HEBRENA 6 - Boy Lonana

¹ Kay ndaɗta wuluygi fok u haɗta vi suu ŋgolona. Hinigi haɗta vi suu jew suu vina ki ŋgoroygi dagani. Aygi ka miniygi u dlara wili kay boy nammaɗi. Va ŋgolna ni ana hin sunda cora kiyo, vi u Lona.

² Haɗ kay batemma zeɗ zeɗna, tinda tin kona kay suuna, di boy ma kay paɗta kolora vi suu miɗina, u ɓak ma ka daɓ kiɗina.

³ Wuluygi foko, ni dlara aygi a laɗta lini Lona hiniygi wa.

⁴ Suu may suu hoŋ ndi kaŋga hu iiri mayra corana hin lini ana mege? Asi fi kiɗikka vi Lona ki lay asi juk ɦala kolora ki lay, ura vi Musuk Lonara ki lay.

⁵ Asi wi ki ana Boy Lonana jiviya, asi haɗi a wi saɓakŋa vi duliyara hin mbay fokka lay.

⁶ Ni asi hoŋ ndi kaŋga hu iirira cora olo. Kay a hoŋosi ay wili a asi mba jok iiri masira ki zeɗ ni loɓo, asi hoŋ ɓal Goŋ Lonna hu gu garakŋa gadla mbaaram ki fok suuna kiɗik a ŋgulumba.

⁷ Hu li ma ndaŋgara mbuɗ ki ŋgolomba ko yo lona si kaɗ tew tewra wanni, ndaɗ hin day tlena jivi maŋ suu horokŋa. Lona hin paɗ vunum ki kaɗ may.

⁸ Lini ndaɗ day ni tlesuu siina u wayara ni, ndaɗ ka li va oloɗi, Lona hin gaɗ vunna a daɓ maɗta ni ŋgalla gaw.

⁹ Banayanna hu li namma ni ami li di na lay ni, ami hurumi tini kagi ɦay, ami wi ana agi ka hu voɗta jivira ni di ana ta fi suɗta.

¹⁰ Lona ni sa ma ɗegeena. Humum ka maa kay sun magiraɗi, min magira agi takaɗta u sun magira agi lambara, agi laɗ maŋ gorsegi suu vina.

¹¹ Ami min ana gegelay dukugi mba tak tamba feɗta na gak gak hu daɓpa lay, va ma agi ka saa kamma mba li u voɗom ɗegee gasi.

¹² Ami ka min ana agi mbuɗ ki zolomo naɗi, agi tli ni u suu vina suu lalamma, fi va ma Lona vi vunum kamma.

Vi vun ma vi Lonna

¹³ Hu li ma Lona vi vunum u Abrahamma ni nam suu tam kayami. Sa ma ŋgol suum kaɗi, ni nam hin suu tammi u gege? Nam suu ni u tamba gaw.

¹⁴ Nam di anaba, «An hin paɗ vunun ki kaŋu, an hin zuluŋ njafaŋ ŋgolo.»

¹⁵ Abraham juɓ u ɗigilla ni nam hin fi va ma Lona vi vunum kamma may.

¹⁶ Hu li ma suuna suu wani, suu tasi ni u suu ŋgolo suusina, kay ndaɗta suura daɓ ciwayra dukusira ni ndaɗu.

¹⁷ Lona tak ki gasi maŋ suu a fi va ma nam vi vunum kamma ni nam ka mbuɗ saa mamba zeɗɗi, ni kay nam suu tam kay va ma nam vi vunum kamma.

¹⁸ Sunda ka mba' ta sa ndak ka a mbuɗuɗɗira, ni hu ndaɗta ni Lona ka kaboyɗi. Aygi suu fi li ma ŋgayra hurumma, ni aygi faygi saɓakŋa ŋgolo a fi va ma aygi ka juɓumma u ɗigilla.

¹⁹ Juɓ maygira ndaɗta ni ko zew kawi ma njun lumba njun musuk maygira na may. Ndaɗ gasi coli eŋga, ndaɗ kal hana ni jak duk baraw ma ɓorow ii Ziŋ Lonara kolora, tew hu li ma teteɗna ha hu kurufuwa.

²⁰ Ni li ma Yesu kal ha hu fokoygi jewna, ni maygiya. Nam mbuɗ ki mul ŋgol ma li ɓivunna a fafatɗa hu voɗta vi Melkisedek.