HABAKUK 3 - Boy Lonana

Soolla Habakuk gaɗta, Lona humumu

¹ Cenda vi sa jok vun Lona, Habakuk yoo tamba.

² Yawe, an hum boy ma aŋ ɓakamma, an mbuɗ ki ndaana. Yawe li sun maŋga hu basara. Hu basara ni aŋ tak sun maŋga ki hu li ma wi hawra ana gasi aŋŋi sa wi hahaw suuna.

³ Lona col ay hu Teman, ma teteɗna ay kolo kay ɦinira Paranda. Bibiŋil mamba oy huulona, geleɗta geleɗemba oy yam ndaŋgara.

⁴ Kiɗikka mbuɗ weleɗa, weleɗta kal ay ki hu duk komu. Ni li ma saɓakam ka ŋgay huna.

⁵ Tuguɗiira cora tuɗ ha fokomu, mbogomma tin sem hu mamma may.

⁶ Nam cola, nam ŋga bubu ndaŋgara. Nam gol irim na ni suuna mbuɗ ndaana. Ҥini mayra didinda wak kiyo, ɦini mayra dadayra law ki lay. Li namma ni voɗomba dadayra.

⁷ An wi mbutluɓ ma vi Koushanna bulum ki a fafaɗta. Ŋgus ma suu hu mbassa Madiyanda vam kasina bulum kiyo.

⁸ Yawe hurum ɓeŋ eg lumma wa kalage? Yaaŋga ni eg lumma kala, yaaŋga ni eg lum ma ŋgolna kala, hu li ma aŋ ful kolo kay kulumi maŋsinana, kolo hu pupus maŋ ma saɓakŋa ɦayna kalage?

⁹ Gu mbuuru maŋga ki koŋ siiliya, boy maŋ ma suura ni givunna, aŋ mal yona ki kay ndaŋgara hu zulla ŋgolora ɓaɗ na guk guk.

¹⁰ Ҥinira waŋ na ni, li ndaana, voɗ mbo ma jakka, zul yona wak voɗta, nam maɗ kom kolo huulona.

¹¹ Faɗta asi u tilna col kolo hu ziisiya, ki ii kiɗikka hu li ma mbuuru maŋga ka tuɗ huna, hu li ma sin saɓ maŋga ka vi kura buyuk buyukŋa.

¹² Aŋ ŋguy yam ndaŋgara u yaaŋga aŋ tay suuna ki kaŋga u seŋ u yaaŋga.

¹³ Aŋ kal ay ki ni a suɗ suu maŋsina a suɗ saaŋ ma aŋ fuurumma. Aŋ ci suu vo hu ziŋ sa ma cona kiyo. Aŋ bulumum suu mamsina kiyo.

¹⁴ Aŋ cokosi yam muli masisina ni u mbuuru masira tok, asi ɗaŋŋi mbay ko ndal babaana na a suɗun ki u heɓpa, ko ndal asi ci sa ma asi suu kamma ki ŋgay gumunda na.

¹⁵ Aŋ gi voɗta maŋ kulumi maŋsina duk mbo lumma ŋgolna, duk yo ma saɓak coco ma zal walak walakŋa.

¹⁶ An hum na ni hurun ɓeŋ ki ni na gaw. Vunun dlak ko vun namma, tan mbuɗ ki maŋira gaw, an kak hu li ma dewna hurun ki ɓeŋiya. Kay an ndak juɓ buu ma ɓeŋga ka ŋgen tan a tuɗ li yara u suu duu u aminaɗi.

¹⁷ Gasi, tulumma ka vuɗ oloɗi, ŋgusu gugutlura ka li va ma gasi oloɗi, zum senena mbuɗ ganyamba, sa ka fi va ay hu senena a tiraɗi, yoori suu gorina viɗ kiyo, yoori suu ŋgolona ka coli vun bulla oloɗi.

¹⁸ An hin kak u furira ni u sem Yawe. An hin li furira kay Lona hin suɗunu.

¹⁹ Yawe ni malanna. Nammi saɓak manna. Nam mbuɗun sen ki ko sem dukka na, hin tuɗun ki hu li ma dayna. Soolla vi sa ma fok suu gi soollana, gaɗ u diŋŋa.