HEBRENA 11 - Boy Lonana

Vira

¹ Vira ni tin huruŋ gasi kay va ma aŋ ka saa kamma, aŋ wi va namma ka u iriŋgi may aŋ vi kaŋ gasi ana va namma ni na daŋ may.

² Suu ay jewna gol gasi Lona ni u vira.

³ U vira aygi hum ana tlena halaŋŋi min ay ni u boyna vi Lona. Kay tlesuu aygi ka wasi u iriygina minisi ni vama sa ka wam u irimbina.

⁴ U vira Abel li ɓivun ma jivina maŋ Lona su ma vi Kainna. Lona di kam ana nammi sa ma ɗegeena ni kay viimba. Lona u tamba di ki jivi kay ɦal mamba. Nam ki miɗi lay ni cecemi Abel ka ɓak tuwa.

⁵ U vira Henok miɗ kaɗi, Lona tlam ha kolo egemu, sa fam ka oloɗi. Bay tlam ha kolo tura wanni magaara diki ana Henok ii Lona jiviya.

⁶ Bay vira sana ka gol ii Lona jiviɗi. Kay ndaɗta sa ma min mba eg Lonna vi ki kam ana Lona kaa, nam warak suu ka halamma.

⁷ U vira Nowa hum vun Lona hu li ma nam dam kay va ma hin li ha fokŋa, ni nam ka wi dla ndaɗta u irim tuɗi lay. Nam hum vun Lona, ceɗ lumba, suɗ tam ki u suu mamma huruɗu. Ni nam kaɓakŋa kay suuna hu duliyara, ni u viimba, Lona mbuɗ golom a sa ma ɗegeena.

⁸ U vira Abraham hum vun Lona hu li ma nam yamma, nam tuɗ hu mbassa ndaŋga Lona ɦamba a jonara. Nam hin mbas mamba kiyo, tuɗ hu mbas mayra bay nam waɗta.

⁹ U vira Abraham kak hu mbassa Lona vi vunum kaɗ u namba, ko nammi ŋgayna na. Nam kak hu mbutluɓma u Isaak u Yakob asi ni suu Lona vi vunum u asi ko nam na may na.

¹⁰ Kay ndaɗta Abraham juɓmi zi ma um tini eŋ coco, jivi cocona. Lona ni sa ma ŋga u zira miniɗ ni nam lay.

¹¹ U vira Abraham mbuɗ sa ma ndaki a vuɗ goona, basaɗam jak ki ka gin a vuɗ oloɗi, Sara u taɗta lay ni ka ndak a vuɗ goo oloɗi lay. Nam tin hurum ana Lona hin li u va ma nam damma.

¹² Ni u sa dew ma ay gin ko sa miɗina nam vuɗ gorra zulira ko ciciwra huulona na. Zulira ko ŋgetlna doŋ lumma na.

¹³ Suu asina miɗ halaŋ hu vira, bay fi tlesuu Lona vi vunum kasina tuwa. Asi wasi ha ki egesi na day, gasi deɓpa, asi di ana asi kay ndaŋgara ni ŋgaygina, ko suu suuna tinisi yasi ha kay ndaŋgara daŋga na.

¹⁴ Suu di ki nana ni tak ana asi hal mbas masira kay tasira.

¹⁵ Lini asi hurusi haɗ kay mbassa asi hiniɗ kira ni asi li hoŋ dagani.

¹⁶ A gasira ni asi hal ni mbassa jivi sura, ni di ana ta kolo huulonara. Ni kay ndaɗta Lona ka li zolo kay a di ana nammi Loosinaɗi, nam minisi zina haa.

¹⁷ U vira Abraham li ɓivunna u Isaak hu li ma Lona min tukumma. Lona vi vunumi u nam Abraham, ni nam hin dam ana nam li ɓivunna u gorom ma dewna olo.

¹⁸ Lona dam ana, «Njafaŋ, ma an vi vunun kamma, hin zul ni u Isaak.»

¹⁹ Abraham vi ana Lona ndak a col Isaak ki kolo iiriya, Abraham hin fi Isaak ni wili gadla olo, ana Lona colom ay kolo iiri duk suu miɗina.

²⁰ U vira Isaak paɗ vunum ki kay Yakob u Ezaw a tak ki kay dlaasira hin li ha fokka.

²¹ U vira Yakob paɗ vunum ki kay goryoŋ Yosefna jew miɗ mamma. Nam goɓ tam kay tokolo mamba cen Lona.

²² U vira Yosef hu daɓpa vi iiri mamba wanni ɓak kay cukka vi suu Israelna hin cuk ay ki Egiptera, di kay va ma asi hin lam u sokomma olo.

²³ U vira hu li ma Moiz vuɗna somoyom ŋgayam gak gak li tilna hindi, asi wi ana goo ma jivina ni, asi li ndaa gaɗta vi mulnara kaɗi.

²⁴ U vira Moiz wul wulni mbuɗ ki ŋgolla ni ka min ana sa yam a goŋ goora vi mulna Farawnda oloɗi.

²⁵ Moiz min lassa vi suu vi Lona jivi irim su mayra li furira hu cora buu ew daŋga.

²⁶ Nam furi kay ŋgulla vi Kristu irim saɓak su begera Egiptera, nam saa mamba tini kay warak ma fokŋa.

²⁷ U vira Moiz hin ndaŋga Egipte li ndaa ka ko yara vi mulnaraɗi, nam kak u ɗigilla na en, ko nam wi Lona u irim na.

²⁸ U vira nam gijaŋ li Pak, di ana yam busuna fun ziginina, kay sa sunda huulona ma ci suuna mba ci goryoŋ Israel suu vuɗ jewna kiɗi.

²⁹ U vira suu Israelna taɓa mbo Lum ma Cerewna ko ndaŋga eŋga na, suu Egiptena min a li ko asi na may ni mbo lumma tluɓusi halaŋ.

³⁰ U vira gulumun ma Yerikona bow ki kaŋga ko suu Israelna ŋguy kam buuna kiɗisiyara.

³¹ U vira Rahab, cara gawlaŋga, miɗ ka duk suu ka min a vi Boy Lonanaɗi naɗi, kay ndaɗ vi suu mba gol lina varaɗu.

³² An di ni ana me ologe? A di kay gi Gedeon, Barak, Samson, Jefta, David, Samuel, u suu jok vun Lona, lina ka ndakanɗi.

³³ Asi tli ndaŋgara ni u viisira, asi li vama ɗegeena, ni hin fi va ma Lona vi vunum kamma may. Asi duk vun dlona,

³⁴ asi ci kura ŋgal cocora kiyo, suɗ tasi ki ko cira suuna a casi ki u ŋgew ŋgolnara ki lay. Asi li maŋiya mbuɗ saɓaki, mbuɗ saɓak hu duuna, su kay suu masi suu babali suu daŋŋa.

³⁵ U vira boyogina fi suu masi suu miɗina hoŋ ay ki kolo iiriya. Suu daŋŋa fi lassa ta ta miɗna, asi noy buɗta kira, ka min a col ay ki kolo hu miɗna a kal hu iirira jiviraɗi.

³⁶ Suu daŋŋa asi ŋgulusiya, ɓeŋesiya, suu daŋŋa, asi njunusi u galina, cukusi daŋgayna.

³⁷ Suu daŋŋa asi casi ki u ɦinira, suu daŋŋa asi ŋgaɗasi irisi ki duk mba' mba', ɗowba casi ki u ŋgew ŋgolna. Asi tuɗ ki hu li ma daŋŋa daŋŋa cuk bak timigiina tasi u bak ɦugunina. Asi fi wihawra ko lassa ŋgolo.

³⁸ Suu hu duliyara halaŋ ka ndaki kay suu asinaɗi. Asi viɗ ki ŋgoo bagi lay, kay ɦinira lay, asi buu ni hu zul ŋgolla, ga hu zul ndaŋgara lay.

³⁹ Suu asina halaŋ fi dira jivira kasi fok Lona kay viisira, na lay ni fi va ma Lona vi vunum kamma kaɗi.

⁴⁰ Kay ndaɗta Lona takaygi fok jivi su olo, nam min ka ana asi mbuɗ ki pasiyak fokoygi jewɗi.