HEBRENA 2 - Boy LonanaSuɗta ŋgolla 1 Ni kay ndaɗta aygi njunuygi taygi eg gasi mayra aygi humuɗta. Kay aygi mba ba kiɗi. 2 Boy ma suu sunda huulona mbaaramma fi liimwa, lini gege lay ma hum boy namma vi ka umbina ɓakŋa tok kam wa. 3 Lini aygi noyogi suɗta ŋgolla wanda kiwa ni, aygi hin ndak a pii ki ko ɓakŋa ni nanage? Bu Suuna u tamba di kay suɗ ndaɗta ni jewe, ŋgoo dagan suu hum boy nammana takaygi kini gasi mamba. 4 Hu li namma Lona di ki kay boy masina u takka, u dlara ndandalla u dlara mbuɗta zeɗ zeɗta. Nam ɓorow ɦala vi Musuk Lonara u min mamba. Sa ma mba suuna hu suɗtana 5 Lona ɦal ŋgolla maŋ suu sunda huulona ka kay ndaŋgara ha fokka aygi ɓak kaɗtaɗi. 6 Hu magaara dew sana di ni na ɗow ana, «Sana ni mege a aŋ Lona a saa kamba ge, sa warna ni me a aŋ loɓ taŋ kam ge? 7 Aŋ hoŋom ki goo su suu sunda huulona kay buu njok ɦawaa, ni aŋ ɦam ŋgolla u geleɗta ko mul ŋgolna na. [Aŋ tinim kay sunda aŋ laɗ u koŋga.] 8 Aŋ ɦam ŋgolla kay tlena halaŋ.» Ko dira di ana Lona «ɦal ŋgolla maŋ sana kay tlena halaŋ,» ni di ana Lona ɦam tlena kom halaŋ, hin va ka kiɗi. Cecemi ay ka wi ana sana ka u ŋgolla kom kay tlena halaŋgaɗi. 9 Ni aygi waygi anaba, Yesu hoŋ ki kaŋga u suu sunda huulona kay lina ew ɦawaa, kay u oora vi Lona nam miɗ kay suuna halaŋ. Cecemi aygi wam kaki hu ŋgolla u jumba mulla kamu, nam fi geleɗta ni kay wihawra nam faɗ hu miɗnara. 10 Ni kay ndaɗta Lona, ma li tlena halaŋŋa, wi na ni namu, kal Yesu hu wihawra na ni mbuɗum ki jivi gaw, kay nam min a mbuɗ suuna ki a goryom ŋgolona hu bibiŋil mamba. Yesu ni sa ma tuɗusi hu suɗtana. 11 Yesu ma mbus cora vi suuna ki pasiyakŋa, asi suu coosira ki mbuɗina nam mbuɗ ni busi dew. Ni kay ndaɗta Yesu ka li zolona kay a yasi ana gorsemmaɗi. 12 Nam di ana, «Lona an daŋu kay gorsenna, an gi soolla geleɗeŋga kay suuna halaŋ.» 13 Nam di olo ana, «An tin hurun ni kaŋ aŋ Lona.» Nam di olo, «Golon tani u gorkemba Lona ɦansinara.» 14 Gorkemba ko nam yasira na ni tliwna u busuna, Yesu kay tamba mbuɗ ni ko asi na kay nam tli ni tasi mayra ko sa warnana. Nam li na ni kay bulum Satanna ki u miɗ mamma, nam fi saɓakŋa vi miɗna ki komu. 15 Kay buɗ suu ay ki njuni hu mbaɓura day dayna ko ndaa masina vi miɗna. 16 Nam mba ni ka a njun u suu sunda huulona hol naɗi, ko magaara dira na ana, «Nam mba njun u njafna vi Abraham» 17 Ni kay ndaɗta nam mbuɗ tam ki ko gorsemma na kay a mbuɗ ki mul ŋgol ma li ɓivunna ma jivi ɗegee fok Lonna. Kay cora vi suuna mba daɓ kiyo. 18 Cecemi nam mba njun u suu ndemba ndemesina. Kay mege nam wi ndemba eg tamba lay, fi wihawra lay. |
Bible Moussey © Bible Society of Chad, 2002.
Bible Society of Chad