HEBRENA 1 - Boy Lonana

Lona ɓak maŋ suuna u Goromma

¹ Ay jewra Lona ɓak somoyoygi sem bolowo. Di suu jokom vunumma u yal ma daŋŋa zeɗ zeɗ lay.

² Kay aygi suu ka hu buu ma dagan cecemina nam daygi boyna ni hu Goromma. Lona li tlena halaŋŋi u namu, tle asina halaŋ Lona hinimsina halaŋŋi komu.

³ Nam weleɗ kiɗikka ŋgolla vi Lonara, nam tli tammi u Lona tamba gasi, tlena coli hu liisi ni u saɓakŋa vi boy mamma. Hu li ma nam mbus cora vi suuna ki pasiyak mbusni, nam i kolo huulona kaki hu bik ko Lona ma njufna ma saɓakŋa kom belna.

Goona ŋgol su suu sunda huulona

⁴ Goona mbuɗ ni ŋgol su suu sunda huulona, Lona tinim semma ŋgolna kam su masina.

⁵ Duk suu sunda huulona halaŋŋi nam di maa ka dew ana, «Aŋŋi Goronna, karam an mbuɗ ni Buŋu», ka naɗi lay. Nam di ka maŋ sa sunda huulona maa dew ana, «An hin li a Bumu, nam hin li a goronna may,» ka naɗi.

⁶ Hu li ma Lona a sun Gorom ma dewna ay kaŋgara wanni nam di ana, «Suu sunda huulona halaŋŋi hin goɓ kaŋga fokomu.»

⁷ Gola ni boy ma Lona dam kay suu sunda huulona, «Lona li suu mam suu sunda huulona ki semeɗna, suu sunumma nam lasi ki sin kura.»

⁸ Kay Goona ni, Lona di ana, «Dlam maŋga mulla, Lona, tiniŋ kaɗ ni a fafatɗa. Aŋ ti mul maŋga ni u ɗegeera.

⁹ Aŋ min ni dlara ɗegeera, ta cora ni aŋ noyoɗ kiyo, ni kay ndaɗta Lona, Looŋŋa, manaŋŋa, nam oyoŋ huruŋ u furira kay ɦala nam ɦaŋ li ma jivina, jivi su ma nam ɦam maŋ ndarayaŋŋana bel.»

¹⁰ Nam di olo ana, «Ni aŋu Bu Suuna hu jewra tin ayra li ndaŋgara ni aŋu. Li kolora ni u koŋ taŋga lay.

¹¹ Asi halaŋŋi hin daɓ kiyo, aŋ hin hin iiriya, asi hin mbuɗ ki ni ko barawina na.

¹² Aŋ hin ɗuɗusi ki ko baraw ma cuk tara na. Asi hin mbuɗ ki ni ko barawina na. Aŋ hin li ni ko taŋga ndaɗta na ka mbuɗ maaɗi a fafatɗa.»

¹³ Duk suu sunda huulona ni nam di maa ka dew ana, «Aŋ kak kay bikin ma njufna, gak gak an cukuŋ suu babali maŋsina kaŋga u seŋu ko tlesuu tin semma kasina na,» ka naɗi.

¹⁴ Suu sunda huulona asina ni suurage? Ni ŋgussa suu sun Lona suu nam cukusi a njun u suu fi suɗtana.