HEBRENA 5 - Boy Lonana

¹ Mul ŋgol ma li ɓivunna manammi duk suuna kay a li sunda vi Lona kasiya. Nam mba ɦala kay a li ɓivunna kay cora vi suuna.

² Nam tamba lay ni maŋi mamba kaa, nam ndak tak humba vi suu ka wi dlaɗina u suu li cora.

³ Kay nammi sa maŋina nam ka li ɓivunna ni kay cora vi suuna holɗi, kay mam namba lay.

⁴ Sana ka ndak a tli ŋgolla mul ŋgol ma li ɓivunna kay tambi. Sana mbuɗ na ni yammi Lona ko Aaron na.

⁵ Ni na may Kristu tli ŋgolla mul ŋgol ma li ɓivunna ka kay tambi, Lona di ki kammi namma ɗow anaba, «Aŋŋi Goronna, karam an mbuɗ ni Buŋu.»

⁶ Hu li ma daŋŋa ni nam di olo anaba, «Aŋ hin mbuɗ a mul ŋgol ma li ɓivunna a fafatɗa, hu voɗta vi Melkisedek.»

⁷ Yesu hu iiri mamba wanni nam cen Lona mbuɗ tam ki hahawara na ɗow, sawalla kolo u simina irim kay nam ndak suɗum ki hu miɗna. Lona humum cen mamba ni kay hoŋga nam hoŋ yam kaŋga umba.

⁸ Ko nam a Goŋ Lonna lay ni nam wi dla mayra hum vunna hu li ma nam fi wihawra.

⁹ Hu li ma nam mbuɗ ki pasiyakŋa ni nam mbuɗ ni sa ma ɦal suɗta bay daɓpa, maŋ suu hum umma halaŋ.

¹⁰ Lona di ana nammi mul ŋgol ma li ɓivunna u voɗta vi Melkisedek.

Gol tagi jivi ko dla cora hin vira kira

¹¹ Ami ka u dlara funumi ŋgolo a di kay boy namma, a dagina um kira wanni loɓ cocoo, kay agi tagi nek ɦay a humum um kira.

¹² Lina jak ki ni ŋgolo a agi mbuɗ a suu haɗ suuna may, doli agi min ni Boy Lonana ma haɗam ay jewna olo. A ti fu ma eŋŋa, magira ni agi min ana ɦagi ni mbira a cira.

¹³ Sa ma ci mbira ni gogoona, nam ka ndak a wi tlesuu gasina u suu ka u voɗosiɗina ɗi.

¹⁴ Ti ma eŋŋa ki ŋgaɓi ni maŋ suu ŋgolona, u li mayra li tew tewra asi ki haɗi kay a ɓorow duk ɦoŋ jivira u cora.