HEBRENA 4 - Boy Lonana

¹ Lona hini vi vunna ana aygi ndak a cuk hu li koɗ tara egemu. Gologi tagi jiviya sa maa dukugi hin ki bay kal hu li ma koɗ ta nammaɗi.

² Kay aygi humuygi Boy ma Ayra ko asi suu humum ay ŋgoo bagina na may. Asi hum boy namma ni nam li va ka egesi na ndeɗi, hu li ma asi humumma ni asi vam ka u vira hurusi na ndeɗi.

³ Aygi suu vina hin tuɗ cukuygi hu li ma koɗ ta namma, ma Lona di kamma ana, «An mbuɗ yara, suu tan ana, asi ka cuk hu li ma koɗ tara egenna oloɗi.» Nam di boy namma na kay nam wi ana sun mamba daɓ kiwa ay day hu li ma nam min duliyara.

⁴ Kay ndaɗta di hu magaara daŋga kay buu ma kiɗisiyana ana, «Lona koɗ tam kay sunda nam laɗta halaŋ hu buu ma kiɗisiyana.»

⁵ Di kay boy namma hu li ma daŋ olo, Lona di ana, «Asi ka cuk hu li ma koɗ tara egenna oloɗi.»

⁶ Suu hum Boy ma Ayra ay jewna cuk ka hu li ma koɗ taraɗi kay asi vi kaɗi. Ni lina ka kay suu daŋŋa a hin cuk huwa.

⁷ Ni kay ndaɗta Lona ŋga buu ma daŋŋa dew olo yam ana karami. Hin ŋgoo daganda ni David hin di hu magaara olo ana, «Lini agi hum del Lona karam wani, ŋgelegi humugi kiɗi.»

⁸ Lini Josuwe li tuɗ suuna ha hu li ma koɗ ta namma gini ni Lona ka hin di gin kay boy ma daŋŋa daŋŋa oloɗi.

⁹ Ni koɗ tara vi Lonara hu buu ma kiɗisiyana hinni maŋ suu vi Lonna.

¹⁰ Sa ma kal hu li ma koɗ tara eg Lona koɗ tam kay sun mamba ko Lona koɗ tam kay sun mambara na may.

¹¹ Soogi tagi a cuk hu li ma koɗ ta namma, laygi a sa maa dukuygi mba li ko suu ay ŋgoo bagina hum vun kaɗira na, a hin ki bay kal hu li nammaɗi.

¹² Boy Lonana ka iiriya nam saɓaki. Nam sii su ŋgew ŋgol ma siim, mbana. Nam wak gak gak tew hu li ma musukŋa u ŋgussa ŋgaf tasi huna, tew gak gak hu li ma vun sokŋa ŋgaf huna u mbul ma duk sokŋa lay. Nam ka ɓakŋa kay minda vi sana u saara hurumba halaŋ.

¹³ Va ma ŋgay ii Lona kaɗi. Tlesuu nam lasina halaŋŋi ki fokom nam Lona ni siiliya, aygi di kay dlaaygira halaŋ fokom namu.

Yesu ni mul ŋgol ma li ɓivunna

¹⁴ Vaygi vira aygi di kaɗta huruygi eŋe. Aygi faygi mul ŋgol ma li ɓivunna ma mbay kolo eg Lona day ni Yesu, Goŋ Lonna.

¹⁵ Aygi faygi ka ni mul ŋgol ma li ɓivunna a fi wihawra kal hu maŋi maygiraɗi. Ni na ɗow ana mul ŋgol maygi ma li ɓivunna, ndemba ndemem hu tlena halaŋ ko aygi suuna na may. Na lay ni nam li co kaɗi.

¹⁶ Ҥuɗuygi taygi ay u huu ma jivina eg dlamba vi Lonara, hu li ma oora. Aygi tuɗ faygi heɓ huuna u oora huwa ndaki a njun uygi hu li namma.