Magaara Vi Sa Jok Vun Lona AGE 2 - Boy Lonana

Jivira vi zira wilira

¹ Hu til ma kiɗisiyana, hu buu ma dok mba' yam dewna boyna vi Yawe mbay fun Age sa jokom vunumma.

² «Ɓak Zorobabel goŋ Salatiyel ma mul ma Yudana ɗaŋ, maŋ Josuwe goŋ Yossadakŋa, mul ŋgol ma li ɓivunna u suu hiŋŋa halaŋ may dasi ana,

³ Dukugi agi suu hini iiri wanna, sa wi zi ndaɗta ay hu jivi maɗta jewra ni gege? Agi waɗ cecemi ni ndaɗ ni nanage? Agi waɗ cecemi irigi ni ko ndal va ɦawana naɗi su?

⁴ Cecem wanda Yawe di ana Zorobabel so uŋ kiyo, so uŋ kiyo Josuwe, goŋ Yossadakŋa, mul ŋgol ma li ɓivunna, soogi ugi kiyo agi suu hu mbassa hiŋga halaŋ. Yawe di ana lagi sunda, kay an ka u agiya. Yawe, ma saɓakŋa kom belna, di na.

⁵ Ko dlara an daɗ ki u vunun kagi hu li ma agi sel ay ki hu mbassa Egiptera na, ko ndaɗta na Musuk manda dukugi tew tew lagi ndaa vaɗi.

⁶ Gasi, Yawe, ma Saɓakŋa Kom Belna, di na, ŋgoo dagan na nde ni, lina hin mbuɗ geɗeŋga an hin bulum huulona ki u ndaŋgara lay, mbo lum ma ŋgolona u yam mbassa halaŋ may.

⁷ Yam mbassa halaŋ hin dlaka, begera kay yam mbassara halaŋ hin yow liŋŋa, an hin oy hu zi ndaɗta u jivira Jawe ma Saɓakŋa Kom Belna di na.

⁸ Yawe, ma Saɓakŋa Kom Belna, di ana, Doonora ni manda, lorra ni manda lay.

⁹ Yawe di ana, Jiv zi ndaɗta ŋgoo daganda suu kay ta jewra, an hin hin heɓpa huwa Yawe, ma Saɓakŋa Kom Belna, di na.»

Suu kaki duk dla corana

¹⁰ Hu buuna dok mba' yam fiɗi, hu til ma dleeŋena hu basara mbara cokira Dariyus a mulnara, Yawe ɓak boyna maŋ Age, sa jokom vunumma.

¹¹ «Yawe ma Saɓakŋa Kom Belna dam ana, nam joɓ muli suu li ɓivunna asi hoŋom dira ki kay joɓpa wanda.

¹² Lini sana tli tliw ma teteɗna ay kom hu baraw mammawa, lini funa hin ŋgen eg baraw namma, tlesuu ɗuɗna, sum veŋŋa, mbulna ɗowba va ma ti managelay ni tle asina hin li teteɗ su?» Muli suu li ɓivunna hoŋom dira ana, «Ҥawaa.»

¹³ Age joɓosi olo ana, «Li ni sana tin kom ay kay sa miɗina wa ni, nam mbuɗ ki ni njenjee, nam hin tin kom eg va maa duk tle asina wa dew ni va namma hin mbuɗ ki njenje lay su?» Muli suu li ɓivunna hoŋom dira ana, «Va namma hin mbuɗ ki njenjee.»

¹⁴ Age hoŋ dira ana, «Suu asina ni ko ndaɗta na, Yawe di ana suu asina fokonni ko ndaɗta na. Sunda asi laɗta u tlege suu asi ɦansinana ki ni njenje ko ndaɗta na lay.»

Kakagi u juɓpa hu buu ma karamma

¹⁵ «Cecem wanda agi kakagi u juɓpa hu buu ma karamma day ta ta hu fokka. Ta ta hu buu ma tin ɦinira kolo kay ndaraɗ ɦinira hu zira vi Yawera,

¹⁶ Jew bay ndaɗ li tura ni, sana col ha ana nam i yow wana va kilo dok mba' kala na ni nam hin fi ay kom hu li ma wana cuki huna ni kilo doogo ɦawaa. Sa col ha ana nam i go yo ay hu doy ma hurum sel yona va litir dok vadlna ni nam hin fi ay kom hu doyra ni litir dok mba' ɦawaa.

¹⁷ An cagi poŋga hu sunda agi laɗta, coorogi waagina ki lay, cukugi dlaŋmagina kagi lay, Yawe di ana an tew ka a hoŋogi ay egenɗi.

¹⁸ Kakagi u juɓpa hu buu ma karamma ta ta hu fokka, col ha hu buu ma dok mba' yam fiɗina hu til ma dleeŋena ay hu buu ma gi u zira vi Yawera kaŋgana ni kakagi u juɓba.

¹⁹ Na ni ii wa ka kaŋga hu veena ko su? Gugutlura lay, tulumma lay, conora lay vuɗ ka na ndeɗi. Hu buu ma karamma an hin paɗ vunun ki kasiya.»

Vi vunna u Zorobabel Sa Yawe manamma

²⁰ Boyna vi Yawe di Age a yamba mbara hu buu ma dok mba' yam fiɗina hu til namma.

²¹ «Ɓak Zorobabel mul ma Yudana dam ana: huulona u yam ndaŋgara hin dlak konu.

²² An hin to dlamba vi mulinara kiyo, hin bulum saɓak ma vi muli suu vi suunana kiyo, an hin to pupusna ki may, ci suu jaŋamma kiyo, kulumina u suu jaŋasina hin puk kaŋgaa, gegelay kaŋga fun ŋgewra vi wayammara.

²³ Hu buu namma Yawe ma Saɓakŋa Kom Belna di ana an hin tlaŋu Zorobabel goŋ Salatiyelna saan ma sunda. Jawe di na. An hin tiniŋŋi ko ndal walak ma tin tampoŋŋana na. Yawe ma Saɓakŋa Kom Belna di ana aŋŋi sa an manam kina.»