HEBRENA 12 - Boy Lonana

Lona Buya

¹ Lini kaygi aygiya ni suu di kaygina ŋgolo ŋguyuygi yaygiya. Buɗuygi taygi ki ko tlesuu ɓeŋeygi poy maygirana, u cora gaɓi egeygira, liŋiygi ni liŋ ma ŋgaɓi kaygi a liŋimma.

² Ŋgarasaygi iriygi ni kay Yesu, viiygira coli ni kay gi jaŋ ayra gak gak daɓpa. Nam vi kam a asi ɓalam ki hu gu garakŋa, nam li olo ka kay miɗ mammaɗi, kay nam wi furira ka juɓum fokka, cecemi nam ka kaki kay bik ko Lona ma njufna kay dlam mamba mulla.

³ Saaragi kamu nam vi dlara suuna noyom kira kammi kay suu cora. Hinigi vun dikigi a ɓigigiɗi, lagi ndaaɗi.

⁴ Kay duu magi ma agi duu u cora agi bay duu gak gak a tew fun miɗna tuwa.

⁵ Humugi maa ki kay boy ma Lona gaɗagi ko nam gaɗ goryom na na wa su? «Goronna gol gaɗ mayra Bu Suuna gaɗaŋ kay cooŋga ko va ma lalas naɗi, mbuɗ ndaa ko yal ma nam yalaŋaɗi.

⁶ Bu Suuna gaɗ ni sa ma nam minimma, suu nam golosi ko goryom nana, asi halaŋi nam waɗasiya.»

⁷ Vagi wihawra ndaɗta kaki ko buna gaɗ goryomba na. Ni wihaw ndaɗta tak ana Lona lagi ni ko goryom na. Goo ma bum ka gaɗambina ka su?

⁸ Lini ka gaɗagi halaŋ ko goryom naɗi ni, agi ka goryom suu gasinaɗi, ni goryoŋ sa daŋi.

⁹ Saaraygi kay somoyoygi suu hu ndaŋgarana gige, asi gaɗaygiya aygi hum usi may. Ni aygi ndak a hum u Buygi ma kolo huulona kay a kak iiriya.

¹⁰ Somoyoygi suu kay ndaŋgarana gaɗaygi ni kay a kak njoka ɦawaa, ni kay dlara gol irisi jivira. Lona gaɗaygi ni kay jivira aygi hin faɗta, kay ana aygi mba taɓ u nam hu teteɗ mamba.

¹¹ Hu li ma aygi ka fi gaɗta ni aygi laki ni hu yoora ka hu furiraɗi, ŋgoo daganda suu haɗ ay u gaɗtana hin fi va ma nam haɗasi kamma, heɓpa ɦal ni iirira ɗegeera.

Gaɗagi tagi kay dlara fokka

¹² Yowgi kogi ma loɓina koloo soogi vun givigi ma maŋina.

¹³ Tuɗugi hu voɗta jivi ɗegeera, kay gayagi ma dalina irim mba ɗoɓ kiɗi, doli nam garaɗ ki jiviya.

¹⁴ Soogi tagi a lakagi u heɓpa u suuna halaŋ kay a poy jivi teteɗ, bay poyra jivi teteɗ ndaɗta bani, sa ndak a wi Bu Suunaɗi.

¹⁵ Gologi tagi jiviya a sa mba hoŋ ki dagan, hin oora vi Lona kiɗi. Gologi tagi jiviya kay sa mba mbuɗ ko gu ma galaana li cora eg suuna ŋgolo u galaa mamba.

¹⁶ Gologi tagi jiviya a sa mba li dlara zoŋgi, ko suuna ŋgolo humusi ka kay tlesuu teteɗnaɗi, ko Ezaw ma gus ŋgol mamba ki kay tlesuu tira naɗi.

¹⁷ Ko agi wagi ŋgoo dagan ni nam min hal paɗvun ma vi bumma, nam hin kini ɦawaa, nam fi voɗta ka kay a mbuɗ va ma nam lam kinaɗi. Nam halaɗ vam u tiina irim ŋgol lay.

¹⁸ Agi ɦuɗugi tagi ko suu Israelna ɦuɗ tasi eg ɦinira a ŋgeneɗta naɗi. Ҥinira Sinayra u kura ŋgal cocora, ndufunda u babaa ma ŋgolna.

¹⁹ Suu Israelna hum bu difna u della soora wanni, asi hin di ɗaŋi ana dasi boy ay hu oloɗi.

²⁰ Kay asi ndak ka a zii gaɗ ndaɗtaɗi, «Sa ma ŋgen ɦinirana lini yoo lay ni cam ki ni ci u gogoyra.»

²¹ Suu molina mbuɗ ndaana ko Moiz di ana, «An li ndaana, tan dlak cocoo.»

²² Agi mba kini eg ɦinira Siyonda, zi ma vi Lona ma iirina, hu Yerusalem ma kolona u suu mam suu sunda huulona bup bup.

²³ Agi mba ni duk suu tokina, goryoŋ Lona suu vuɗ jewna u furira, ni suu sesi ha ɓiiri kolona. Agi mbaagi ni eg Lona ma kaɓakŋa vi suuna halaŋŋa, ŋgus suu ɗegeena mbuɗ ki pasiyakka.

²⁴ Agi mbaagi ni eg Yesu sa ma taɓ duk ɦoŋga u Galamba Wilira, busuum ma vo kina li jivira su ma vi Abelna.

²⁵ Gologi tagi jivi ɗaŋ humugi vun sa ma ɓakagina. Suu hum vun sa ma gaɗasi kaŋga kay ndaŋgara tani kay tlesuu kolo huulona kaɗina, suɗ kaki ko daŋgaynaɗi. Lini aygi hoŋoygi ki dagani ka hum vun sa ma ka ɓakaygi ay kolo daynaɗi, ni aygi ka suɗ kiɗi.

²⁶ Delemba ɓakŋa dlak ndaŋgara kiyo, ni cecemi nam vi vunum u aygi anaba, «An hin ka ŋgeŋeɗ ni ndaŋgara doy holɗi, huulona lay, ni sem dew olo.»

²⁷ Boy ma di «ni sem dew olo» ana tlesuu lasi halaŋŋa hin ŋgeŋeɗa, bulum ki halaŋ halaŋ kay a va ma ka bulum kiɗina hin ni nam hol.

²⁸ Ni kay ndaɗta aygi fi mul mayra uɗ ka jok kiɗira, gaygi deɓ Lona u sunda sunum jivira lam ndaaramu, hum um may.

²⁹ Kay Looygina ni kura ŋgalla.