Magaara Vi Sa Jok Vun Lona AGE 1 - Boy Lonana

Coki mayra hoŋ zira vi Lonara kolo minda balamaɗta

¹ Hu basara mbara, hu til ma karkiyana, hu buu ma jewna hu cokira Dariyus a mulnara, Yawe ɓak boy mamma ay ki fun Age sa jokom vunumma, maŋ Zorobabel goŋ Salatiyelna mul ma hu mbassa Yudara, maŋ Josuwe goŋ Yosadakŋa mul ŋgol ma li ɓivunna.

² «Yawe, ma Saɓakŋa Kom Belna, ɓak ana, Suu asina ca ni di ana, cokira hoŋ zira vi Yawera kolo mindara mba ka tuɗi.»

³ Doli ɗaŋŋi boyna vi Yawe mbay fun Age, sa jokom vunumma ni na gaw may.

⁴ «Na ni jivi kagi a agi kak hu ziigi ma mini jivina hu li ma ziinda ka ki tooy kaŋgana su?

⁵ Cecem wanda, Yawe, ma Saɓakŋa Kom Belna, di ana, Saaragi ki kagi jiviya, agi cecemmi mbaagi ki ni ara gage

⁶ Agi zaa tlena kaŋga ŋgol coco may hin feɗ ni ew ɦawaa, agi ti tlena may hayagi ka hoɓbi, agi ci lay, ka furiɗi. Agi cukugi barawna egegi lay, tagi ka gi kuɗi lay, begera vi sa tli mboomma tuɗ ni hu mbumbura uɗ ki cooyra.

⁷ Yawe, ma Saɓakŋa Kom Belna, ɓak ana, Saaragi ki kagi jiviya, agi cecemi mbaagi ki ni ara gage?

⁸ Ɗiŋigi kolo kay ɦinira, yowogi guna aya, mbay miningi ziinda. Yawe di ana, An hin li furira huruɗu, an hin tak saɓak manna kiyo.

⁹ Agi juɓ ay ŋgol coco may feɗ va ka ŋgolɗi. Hu li ma agi tuɗum ha vo varagina an fo musukun kamu. Ni kay mege? Yawe, ma Saɓakŋa Kom Belna, di na ni kay ziinda to ki kaŋgara, agi gegelay tin saarammi kay ziimu.

¹⁰ Ni kay ndaɗta huulona ka gagi mbaɗagira kagi oloɗi, ndaŋgara ka jivigi tlegena oloɗi lay.

¹¹ An yi baktarra mbay kay ndaŋgara, kay ɦinira, kay wana, kay veŋ ma wilina, kay mbul ma heɓma lay, kay tlesuu ndaŋgara lasina halaŋ. Kay suu warna, kay mbuurina, kay vuɗ tlesuu agi fasi u sun magirana halaŋ.»

¹² Na ɗaŋŋi Zorobabel ma goŋ Salatiyelna u Josuwe ma goŋ Yosadakŋa, mul ŋgol ma li ɓivunna u suuna halaŋ hum del Yawe Loosina, u boy ma Age ma jok vun Lona ko ndal vun sunda Yawe, Loosina, dambara na. Asi suuna hin li ndaana fok Yawe.

¹³ Age sa sunda vi Yawe di boy ma Yawe dammana maŋ suuna. Yawe di ana, «An ka u agiya.»

¹⁴ Yawe mal saa Zorobabel ma goŋ Salatiyel ma mul ma Yudana kiyo, saa Josuwe ma goŋ Yosadakŋa mul ŋgol ma li ɓivunna kiyo, mal saa suu hiŋŋa ki lay. Asi mbay gijaŋ sunda hu zira vi Yawe, ma Saɓakŋa Kom Belna, Loosina.

¹⁵ Hu buuna dok mba' yam fiɗi hu til ma karkiyana.