HEBRENA 3 - Boy Lonana

Yesu ŋgol su Moiz

¹ Kay ndaɗta agi gorsen suu vina suu Lona yagina, gologi Yesu, Lona sunum ay a mba li a mul ŋgol ma li ɓivunna kay vira ami ka ɓak kaɗta.

² Nam vi vun Lona ay ɗegee u sunda nam tinim kaɗta, ko Moiz ay ɗegee u sun mamba nam laɗta halaŋ hu zira vi Lona na may.

³ Sa ma min zirana fi ŋgara ŋgolo su zira nam miniɗta. Ni Yesu ndaki a fi ŋgara ŋgol sura vi Moizza.

⁴ Ziginina halaŋŋi malayasi suu minisina kaa. Doli Lona ni sa ma min tlena halaŋŋa.

⁵ Moiz hu sun mamba ni nam ay ɗegee hu zira vi Lona halaŋ, nammi sa ma vun sunda a di ki kay va ma Lona hin a dam ha fokŋa.

⁶ Kristu ay ɗegee kay nammi Goona tini a ŋgolla hu zira vi Lonara. Aygi ni ziimba, lini aygi vam dlaamba huruygiya ni tiniygi huruygi kay viiygi ndaɗta.

Li ma koɗ tara ka kay suu vi Lonna

⁷ Ni kay ndaɗta Musuk Lonara di anaba, «Lini agi hum del Lona karam wani,

⁸ ŋgel humugi ki ko agi ŋgelegi humugi ki hu buu ma agi duu u Lonara naɗi, ko buu ma agi tukum ay ŋgoo bagina naɗi.

⁹ «Lona di ana ay hu li namma ni somoyogi ndemenu tukun u boyna lay. Asi wi sunda an laɗ u asi basara dok fiɗira ki jivi lay.

¹⁰ Ni kay ndaɗta an mbuɗ yara eg suu asina, an di ana asi ganyam tasi hu saa masira tew tew. Asi wan voɗ manda kaɗi.

¹¹ An mbuɗ yara, suu tan anaba, asi ka a cuk hu li ma suuna koɗ tasi hu egennaɗi.»

¹² Gologi tagi jiviya gorsenna a sa dukugi mba li hurum coo, bay vira a hin Lona ma irina kiɗi.

¹³ Ni na ɗow ana gaɗ tagi duk tagi hu buuna tew tew, ay jew day day lay karam lay magaara ka daygiya sa ma dukugi mba ganyam tam a cora mba ŋgelem humum kiɗi.

¹⁴ Aygi ni ndarayaŋ Kristuna, lini aygi goloygi viiygira ay jew dayra na gak gaki ni.

¹⁵ Gologiya va ma magaara damma anaba, «Lini agi hum del Lona karam wa ni, ŋgelegi humugi ki ko agi ŋgelegi humugi hu buu ma agi duu u Lonara naɗi.»

¹⁶ Suu hum del Lona hin ŋgel humusi kina ni suurage? Ni suu Moiz tuɗ u asi hin Egipte ha kina.

¹⁷ Suu huu Lona ɓeŋ egesi basara dok fiɗina ni suurage? Hurum ɓeŋ ki eg suu li cora, miɗ ki ŋgoo bagina.

¹⁸ Hu li ma Lona suu tam ana, «Asi ka a cuk hu li ma suuna koɗ tasi egen hunaɗi.» Ni nam di ni maŋ suurage? Nam di ni maŋ suu duu ay u namma.

¹⁹ Aygi wi anaba asi ndak ka a cuk huɗi ni kay asi vi kaɗi.