HABAKUK 2 - Boy Lonana

¹ An hin kak jivi hu liin ma golla, an hin col kolo kay gulumunna. An hin saa dlara nam hin daɗ egenda, va ma an hin hoŋ dira a gi humba kay ɗegeera.

Hoŋ dira vi Lona, sa ɗegeena u ma las suuna

² Yawe hoŋon dira, nam dan ana, Ɓii dlara aŋ waɗta, buɗuɗ uɗ ki kolo hu magaara a suuna ndumuɗ ki na vala vala,

³ kay ana ni dlara tak taɗ ki kay faɗ vun dlara. Ndaɗ tew ki hu liiɗ wa, ndaɗ ka kaboyɗi, lini yaɗ ka vi aya ni juɓuɗu, ndaɗ hin mba gasi daŋ may, ka kaboyɗi.

⁴ Golom hurum oyra u ŋga tara, nam ka wi gasiraɗi, may sa ma ɗegeena hin kak iirira ni u vira.

⁵ Gasi daŋ may summa ni va cona, sa guruɗ ki u namma ka kak eg liimbi. Nam vunum ki ko ndal maɗna ci suunara na. Nam tok suuna egem halaŋ halaŋ, mbaɗ suuna ha ki egem halaŋ halaŋ.

⁶ Suu asina halaŋ ca ni hin ka dam boy ma mbambara haɗam hurummaɗi su? Asi hin di ana, Cora ka kamu. Nam yow tlesuu ka mamsinaɗina lay. Hin tuɗ ni ara na gage? Nam tli balna kam ŋgolla suu na ɗow ɗow.

Givun ma vadlna

⁷ Na ni asi suu aŋ tli balna kosina hin ka yow kolo u aŋ taŋga zak ki su? Suu kisigiŋŋa hin ka dliɗ ki koloɗi su? Aŋ hin mbuɗ ni vaasi ma ɦurumba.

⁸ Ko aŋ ɦurum suuna bolowra na, njaf suu hinna halaŋ hin ɦurumuŋu, kay busu ma vi suunana kay saɓak ma aŋ lam kay mbassana, hu zi ma ŋgolna u suu ɦurumma halaŋ.

⁹ Cora ka kamu. Nam yow li ma cona kom a ziimu, a min ziim ha ki kolo na day a puruɗ tam ki ko dla cora.

¹⁰ Aŋ col ni a mbuɗ ziiŋ ki zolona, ci suuna ki bolowra ni aŋ ci ki ni iiri maŋga may.

¹¹ Gasi, gogoyra min gulumunna u ndaɗta hin tiira, gu ma cuki kolo kay yam zirana hin hoŋoɗ dira.

¹² Cora ka kamu. Nam min ziimmi kay busuna. Nam gi u ɦoŋziim ma ŋgolna ni kay ci maɗna.

¹³ Boy namma col ay ka ni ko Yawe, ma Saɓakŋa Kom Belnaɗi, su? Suuna loɓ tasi ni maŋ kura, njaf suuna li cora eg tasi ni ɦawaa.

¹⁴ Kay ana saɓak ma vi Yawena hin oy ki kay yam mbassa ko ndal yona oy ki hu lum ma ŋgolna na.

¹⁵ Cora ka kamu. Nam ɦal va ma ci ma cona maŋ ndaramma. Aŋ tlum vaaŋ ma ci ma cona ɦam maŋ ndaraŋŋa ta ta guruɗum ki a suuna san kay siili mamba.

¹⁶ Huruŋ oyra ni u zolona, ka u bibiŋillaɗi. Aŋ taŋga ci may kay bik ko Yawe ma njufna vo ki kaŋu, ŋgoo dagan jivira ni hin mba ni hahawra.

¹⁷ Gasi saɓak ma aŋ lam ay hu Libanna pereɗ kaŋ wa, mbuuri suu ɓeŋ tlegena kina hin casi kiyo kay busu suuna, kay dla cora laɗ hu mbassara, hu zi ma ŋgolna u suu ɦurumma halaŋ.

¹⁸ Foto mbutl ma sa ceɗ guna ceɗemma jivi mamba ni mege, ɗowba ma yoorom yoorina kay haɗ dla corana, li ni sa ceɗ gu nammana ɦal tam ki mamu a li fuli suu ndumuna.

¹⁹ Cora ka kamu. Nam di vun guna ana nam col koloo. Ɗowba di gogoyra vunuɗ ka ɓakgira ana ndaɗ col koloo, hin ɓak kaɗ ana ndaɗ hin haɗ suuna. Goloɗ ɗaŋ taɗ weleɗ u doonora u tusuna may musuk ta ka huruɗ na nde a haɗ saɓakŋaɗi.

²⁰ May Yawe ka coli hu ziimba teteɗta, yam ndaŋgara halaŋ seŋ vunuɗ fokomu.