (suu hu njafamma vasi yasi ni asiya), nam lay ni ɦam yam tlena lay.

¹⁰ Hu li namma lay ni Levi ni bay vuɗ tuwa, hu li ma nam ka huu bum ŋgolo Abraham bay vuɗ tuna, ni Melkisedek mba ŋgaf Abraham kini jewe.

¹¹ Dla ɓivunna vi suu Levina ay coli ni u gaɗta vi suu Israelna. Lini muli suu li ɓivunna vi suu Levina li ay ɗegeereni, mul ma li ɓivun ma daŋ mbay olo kay mege? Mul ŋgol ma li ɓivun namma ka u voɗta vi Melkisedek, ka hu voɗta vi Aaronɗi lay.

¹² Lini dla ɓivunna mbuɗ kiwa ni, gaɗta hin mbuɗ may.

¹³ Bu Suuna ma boy mamma di kamma nammi hu njaf ma daŋŋa ni sa ma a li sunda vi mul ma li ɓivunna ka huɗi.

¹⁴ Ki wi gasi ana nam hu vuɗ mamba ni hu njafna vi Yuda. Moiz a ɓak kay muli suu li ɓivunna wanni di va ka kay njaf nammaɗi.

Mul ma li ɓivun ma daŋŋa ko Melkisedekŋa

¹⁵ Gola ni va ma tak ki jivi kay boy namma ɗal ɗalna. Mul ma li ɓivunna maa dew kaa ko Melkisedek na.

¹⁶ Nam mbuɗ ki mul ma li ɓivunna ni ka u gaɗta vi suunaɗi, nam mbuɗ kini u saɓakŋa vi iiri mayra daɓ maɗ kaɗira.

¹⁷ Kay ndaɗta magaara di anaba, «Aŋ hin mbuɗ a mul ma li ɓivunna ni a fafatɗa, hu voɗta vi Melkisedekka.»

¹⁸ Ni kay ndaɗta gaɗta jewra bulum ki ni kay maŋira, ka li vaɗi.

¹⁹ Gaɗta vi Moiz ka mbuɗ va ki pasiyakgi, juɓpa ni vara jivira mbuɗ a mbaaray eg Lona tok ni ndaɗu.

²⁰ Dla ndaɗta lini ka ɦawa bay suura vi Lonaɗi. Suu daŋŋa mbuɗ ki muli suu li ɓivunna bay suu tasiya.

²¹ Yesu mbuɗ a mul ma li ɓivunna ni u suura nam suu tamba. Hu li ma Lona dam anaba, «Bu Suuna suurumu, ni nam ka jok saa mamba zeɗɗi, aŋ hin a mul ma li ɓivunna ni a fafatɗa.»

²² Galamba Wilira su ndarayaɗna halaŋga ɦaygira ni Yesu.

²³ Va ma daŋ ka olo, muli suu li ɓivunna ay zuli bolowo kay asi miɗa, ndak ka a tuɗ fok a daɓ sun masiraɗi.

²⁴ Yesu kak iiri a fafatɗa, sun mamba mul ma li ɓivunna, ka jok maŋ sa ma daŋgi.

²⁵ Nam ndak suɗ suu mba eg Lona u semma kiyo, cecemi lay a fafatɗa, nam ka iiri tew tew, cen Lona kasiya.

²⁶ Yesu ni mul ŋgol maygi ma li ɓivunna ma aygi vi umma. Nam sa ma teteɗ ma bay cora egemma, cora na nde lay ka egembi, duk ɦoŋom taɓ ka u coraɗi, tlam ha ki kolo huulona ma dayna.

²⁷ Nam ka ko muli suu li ɓivun suu hiŋŋa naɗi, nam ka li ɓivunna hu buuna tew tew kay coomba, ŋgoo dagan li ma vi suuna na tuwara naɗi. Hu li ma nam ɦal tamma ni nam li ɓivunna sem dew, ni daɓi halaŋ gaw.

²⁸ Hu gaɗta vi Moiz ni tin muli suu li ɓivunna ni muli suu ka pasiyakgina. Kay Boy Lonana mba ni gaɗta, tin a mul ma li ɓivunna ni Goroŋ ma ɗegeena a fafatɗa.